Exode 8:1-32
8 Na pekoni, Jéhovah atene na Moïse: “Gue na gbele Pharaon, mo tene na lo: ‘Jéhovah atene: “Zia azo ti mbi ague tongaso si ala lingbi ti sara na mbi.+
2 Me tongana mo ngbâ ti ke ti zia lege na ala ti gue, mbi yeke ga ande na adale na yâ ti kodro ti mo kue.+
3 Ngu ti Nil ayeke si singo na adale, ala yeke monté ti lï na yâ ti da ti mo, na yâ ti chambre ti mo, na ndö ti gbogbo ti mo nga ala yeke lï na yâ ti ada ti azo ti kua ti mo, ala yeke ga na ndö ti azo ti mo, ala yeke lï na yâ ti afour ti mo nga na yâ ti aye* so a yeke sara mapa na yâ ni.+
4 Adale ayeke monté ti ga na ndö ti mo, na ndö ti azo ti mo nga na ndö ti azo ti kua ti mo.”’”
5 Na pekoni, Jéhovah atene na Moïse: “Tene na Aaron: ‘Mû keke ti mo, mo yôro maboko ti mo na ndö ti angu so ayeke sua, na ndö ti acanal ti Nil nga na ndö ti angu so ayeke na place so asosongo asigi dä, mo sara si adale aga na yâ ti kodro ti Égypte.’”
6 Tongaso, Aaron ayôro maboko ti lo na ndö ti angu ti Égypte, na adale akomanse ti monté amû yâ ti kodro ti Égypte kue.
7 Me aprêtre so ayeke sara magie asara nga mara ti oko ye ni so na lege ti aye ti magie ti ala na ala sara si adale amonté aga na ndö ti kodro ti Égypte.+
8 Na pekoni, Pharaon airi Moïse na Aaron, lo tene: “Ala voro yanga na Jéhovah ti zi adale ni yongoro na terê ti mbi na azo ti mbi,+ ndali ti so mbi ye ti zia lege na azo ni ti gue si ala mû sandaga na Jéhovah.”
9 Tongaso, Moïse atene na Pharaon: “A yeke na mo ti fa na mbi lawa la mo ye mbi voro yanga na Nzapa ti tene a zi adale ni yongoro na terê ti mo, yongoro na terê ti azo ti kua ti mo, na azo ti kodro ti mo nga na ada ti mo. Gï na yâ ti Ngu ti Nil la adale ni ayeke ngbâ ande dä.”
10 Pharaon atene: “Kekereke.” Moïse atene: “Ye ni ayeke si ande tongana ti so mo tene, si mo hinga so mbeni zo ti lingbi na Jéhovah Nzapa ti e ayeke dä pëpe.+
11 Fade adale ni ayeke hon yongoro na mo, nga na ada ti mo, na azo ti kua ti mo na azo ti kodro ti mo. Gï na yâ ti Ngu ti Nil la adale ni ayeke ngbâ ande dä.”+
12 Tongaso, Moïse na Aaron asigi na gbele Pharaon, na Moïse adema terê ti lo na Jéhovah ndali ti adale so lo ga na ni na ndö ti Pharaon.+
13 Jéhovah asara tongana ti so Moïse ahunda, na adale ni akui na yâ ti ada, na yâ ti alacour nga na yâ ti angonda.
14 Azo ti Égypte adö ala na ndö ti terê gbani gbani, yâ ti kodro ni kue afun sioni.
15 Tongana Pharaon abâ so pupu aya ala awe, lo kiri lo sara kpengba-li+ nga lo ke ti mä ala gï tongana ti so Jéhovah atene lani.
16 Jéhovah atene na Moïse: “Tene na Aaron: ‘Yôro keke ti mo na mo pika fuku ti sese, a yeke ga ande angungu ti tengo zo na yâ ti kodro ti Égypte kue.’”
17 Ala sara tongaso. Aaron ayôro keke ti lo, lo pika fuku ti sese, na angungu aga na ndö ti azo nga na anyama. Fuku ti sese ni kue aga angungu na yâ ti kodro ti Égypte kue.+
18 Aprêtre so ayeke sara magie atara ti sara mara ye ni so, na lege ti magie ti ala,+ ala tara ti sara ti tene angungu ti tengo zo asigi, me ala sara gbä. Angungu ni aga na ndö ti azo na anyama.
19 Tongaso, aprêtre so ayeke sara magie atene na Pharaon: “So li ti maboko ti Nzapa la!”+ Me li ti Pharaon angbâ gï ti kpengba, lo mä ala pëpe, gï tongana ti so Jéhovah atene lani.
20 Na pekoni, Jéhovah atene na Moïse: “Londo na yanga ti ndapre, mo gue mo luti na gbele Pharaon. Bâ! Lo yeke sigi ti gue na ngu! Mo tene na lo: ‘Jéhovah atene: “Zia azo ti mbi ague tongaso si ala sara na mbi.
21 Me tongana mo zia lege na azo ti mbi ti gue pëpe, mbi yeke tokua akota ngungu ti tengo zo, ala yeke ga na ndö ti mo, na ndö ti azo ti kua ti mo, na ndö ti azo ti kodro ti mo nga na yâ ti ada ti mo. Ada ti Égypte ayeke si singo na akota ngungu so, ala yeke mû lê ti sese ni kue.
22 Na lango ni so, mbi yeke zia kodro ti Goshen nde, kodro so azo ti mbi alango dä. Angungu ni so ayeke si kâ pëpe,+ mo yeke hinga so mbi Jéhovah mbi yeke na yâ ti kodro ni.+
23 Mbi yeke sara si kangbi aduti na popo ti azo ti mbi na azo ti mo. Ye ti kpene so ayeke si ande kekereke.”’”
24 Jéhovah asara ye so lo tene so, gbâ ti akota ngungu ti tengo zo alï na yâ ti da ti Pharaon, na yâ ti ada ti azo ti kua ti lo nga na yâ ti kodro ti Égypte kue.+ Akota ngungu ni abuba kodro ni.+
25 Mo ye ti bâ, Pharaon airi Moïse na Aaron na lo tene: “Ala gue, ala mû sandaga na Nzapa ti ala na yâ ti kodro ni.”
26 Me Moïse atene: “Ti sara tongaso a yeke na lege ni pëpe, ngbanga ti so ye so e yeke mû na sandaga na Nzapa ti e alingbi ti duti sioni mingi na lê ti azo ti Égypte.+ Tongana e mû na sandaga mbeni ye so ayeke sioni mingi na lê ti azo ti Égypte, fade ala bo e na tênë ape?
27 E yeke gue na mbeni tambela ti lango ota na yâ ti benyama. Kâ, e yeke mû sandaga na Jéhovah Nzapa ti e tongana ti so lo tene na e.”+
28 Pharaon atene: “Mbi yeke zia ala ti gue ti mû sandaga na Jéhovah Nzapa ti ala na benyama. Me, ala gue ayo mingi pëpe. Nga, ala voro yanga na Nzapa ti ala ndali ti mbi.”+
29 Moïse atene: “Mbi yeke sigi na gbele mo la, mbi yeke voro yanga na Jéhovah. Kekereke akota ngungu ni ayeke hon yongoro na terê ti Pharaon, na azo ti kua ti lo nga na azo ti kodro ti lo. Me a lingbi Pharaon azia lege ti handango e,* si lo ke ti zia azo ni ti gue ti mû sandaga na Jéhovah.”+
30 Moïse asigi na gbele Pharaon, lo voro yanga na Jéhovah.+
31 Tongaso, Jéhovah asara ye alingbi na tënë ti yanga ti Moïse, akota ngungu ni ahon yongoro na terê ti Pharaon na azo ti kua ti lo nga na terê ti azo ti kodro ti lo. Kota ngungu oko tongaso angbâ pëpe.
32 Me Pharaon akiri asara kpengba-li, lo zia lege pëpe na azo ti Israël ti gue.
