AVERSÊ TI BIBLE SO A FA NDA NI
Jérémie 29:11: “Mbi hinga mbilimbili ye so mbi pensé ti sara ndali ti ala”
“Jéhovah a atene: ‘Mbi hinga mbilimbili ye so mbi pensé ti sara ndali ti ala, mbi pensé ti mû na ala siriri, me ye ti vundu pëpe, ti mû na ala mbeni nzoni gigi ti kekereke nga na beku.’”—Jérémie 29:11, Mbeti Nzapa ti fini dunia.
“L’Eternel atene, Mbi hinga bibe ti Mbi teti i so Mbi bi bê ti Mbi dä, bibe ti siriri, me ti sioni pëpe, ti mû na i beku teti lâ ti nda ni.”—Jérémie 29:11, La Sainte Bible en sango.
Nda ti versê ti Jérémie 29:11
Jéhovah amû lani zendo na awakua ti lo so lo yeke mû na ala mbeni gigi ti kekereke so siriri ayeke dä. Atâa so a sû atënë so na azo ti ândö, Nzapa ayeke na oko pensé ni so ndali ti e laso nga. Lo yeke “Nzapa so ayeke mû beku na zo.” (aRomain 15:13). Lo sara si a sû mara ti azendo tongaso na yâ ti Bible tongaso si “e duti na beku” ndali ti gigi ti kekereke.—aRomain 15:4.
Atënë so angoro versê ti Jérémie 29:11
Atënë so ayeke na yâ ti mbeni lettre so a tokua lani na azo ti Israël so a mû ala na Jérusalem a gue na ala na ngbâa na Babylone b (Jérémie 29:1). Nzapa atene na azo kue so a gbu ala na ngbâa so ala yeke ngbâ na Babylone ni aninga nga ala doit ti leke ada, ti fâ yaka na ti dü amolenge (Jérémie 29:4-9). Me, Nzapa akiri atene: “Tongana ngu 70 so ala sara na Babylone ahunzi awe, mbi yeke bi lê ti mbi na mbage ti ala, na mbi yeke sara si zendo ti mbi aga tâ tënë na mbi yeke kiri na ala na [Jérusalem].” (Jérémie 29:10). Nzapa afa na ala biani so lo yeke girisa ala ape nga so ala yeke kiri ande biani na kodro ti ala.—Jérémie 31:16, 17.
Nzapa asara ye alingbi na zendo so lo mû lani na azo ti Israël. Tongana ti so lo fa lani kozo, Cyrus so ayeke Gbia ti Perse amû kodro ti Babylone na ngangu (Ésaïe 45:1, 2; Jérémie 51:30-32). Na pekoni, Cyrus azi lege na aJuif ti kiri na kodro ti ala. Ala kiri na Jérusalem na peko ti so ala sara ngu 70 na ngbâa.—2 Chronique 36:20-23; Esdras 3:1.
So Nzapa asara ye alingbi na zendo ti lo so e wara na Jérémie 29:11 adë bê ti azo kue so azia bê ti ala na azendo ti lo laso. Lo mû zendo so lo yeke ga ande na siriri na ndö ti sese kue na lege ti Royaume ti lo so Jésus Christ la ayeke komande ni.—Psaume 37:10, 11, 29; Ésaïe 55:11; Matthieu 6:10.
Aye so azo apensé na ndö ti Jérémie 29:11, me so ayeke na lege ni ape
Ye so azo apensé: Nzapa ayeke na mbeni plan ndali ti zo oko oko.
Tâ tënë ni: Nzapa azia lege na zo oko oko ti mû desizion lo wani na ndö ti ye so lo ye ti sara na gigi ti lo. Lo tene lani tënë so ayeke na Jérémie 29:11 na groupe ti azo ti Israël so ayeke lani na Babylone na lo ye lani si groupe ti azo ni so aduti na mbeni beku ndali ti gigi ti kekereke (Jérémie 29:4). Me, Nzapa azia lege na zo oko oko ti soro wala lo ye ti bâ nzoni na lege ti zendo ni so wala lo ye ape (Deutéronome 30:19, 20; Jérémie 29:32). Azo so asoro ti gi Nzapa asara ni lani na lege so ala sambela lo na bê ti ala kue.—Jérémie 29:12, 13.
Diko Jérémie chapitre 29 na bâ akete tënë so afa nda ti atënë ti aversê ni nga na aversê so a tokua zo dä.
a Jéhovah ayeke iri ti Nzapa wani.—Psaume 83:18.
b Mbeni mbeti asara tënë so na ndö ti versê ti Jérémie 29:11: “Tënë so ayeke mbeni oko ti apendere zendo so ayeke na yâ ti Bible so afa bibe ti bango mawa ti zo so Yahweh [wala Jéhovah] ayeke na ni na mbage ti azo so a gue na ala lani na ngbâa so, na ye so amû lege na ala ti duti na nzoni pensé ndali ti gigi ti kekereke nga ti duti na beku.”— The Expositor’s Bible Commentary Volume 7, lembeti 360.
Bâ nga
AKOTA FANGO YE TI BIBLE
Royaume ti Nzapa ayeke nyen?
Na ngoi ti kusala ti Jésus kue, lo fa ye na ndö ti Royaume ti Nzapa mingi ahon tanga ti aye kue. Teti angu ngbangbo mingi, adisciple ti lo asambela ti tene Royaume so aga.
AYE SO BIBLE AFA
Aye ti mandango na Bible
Soro aye ti mandango na Bible so ayeke sara si mandango ye ni anzere na mo mingi.
AYE SO BIBLE AFA
Yeda ti tene e manda Bible na mo
Yeda ti tene mbeni zo amanda Bible na mo senge senge.
