Zo-ti-fa-tene 9:1-18
9 Tongaso, mbi zia bê ti mbi na ndö ti aye so kue na mbi bâ so zo ti mbilimbili, zo ti ndara nga na akusala ti ala ayeke na yâ ti maboko ti tâ Nzapa.+ Tënë ti yengo terê nga na kengo terê so ayeke na popo ti azo ti ândö, azo ahinga ye dä pëpe.
2 Gï oko ye la asi na azo kue,+ zo ti mbilimbili na zo ti sioni;+ nzoni zo, zo so aga sioni pëpe nga na zo so aga sioni awe; azo so ayeke mû asandaga nga azo so ayeke mû asandaga pëpe. Nzoni zo ayeke legeoko na wasiokpari; zo so adeba yanga ti lo ayeke legeoko na zo so ayeke deba yanga ti lo kirikiri pëpe.
3 Mbeni ye so ayeke si na gbe ti lâ so amû vundu na zo ayeke so: So oko ye la ayeke si na azo kue,+ bê ti azo asi singo na ye ti sioni; nga ye ti buba ayeke na yâ ti bê ti ala na yâ ti gigi ti ala kue, na pekoni ala kui.*
4 Zo kue so ayeke na fini alingbi ti zia bê ti lo ti ku mbeni ye, ndali ti so mbo so ayeke na fini ayeke nzoni ahon bamara so akui awe.+
5 Azo so angbâ na fini ahinga so mbeni lâ ala yeke kui,+ me azo so akui awe ahinga ti ala ye oko pëpe,+ nga ala yeke na mbeni futa encore ape, ndali ti so azo agirisa ye kue so adabe ti ala na ala.+
6 Nga, ndoye ti ala, kengo so ala ke na zo nga na mbanda so ala sara ayeke dä encore ape; ala yeke mû mbage encore ape na yâ ti ye so azo ayeke sara na gbe ti lâ.+
7 Gue mo te kobe ti mo na nzerengo terê nga mo nyon vin ti mo na ngia na bê,+ ndali ti so akusala ti mo azia ngia na bê ti tâ Nzapa awe.+
8 Zia si mo yü vuru bongo lakue,* nga girisa ti zia mafuta na li ti mo pëpe.+
9 Na yâ ti angoi kue so Nzapa amû na mo na gbe ti lâ, wara ngia na yâ ti gigi ti mo so asi singo na asenge senge ye, mo na wali ti mo so mo ye lo mingi,+ ndali ti so a yeke ye so a mû na mo* na yâ ti gigi ti mo nga na yâ ti ngangu kua so mo bâ pasi ti sara na gbe ti lâ.+
10 Ye kue so maboko ti mo awara ti sara, sara ni na ngangu ti mo kue, ndali ti so, na yâ ti Dû ti kuâ* so mo yeke gue dä, kusala, lekengo kapa ti sara ambeni ye, hingango ye wala ndara ayeke dä pëpe.+
11 Mbi bâ nga mbeni ye nde so ayeke si na gbe ti lâ: Mbi bâ so azo so akpe loro mingi la ayeke sö benda lakue pëpe, wala awangangu la ayeke sö benda lakue na yâ ti bira pëpe,+ wala azo ti ndara la ayeke wara kobe ti te lakue pëpe; a yeke nga azo so ahinga mbeti la ayeke wara mosoro lakue pëpe,+ wala azo so ahinga ye la ye ti ala ayeke ga lakue nzoni pëpe,+ ndali ti so ye so ala ku terê ti ala na ni pëpe alingbi ti si na ala kue na ngoi kue.
12 Zo ahinga pëpe ngoi so ye ayeke wara lo.+ Legeoko tongana ti so gbanda agbu susu, nga kûkû agbu andeke, ye ti ngangu ayeke gbu amolenge ti azo tongana gbanda na ngoi so atï na ndö ti ala gï gbagburu tongaso.
13 Mbi bâ nga ye so na ndö ti ndara na gbe ti lâ, na a pika bê ti mbi mingi:
14 Mbeni kete gbata ayeke dä so azo ti yâ ni ayeke mingi pëpe, na mbeni ngangu gbia aga ti sara bira na ni, lo ngoro terê ni, lo mû sese lo monté ni ti tene aga kota koto na terê ni.
15 Na yâ ti gbata ni mbeni wayere so ayeke na ndara ayeke dä, na lo sö gbata ni grâce na ndara ti lo. Me zo oko adabe ti lo na wayere so pëpe.+
16 Mbi tene na bê ti mbi: ‘Ndara ayeke nzoni ahon ngangu;+ ye oko, a bâ ndara ti wayere tongana mbumbuse ye, nga azo ayeke sara ye alingbi na atënë ti lo pëpe.’+
17 A yeke nzoni ti mä atënë so zo ti ndara atene yeke ahon ti mä dekongo ti zo so ayeke komande azo ti buba.
18 Ndara ayeke nzoni ahon aye ti sarango na bira, me gï wasiokpari oko apeut ti futi gbâ ti anzoni ye.+
Akete tënë na terê ni
^ Na Hébreu: “na peko ti ye so, ala gue na peko ti akuâ.”
^ So ti tene bongo so couleur ni aza zango so afa ngia ti bê ti zo, me bongo ti vundu pëpe.
^ Wala “part ti mo.”
^ Wala “Shéol,” so ti tene dû ti kuâ so azo kue ayeke gue dä. Bâ na kete bakari.
