Royaume ti Nzapa ayeke mbeni tâ gouvernement so Jéhovah Nzapa la azia gere ni na sese. Na yâ ti Bible, a iri “Royaume ti Nzapa” nga “Royaume ti yayu” ndali ti so lo komande na yayu (Marc 1:14, 15; Matthieu 4:17). A kpa terê mingi na agouvernement ti azo, me Royaume ni ayeke kota ahon agouvernement ti azo na yâ ti aye kue.

•   Agbia ni. Nzapa azia Jésus Christ tongana Gbia ti Royaume ni na lo mû na lo mbeni ngangu ti komande so mbeni zo ti komande awara ni lâ oko ape (Matthieu 28:18). Jésus asara kua na ngangu ti lo so ti sara gï na nzoni ye, ndali ti so lo fa lani awe so lo yeke mbeni Mokonzi so zo apeut ti zia bê na lo nga lo yeke bâ mawa ti azo (Matthieu 4:23; Marc 1:40, 41; 6:31-34; Luc 7:11-17). Na gbe ti fango lege ti Nzapa, Jésus asoro ambeni zo na popo ti amara kue ti ‘komande ande tongana agbia na ndö ti sese’ na terê ti lo na yayu.​—Apocalypse 5:9, 10.

•   A yeke ninga ngu oke. Nde na agouvernement ti azo, so aga ahon aga ahon, Royaume ti Nzapa ‘a yeke futi lâ oko pëpe.’​—Daniel 2:44.

•   Awakodoro ni. Zo kue so asara ye so Nzapa ahunda alingbi ti duti na yâ ti Royaume ti Nzapa atâa ala yeke ti kodro wa wala a dü ala na ndo wa.​—Kusala 10:34, 35.

•   Andia ni. Andia (wala acommandement) ti yâ ti Royaume ti Nzapa ake na azo ti sara sioni ye, me angbâ gï ge ape. A yeke sara nga si bango ndo ti azo ni aga nzoni ahon ti kozo. Na tapande, Bible atene: “‘Mo ndoye Jéhovah Nzapa ti mo na bê ti mo kue, na âme ti mo kue nga na bibe ti mo kue.’ So ayeke commandement so ayeke kota ahon atanga ni kue na a yeke kozoni la. Use commandement ni, so akpa ti kozoni so, ayeke so: ‘Mo ndoye mba ti mo tongana mo wani.’” (Matthieu 22:37-39). Ndoye so azo ti yâ ti Royaume ni ayeke na ni na mbage ti Nzapa apusu ala ti sara ye ndali ti nzoni ti amba ti ala.

•   Fango ye. Royaume ti Nzapa alu ambeni ndia na azo ti yâ ti kodro ni, me nga lo yeke fa na azo ni tongana nyen ti sara ye alingbi na andia ni so.—Ésaïe 48:17, 18.

•   Nda ti gango ti Royaume ni. Royaume ni ayeke ga ande pëpe ti sara si agbia ni awara go na ndö ti azo ni tongaso si ala ga azo ti mosoro. Me, a yeke sara ande si ye so bê ti Nzapa aye aga tâ tënë, so na yâ ni a yeke wara zendo so Nzapa amû na azo so aye lo so a yeke ti duti na fini lakue lakue na yâ ti mbeni paradis na ndö ti sese.—Ésaïe 35:1, 5, 6; Matthieu 6:10; Apocalypse 21:1-4