AKOZO Chrétien asara lani kue ti ‘fa nzoni tënë ti Royaume’ na azo mingi (Mat. 24:14). Ambeni ague même na akodro-wande ti fa tënë. Na tapande, bazengele Paul ague na ndo so kodro ti Turquie ayeke dä laso, na lo fa tënë kâ mingi na ngoi ti avoyage ti lo ti missionnaire. * Ngu 2000 tongaso na pekoni, na ngu 2014, a kiri a leke mbeni kapa ti fango tënë so ayeke nde na Turquie. A leke kapa so ngbanga ti nyen? Azo wa la amû mbage dä?

Wungo ti awafango tënë ti Turquie ahon 2 800, me wungo ti azo ti kodro ni kue ayeke kutu 79. So aye ti fa so wafango tënë oko ayeke fa tënë na azo nduru na 28 000. Tongana ti so mo lingbi ti pensé, awafango tënë ti kodro ni afa tënë gï na kete wungo ti azo. Nda ti kapa ti fango tënë so a leke ni so ayeke ti sara kue ti fa tënë na azo mingi na yâ ti kete ngoi. Aita 550 so ayeke tene yanga ti Turque so ala yeke na yâ ti ambeni kodro nde ague na Turquie ti fa tënë legeoko na aita ti Turquie na ngoi ti kapa ti fango tënë so. Ye ti peko ni ayeke so wa?

Fango tënë amû yâ ti kodro ni. Aita ti mbeni congrégation na Istanbul atene: “Tongana azo abâ e, ala hunda e, ala tene: ‘Ala yeke sara mbeni kota bungbi so ayeke nde? E bâ aTémoin ti Jéhovah na ndo kue!’” Aita ti mbeni congrégation na gbata ti Izmir atene: “Mbeni koli so asara kua na ndo so ataxi ayeke luti dä ahunda mbeni ancien ti ndo ni, atene: ‘Nyen la apassé si ala yeke fa tënë mingi tongaso so?’” Biani, azo abâ so aita ayeke sara kapa ti fango tënë so ayeke nde.

Fango tënë ni anzere mingi na aita so aga gango. Steffen, so alondo na Danemark, atene: “Lâ oko oko, mbi wara lege ti fa tënë na azo so ade amä tënë ti Jéhovah lâ oko ape. Mbi bâ so mbi yeke sara biani si azo ahinga iri ti Jéhovah.” Jean-David, so alondo na France, atene: “E fa tënë angbonga mingi gï na ndö ti mbeni lege oko. Fango tënë ni ayeke pendere mingi! Mingi ti azo ni ahinga aTémoin ti Jéhovah ape. Na mingi ti ayanga-da, e wara lege ti sara lisoro na azo, ti fa na ala mbeni vidéo ti e nga ti zia ambeti na ala.”

Aita 550 so amû mbage na yâ ti kapa ti fango tënë ni azia ambeti 60 000 tongaso na azo gï na yâ ti yenga  use. Biani, kapa ni asara si fango tënë amû yâ ti kodro ni.

Aita akiri ayapu na kua ti fango tënë. Kapa ti fango tënë so ayeke nde apusu aita ti ndo ni ti fa tënë mingi. Aita mingi akomanse ti pensé ti mû kua ti ngoi kue. Ti tâ tënë ni, aita 82 amû kua ti pionnier permanent na Turquie na yâ ti anze 12 so aga na peko ti kapa ni.

Aita so aga gango afa tongana nyen la kapa ni amû maboko na ala na yâ ti kua ti ala ti fango tënë, même na peko ti so ala kiri na kodro ti ala. Şirin, mbeni ita-wali so alondo na Allemagne, atene: “A yeke ngangu ape na aita ti Turquie ti fa tënë na alege kue so azi. Kamene ayeke sara ka mbi mingi ti fa tënë na alege kue so azi. Me kapa so, tapande ti aita ti Turquie nga na asambela mingi so mbi sara asara si mbi wara lege ti sara ye so akara mbi kozo. Mbi fa tënë nga mbi zia atract na azo même na yâ ti mbeni métro (wala, mbeni train so ayeke hon ti lo ka gï na gbe ti sese). Laso, kamene asara mbi mingi encore ape.”

Johannes, so alondo na Allemagne, atene: “Mbi manda aye so amû maboko na mbi na yâ ti kua ti mbi ti fango tënë. Aita ti Turquie aye biani ti fa tënë na azo kue. Lakue tongana lege azi, ala yeke fa tënë. Mbi mû desizion ti sara tongana ala na ngoi so mbi kiri na Allemagne. Na fadeso, mbi yeke fa tënë na azo mingi ahon ti kozo.”

Zeynep, so alondo na France, atene: “Kapa so asara ye mingi na ndö ti kua ti mbi ti fango tënë. A mû maboko na mbi ti sara mbeto ape nga ti sara confiance mingi na Jéhovah.”

Awafango tënë aga nduru mingi na mba. Aita ayeke girisa ape ndoye nga na beoko so ayeke na popo ti aita so alondo na akodro nde nde. Jean-David, so e sara tënë ti lo fade, atene: “Fason so aita ayamba na e anzere na e mingi.” Lo kiri lo tene: “Ala yamba e tongana akamarade ti ala nga tongana azo ti sewa ti ala. Ala zi yanga-da ti ala na e. Mbi hinga lani so e yeke na yâ ti sewa ti aita so ayeke na yâ ti dunia kue; fani mingi mbi diko ni na yâ ti ambeti ti e. Me ti fadeso, mbi bâ ni tâ na lê ti mbi. Mbi pika même kate ti mbi mingi so mbi yeke zo ti Jéhovah, na mbi mû merci na lo ndali ti pendere pasa so.”

 Claire, so alondo na France, atene: “Atâa e londo na Danemark, France, Allemagne wala Turquie, e kue e yeke sewa oko. A yeke mo bâ mo tene Nzapa amû mbeni kota chiffon lo effacé na akatikati ti akodro kue.”

Stéphanie, so alondo na France, atene: “Kapa ti fango tënë so ayeke nde afa na e so ye so asara si e duti beoko ayeke pëpe angobo wala yanga ti kodro, me a yeke yengo so e kue e ye na Jéhovah.”

Aita mingi so aga gango so amû mbage na yâ ti kapa ni akomanse ti pensé ti gue na Turquie ti mû maboko na kota kua so angbâ ti tene a sara ni kâ. Aita mingi ague kâ awe. A bâ na nene ni mingi aita so ague na ndo so a bezoin awafango tënë mingi dä.

Bâ, na tapande, mbeni kete groupe ti awafango tënë 25 so ayo na mbeni congrégation. Teti angu mingi, gï ancien oko la ayeke na yâ ni. Tara ti bâ kota ngia ti awafango tënë ni na ngu 2015 na ngoi so awafango tënë omene so alondo na Allemagne nga na Pays-Bas aga ti mû maboko na ala.

Awafango tënë so aga ti fa tënë na Turquie aninga kete atene nyen na ndö ti gigi ti ala kâ? Tâ tënë, na ambeni ngoi, ala tingbi na akpale, me awafango tënë so awara anzoni ye mingi. Bâ tënë so ambeni atene:

Federico, mbeni ita-koli so alondo na Espagne, so asara mariage awe na so ayeke na ngu 40 na ndö ni, atene: “So mbi yeke na aye mingi ape ti tene amû ngoi ti mbi, a sara si mbi yeke na liberté, na a mû maboko na mbi ti zia li ti mbi gï na ndö ti aye so ayeke akota ye.” Eskê lo yeke wa nga ambeni zo ti sara mara ti kua ni so? Lo tene: “Biani, mbi sara ni. Tongana mo gue na kodro-wande ti mû maboko na azo ti hinga Jéhovah, andâ mo zia terê ti mo na yâ ti maboko ti lo. Mo yeke bâ biani so Jéhovah ayeke bâ lege ti mo ahon ti kozo.”

Rudy, mbeni ita-koli so alondo na Pays-Bas, so asara mariage awe na so ayeke nduru na ngu 60, atene: “A nzere na e mingi ti sara kua na ndo so a bezoin  awafango tënë dä mingi nga ti fa tâ tënë na azo mingi so ade amä ni lâ oko ape. Ti bâ ngia so azo ayeke na ni na ngoi so ala yeda na tâ tënë amû na e ngia mingi.”

Sascha, mbeni ita-koli so alondo na Allemagne, so asara mariage awe na so ayeke na ngu 40 na ndö ni, atene: “Lakue tongana mbi fa tënë, mbi yeke wara azo so kozo ti tene ala mä tâ tënë la. Ti mû lege na mara ti azo so ti hinga Jéhovah amû ngia na mbi mingi.”

Atsuko, mbeni ita-wali so alondo na Japon, so asara mariage awe na so ayeke na ngu 35 tongaso, atene: “Giriri, mbi ye ti tene Harmaguédon aga hio. Me ngbene ye so mbi ga na Turquie, mbi mû merci na Jéhovah so lo ngbâ lakue ti kanga bê. Lakue tongana mbi bâ tongana nyen la Jéhovah ayeke fa lege na bungbi ti lo, mbi ye ti ga nduru mingi na lo.”

Alisa, mbeni ita-wali so alondo na Russie na so ayeke na ngu 30 tongaso, atene: “Ti sara na Jéhovah tongaso amû maboko na mbi ti tara anzoni ye kue so lo sara.” (Ps. 34:8). Lo kiri lo tene: “Jéhovah ayeke gï pëpe Babâ ti mbi me lo yeke nga kota Kamarade ti mbi, zo so mbi hinga lo nzoni mingi na angoi so dutingo ti mbi achangé. Mbi passé anzoni ngoi ge mingi, anzoni ye asi na mbi mingi nga mbi wara atufa mingi.”

Kapa ti fango tënë so ayeke nde, so a sara lani na Turquie, asara si gbâ ti azo amä nzoni tënë. Ye oko, ando so ade a fa tënë dä ape angbâ mingi. Lâ oko oko, awafango tënë so ague na Turquie ayeke wara azo so ade amä tënë ti Jéhovah lâ oko ape. Mo nga kue mo ye ti fa tënë na mara ti ndo so? Tongana a yeke tongaso, e wa mo ti ‘yô lê ti mo na nduzu na ti bâ ayaka ni: akobe ni abe awe ti tene a ko ni.’ (Jean 4:35). Mo lingbi ti mû maboko ti fa tënë na ando so ayaka “abe awe ti tene a ko ni”? Tongana a yeke tongaso, komanse ti sara ambeni ye fadeso so ayeke mû maboko na mo ti sara ni. Kite ayeke dä ape so ti mû mbage mingi ti fa tënë “juska na ambage ti sese so ayeke tâ yongoro” ayeke ga na mo atufa so mara ni ayeke dä ape.—Kus. 1:8.