Apocalypse 14:1-20
14 Na pekoni, mbi bâ ndo, na bâ, Molenge ti taba+ ni ayeke luti na ndö ti Hoto ti Sion,+ lo na azo 144 000+ na terê ti lo; a sû iri ti lo na iri ti Babâ ti lo+ na ndö ti lê ti ala.
2 Mbi mä mbeni toto ti ye so alondo na yayu tongana toto ti angu so asua ngangu nga tongana toto ti bekpa so asungba ngangu. Toto ti ye so mbi mä so ayeke tongana ti azo ti hengo bia so ayeke pika aharpe ti ala ti he na bia ni.
3 Ala yeke he mbeni bia so ayeke tongana fini bia,+ ala he ni na gbele trône nga na gbele acréature osio so ayeke na fini+ nga na gbele a-ancien ni,+ na zo oko alingbi ti hinga bia ni so nzoni pëpe, gï azo 144 000+ so a vo ala na ndö ti sese.
4 A yeke azo so abuba terê ti ala pëpe na dutingo na awali. Biani ala hinga wali pëpe.+ A yeke azo so angbâ gï ti mû peko ti Molenge ti taba ni atâa lo gue na ndo wa.+ A vo lani azo so+ na popo ti azo ti sese tongana akozo li ti ye+ ndali ti Nzapa nga ndali ti Molenge ti taba ni,
5 na a wara tënë ti handa na yanga ti ala pëpe. Sioni ye oko ayeke na terê ti ala pëpe.+
6 Na pekoni, mbi bâ mbeni ange nde so ayeke huru kâ na lê ti nduzu,* lo yeke na mbeni nzoni tënë ti lakue lakue ti fa ni na azo so asara kodro na ndö ti sese, na amara kue, akete mara kue, azo ti ayanga ti kodro kue nga na azo ti kodro kue.+
7 Lo yeke tene na kota go: “Ala kpe mbeto ti Nzapa na ala mû gloire na lo, ndali ti so l’heure ti tene lo fâ ngbanga asi awe,+ tongaso ala voro Lo so asara yayu na sese, ngu-ingo+ na ali ti ngu.”
8 Mbeni ange ni nde, mbeni use ni amû peko ti kozo ni so, lo tene: “Lo tï awe! Babylone, Ngangu gbata+ atï awe,+ lo so lo sara si amara kue anyon vin ti kota nzara* ti lango-sioni* ti lo!”+
9 Mbeni ange ni nde, mbeni ota ni, amû peko ti ala si lo tene na kota go: “Tongana mbeni zo avoro nyama ti ngonda ni+ nga na statue ti lo, na lo wara marque na ndö ti lê ti lo wala na ndö ti maboko ti lo,+
10 lo nga kue lo yeke nyon ande vin ti ngonzo ti Nzapa so a tuku ni na yâ ti kopo ti ngonzo ti Lo,+ vin so a zia mbeni ye tongana ngu dä pëpe ti fâ yâ ti songo ni, na a yeke mû wâ nga na soufre+ ti sara ande pasi na lo na lê ti a-ange so ayeke nzoni-kue nga na lê ti Molenge ti taba ni.
11 Guru ti pasi ti ala ni ayeke ngbâ ti londo lakue lakue nga kpu na kpu;+ bï na lâ ala yeke wu terê ti ala pëpe, so ti tene ala so avoro nyama ti ngonda ni nga na image ti lo, nga ala kue so awara marque ti iri ti lo.+
12 Ge la si a hunda na azo ti be-vulu ti gbu ngangu,+ ala so ayeke bata acommandement ti Nzapa nga so ahule ngangu na terê ti mabe ti+ Jésus.”
13 Mbi mä mbeni go so asara tënë na yayu, atene: “Sû tënë so na mbeti: Ngia ayeke na akuâ so akui beoko na Seigneur+ ti londo na ndembe so ti gue na ni. Yingo ni atene: Biani, zia ala wu terê ti ala na peko ti angangu kua so ala sara, ndali ti so aye so ala sara amû peko ti* ala.”
14 Na pekoni, mbi bâ ndo, na mbi bâ mbeni vuru mbinda, na mbeni zo so akpa molenge ti zo+ aduti na ndö ti mbinda ni. Lo yü couronne ti lor na li ti lo na lo gbu na maboko ti lo mbeni zango zembe ti fango na alê ti kobe.
15 Mbeni ange ni nde alondo na yâ ti akubu ti temple ni lo sigi, lo dekongo na kota go na lo so aduti na ndö ti mbinda ni, lo tene: “To nda ti sara kua na zembe ti mo na mo fâ alê ti kobe, ngbanga ti so l’heure ti fango alê ti kobe ni alingbi awe, ndali ti so alê ti kobe ti sese abe nzoni awe.”+
16 Lo so aduti na ndö ti mbinda ni ayôro zembe ti lo na ndö ti sese, si a fâ alê ti kobe ti sese.
17 Mbeni ange ni nde alondo na yâ ti akubu ti temple ni so ayeke na yayu lo sigi, na lo kue lo yeke na mbeni zango zembe ti fango na alê ti kobe.
18 Na pekoni, mbeni ange ni nde alondo na terê ti gbalaka ni lo sigi, na lo yeke na komandema na ndö ti wâ. Lo iri ndo na kota go na lo so ayeke fade na zango zembe ti fango na alê ti kobe so, lo tene: “To nda ti sara kua na zembe ti mo na mo bungbi ali ti vigne ti sese, ndali ti so alê ti vigne ni abe awe.”+
19 Ange ni so ayôro zembe ti lo na ndö ti sese na lo bungbi vigne ti sese, lo tuku ni na yâ ti kota dû ti sarango na vin ti ngonzo ti Nzapa.+
20 A dö yâ ti dû ti sarango na vin ni na gigi ti gbata ni, na mênë asigi dä amonté juska asi na yanga ti ambarata, nga a sua a mû ndo a si stade 1 600.*
Akete tënë na terê ni
^ Wala “na yâ ti pupu.”
^ Na Grec: pornéïa. Bâ na kete bakari.
^ Wala “ti ngonzo.”
^ Wala “ague legeoko na.”
