Exode 14:1-31
14 Jéhovah atene na Moïse:
2 “Tene na azo ti Israël ti tene ala kiri ala sara camp ti ala lê na lê na Pihahirot, na popo ti Migdol na ngu-ingo so abâ ndo lê na lê na Baal-Zéphon.+ Ala sara camp ti ala lê na lê na Baal-Zéphon, nduru na ngu-ingo ni.
3 Pharaon ayeke tene ande na ndö ti azo ti Israël, lo tene: ‘Ala yeke tambela kirikiri na ye ni aga yembele yembele na ala awe. Ala yeke wara lege ti sigi na yâ ti benyama so pëpe.’
4 Mbi yeke zia si li ti Pharaon akpengba,+ lo yeke tomba peko ti ala ande na mbi yeke wara gloire na futingo Pharaon na aturugu ti lo kue.+ Azo ti Égypte ayeke hinga ande so mbi yeke Jéhovah.”+ Ni la, azo ti Israël asara gï tongana ti so a hunda.
5 Na pekoni, a tene na gbia ti Égypte so azo ti Israël akpe awe. Hio, Pharaon na azo ti kua ti lo achangé bango ndo ti ala na ndö ti azo ti Israël,+ na ala tene: “Nyen la e sara so? E zia lege na azo ti Israël ti sigi na gbe ti ngbâa ngbanga ti nyen?”
6 Tongaso, lo leke apuse ti mbarata ti lo, lo mû azo ti lo na peko ti lo.+
7 Lo mû anzoni puse ti mbarata 600, lo mû nga ambeni puse ti mbarata ti Égypte na azo ti bira na ndö ni oko oko kue.
8 Tongaso, Jéhovah azia si li ti Pharaon gbia ti Égypte akpengba, lo tomba peko ti azo ti Israël, na ngoi so ala yeke sigi sân mbeto.*+
9 Azo ti Égypte amû apuse ti mbarata kue ti Pharaon, azo ti kpengo na ambarata ni nga na aturugu ti lo, ala tomba peko ti azo ti Israël+ na ala ga nduru ti wara ala na ngoi so ala yeke sara camp na terê ti ngu-ingo ni, nduru na Pihahirot, so abâ ndo lê na lê na Baal-Zéphon.
10 Tongana Pharaon aga nduru na ala, azo ti Israël ayô lê ti ala na ala bâ azo ti Égypte so ayeke tomba peko ti ala. Mbeto agbu azo ti Israël ngangu na ala komanse ti toto na Jéhovah.+
11 Ala tene na Moïse: “Ndo ti lungo kuâ ayeke na Égypte pëpe si mo mû e mo ga na e ge ti kui na benyama so?+ Mo sigi na e na Égypte ngbanga ti nyen?
12 Lani so e de na Égypte e tene na mo nyen? e tene, ‘Mo zia e kpô e sara kua na azo ti Égypte.’ A nzere na e ti sara kua na azo ti Égypte ahon ti tene e kui na benyama so.”+
13 Moïse atene na azo ni: “Ala sara mbeto pëpe.+ Ala luti kpô na ala bâ salut so Jéhovah ayeke mû na ala laso.+ Azo ti Égypte so ala bâ ala laso so, ala yeke kiri ti bâ ala pëpe, ala yeke kiri ti bâ ala encore ape.+
14 Jéhovah wani la ayeke tiri ande ndali ti ala,+ me ti ala, ala yeke duti ande kpô.”
15 Jéhovah atene na Moïse: “Mo ngbâ ti toto na mbi ngbanga ti nyen? Tene na azo ti Israël ala londo ala hon.
16 Âdu ti mo, mo mû keke ti mo na nduzu mo yôro maboko ti mo na ndö ti ngu-ingo ni si mo kangbi yâ ni use, tongaso si azo ti Israël ahon na popo ni na ndö ti kuru sese.
17 Ti mbi, mbi yeke zia si li ti azo ti Égypte akpengba, tongaso si ala lï na peko ti azo ti Israël, na mbi yeke wara gloire na futingo Pharaon, aturugu ti lo kue, apuse ti mbarata ti lo kue ti bira na azo ti kpengo na ambarata ti lo kue.+
18 Azo ti Égypte ayeke hinga so mbi yeke Jéhovah, na ngoi so mbi yeke wara gloire na futingo Pharaon, apuse ti mbarata ti lo ti bira na azo ti kpengo na ambarata ti lo.”+
19 Tongaso, ange ti tâ Nzapa+ so ayeke gue na devant ti camp ti azo ti Israël alondo akiri na peko ti ala, na mbinda ni so ayeke na devant ti ala akiri aluti na peko ti ala.+
20 Mbinda ni ayeke na popo ti camp ti azo ti Égypte na camp ti azo ti Israël.+ Na mbeni mbage, ndo avuko pitipiti. Na mbeni mbage, lumière asu na bï.+ Tongaso na bï ni kue, camp so ndo avuko pitipiti dä alingbi ti ga nduru na camp so lumière asu dä so pëpe.
21 Moïse ayôro maboko ti lo na ndö ti ngu-ingo ni.+ Jéhovah asara si mbeni pupu alondo na mbage ti est aya ngangu na bï ni kue, na yâ ti ngu ni azi yeke yeke si akangbi use,+ na sese ti gbe ti ngu ni aga kuru sese.+
22 Tongaso, azo ti Israël ahon na popo ti ngu-ingo ni na ndö ti kuru sese.+ Ngu ni aga tongana mbeni mur na mbage ti maboko ti ala ti koli nga na mbage ti maboko ti ala ti wali.+
23 Azo ti Égypte atomba peko ti ala. Ambarata ti Pharaon kue, ambarata ti bira ti lo nga na azo ti kpengo na ambarata ti lo alï na peko ti ala na popo ti ngu-ingo ni.+
24 Na kota ndapre,* na yâ ti wâ nga na mbinda ni,+ Jéhovah abâ camp ti azo ti Égypte na lo bi wusuwusu na yâ ti camp ti ala.
25 Lo zi agere ti apuse ti mbarata ti ala, ye so asara si ala kpe na ni gbä. Azo ti Égypte atene: “Zia e kpe, e si nduru na azo ti Israël pëpe, ngbanga ti so a yeke ndali ti ala si Jéhovah ayeke tiri na azo ti Égypte so.”+
26 Na pekoni, Jéhovah atene na Moïse: “Yôro maboko ti mo na ndö ti ngu-ingo ni, si ngu ni akiri na ndö ti azo ti Égypte, na ndö ti apuse ti bira ti ala nga na ndö ti azo ti kpengo na apuse ti mbarata ti ala ni.”
27 Hio Moïse ayôro maboko ti lo na ndö ti ngu-ingo ni, nduru na ndapre ngu ni ato nda ti kiri na place ti lo. So azo ti Égypte ayeke kpe ngu ni, Jéhovah abi ala na yâ ti ngu ni.+
28 Ngu ni akiri amene apuse ti bira na azo ti kpengo na ambarata ni nga na aturugu ti Pharaon kue so alï na yâ ti ngu-ingo ni na peko ti azo ti Israël.+ Zo oko na popo ti ala angbâ na fini pëpe.+
29 Azo ti Israël atambela na ndö ti kuru sese na yâ ti ngu ni,+ ngu ni aga tongana mbeni mur na mbage ti maboko ti ala ti koli nga na mbage ti maboko ti ala ti wali.+
30 Na lango ni so, Jéhovah azi Israël na maboko ti azo ti Égypte,+ Israël abâ kuâ ti azo ti Égypte na yanga ti ngu-ingo ni.
31 Israël abâ nga kota ngangu* ti Jéhovah na ndö ti azo ti Égypte. Azo ni asara mbeto ti Jéhovah na ala mä na bê na Jéhovah nga na Moïse wakua ti lo.+
Akete tënë na terê ni
^ Na Hébreu: “maboko ti ala na nduzu.”
^ So ti tene ti londo na 2:00 ti si na 6:00 ti ndapre tongaso.
^ Na Hébreu: “maboko.”
