1 Samuel 21:1-15
21 Na pekoni, David asi na ndo ti prêtre Ahimélec, na kodro ti Nob.+ Na ngoi so Ahimélec atingbi na David, terê ti lo akomanse ti dö, na lo tene na lo: “Mo yeke gï mo oko ngbanga ti nyen? Mbeni zo ayeke na terê ti mo ape ngbanga ti nyen?”+
2 David akiri tënë na prêtre Ahimélec, lo tene: “Gbia amû yanga na mbi ti sara mbeni kua, me lo tene na mbi, lo tene: ‘Kua so mbi tokua mo ti sara nga na ye so mbi fa na mo ti sara so, mo sara tënë ni na zo oko pëpe.’ Mbi mä terê na azo ti mbi ti tene e wara terê na mbeni ndo.
3 Tongana mo yeke na mapa oku wala mbeni ye nde ti mû na mbi, mo peut ti mû ni na mbi senge.”
4 Me prêtre ni atene na David: “Senge mapa ayeke dä pëpe, gï ti so a zia ni na gbele Nzapa.+ Amaseka ni alingbi ti te ni gï tongana ala ndu wali pëpe.”*+
5 David atene na prêtre ni: “Ti tâ tënë ni, e ndu wali pëpe, tongana ti so e yeke sara ka lakue na ngoi so e gue ti sara bira.+ Asingana akua so ayeke akua ti Nzapa ape si amaseka ni asara kue ti ga sioni pëpe so, si kua ti so ayeke nzoni-kue so?”
6 Amapa ayeke dä so a zia ni na gbele Jéhovah+ me a zi ni na a zia afini ni na place ni na lango ni so. Tongaso, prêtre ni amû angbene mapa ni so na David, ndali ti so mbeni nde ayeke dä pëpe.
7 Mbeni zo ti kua ti Saül ayeke dä na lango ni so; a gbanzi lo na gbele Jéhovah. Iri ti lo ayeke Doëg,+ zo ti Édom,+ mokonzi ti aberger ti Saül.
8 David atene na Ahimélec: “Mbeni likongo wala épée ayeke dä? Mbi ga na épée ti mbi nga na aye ti bira ti mbi pëpe, ndali ti so gbia ahunda ti tene mbi hon hio ndali ti kua ni.”
9 Prêtre ni atene: “Épée ti Goliath,+ Philistin so mo fâ lo lani na yâ ti Popo-hoto* ti Élah,+ ayeke ge. A kanga ni na yâ ti bongo, a zia ni na peko ti éphod.+ Tongana mo ye ti mû ni, mo lingbi ti mû ni ndali ti so gï ni la ayeke dä.” David atene: “Mbeni épée ti lingbi na ni ayeke dä pëpe. Mû ni na mbi.”
10 Na lango ni so, David alondo lo ngbâ ti kpe yongoro+ na Saül. Lo gue ngbii lo si na ndo ti Akish, gbia ti Gath.+
11 Awakua ti Akish atene na lo: “So David, gbia ti kodro ni la ape? A yeke lo so lani na ngoi so azo ayeke dodo, ala he bia na iri ti lo, atene:
‘Saül afâ azo saki oko, saki oko,David afâ ti lo azo saki bale-oko, saki bale-oko so la ape’?”+
12 David agi bê ti lo mingi ndali ti tënë so ala tene so, na mbeto+ ti Akish, gbia ti Gath, asara lo mingi.
13 Tongaso, na ngoi so lo yeke na gbele azo ni,* lo sara si ala bâ atene lo yeke zo ti fou+ nga lo sara ye tongana zo ti fou. Lo kpaka ambeni ye kirikiri na terê ti yanga ti gbagba ti gbata ni nga lo zia si ngu ti yanga ti lo ayuru na yâ ti kuä ti yanga ti lo.
14 Akish atene na awakua ti lo: “Ala bâ kue so lo yeke zo ti fou! Ala ga na lo na mbi ge ngbanga ti nyen?
15 Azo ti fou amanke ge si mbi yeke na bezoin ti tene mbeni zo asara ye ti fou na gbele mbi? Zo ti fou tongaso adoit ti lï na yâ ti da ti mbi?”
Akete tënë na terê ni
^ Wala “ala bungbi na wali pëpe.”
^ Wala “Kpangbala ndo.”
^ Na Hébreu: “lo yeke na maboko ti ala.”
