Mariage asara si mbeni fini sewa abâ gigi. Atâa so mo yeke ngbâ lakue ti ye babâ na mama ti mo nga ti ne ala, wali wala koli ti mo ayeke fadeso zo so ayeke kota mingi na lê ti mo na ndo ti sese ge. Tënë so alingbi ti duti ngangu na ambeni fami ti mo ti yeda na ni. Me awango ti Bible alingbi ti mû maboko na mo ti sara ye nzoni na ndo ti tënë so si mo na afami ti mo angbâ ti duti na siriri, nga mo gi lakue ti kpengba fini sewa ti mo.

YE SO BIBLE ATENE: “Mo ne babâ na mama ti mo.” (aÉphésien 6:2). Atâa ngu ti mo ayeke oke, mo doit lakue ti ne babâ na mama ti mo. Hinga so wali wala koli ti mo nga ayeke na babâ na mama so a lingbi lo dengi mê na ala. “Ndoye asara mbanda pëpe,” ni la bâ lâ oko ape songo ti lo na ala tongana mbeni ye so ayeke ga na kpale.​—1 aCorinthien 13:4; aGalate 5:26.

YE SO MO LINGBI TI SARA:

• Kpe ti tene mara ti atënë tongaso: “Afami ti mo ayeke ne ka mbi ape” wala “Mama ti mo aye ka tënë ti mbi ape”

• Tara ti bâ aye tongana ti so koli wala wali ti mo ayeke bâ na ni

YE SO BIBLE ATENE: “Fade zo azia babâ ti lo na mama ti lo, na lo duti na wali ti lo; fade ala ga mitele oko.” (Genèse 2:24). Tongana mo sara mariage, babâ na mama ti mo alingbi ti bâ so ala yeke lakue na komandema na ndo ti mo na tongaso ala yeke gi ti yôro tere ti ala na yâ ti mariage ti mo ahon ti so ala doit ti sara.

A yeke na mo nga na koli wala wali ti mo ti fa na babâ na mama ti mo na ndoye katikati so a lingbi ala hon ni ape. Mo lingbi ti sara tënë ni na ala polele sân ti sara tënë ti songo bê (aProverbe 15:1). Ti sara ye lakue na tâ be-ti-molenge, na ngangu pëpe nga na kangango bê ti ku ayeke mû maboko na mo ti lë nzoni songo na afami ti mo nga ti ngbâ ti “kanga bê na mba na yâ ti ndoye.”​—aÉphésien 4:2.

YE SO MO LINGBI TI SARA:

• Tongana gingo bê ayeke dä na ndo ti fason so afami ayeke yôro tere ti ala na yâ ti sewa ti ala, a yeke nzoni mo na koli wala wali ti mo asara tënë na ndo ni na ngoi so li ti ala ayeke kpô

• Zia ala mä tere lakue na ndo ti fason so ala yeke leke ande na atënë tongaso