“Ala sara ye na nzoni bê na azo nga na ambo ti mbi. Mbeni lâ, Elaine, so ayeke luti na terê ti mbeni présentoir, amû ambeni ye ti tengo na ambo ti mbi use. Na pekoni, lakue tongana e ga nduru na terê ti présentoir ni, ambo ni aye ti gue na terê ti aTémoin ni ti wara mbeni kete ye ti tengo.

Ambeni nze ahon. A nzere na ambo ni ti wara aye ti tengo ni nga a nzere na mbi ti sara anduru lisoro na aTémoin ni. Me mbi ye lani ti sara lisoro na ala ngbii ape. Mbi hon lani ngu 70 awe, nga mbi hinga nzoni ape aye so ala mä na bê na ni. So a-eglize mingi azia vundu na bê ti mbi, mbi pensé lani so a yeke nzoni mingi ti tene mbi manda Bible mbi wani.

“Na ngoi ni so, mbi bâ ambeni Témoin nde na ambage nde nde ti gbata ni, ala yeke luti na terê ti présentoir ti ala. Ala nga kue ayeke sara ye lakue na nzoni bê na azo. Ala yeke kiri tënë na ahunda ti mbi lakue na lege ti Bible, na ye so asara si mbi yeke na confiance mingi na ala.

“Mbeni lâ, Elaine ahunda mbi, atene: ‘Eskê mo yeda so anyama ayeke mbeni cadeau so Nzapa amû na azo?’ Mbi tene: ‘En, mbi yeda.’ Na pekoni, Elaine afa na mbi Ésaïe 11:6-9. Ti londo na ngoi ni so ti ga na ni, mbi ye ti hinga ye na ndö ti Bible, me ade mbi yeda ape ti diko mbeti ti aTémoin.

“Na yâ ti alango so aga na pekoni, mbi na Elaine na koli ti lo Brent e sara ambeni nduru lisoro so ayeke pendere mingi. Ala wa mbi ti diko mbeti ti Matthieu ti si na Kusala ti hinga ye so aye ti tene ti sara ye tongana Christ. Tongaso mbi diko ni. A ninga na pekoni ape, mbi yeda ti tene Brent na Elaine amanda Bible na mbi. A yeke lani na milieu ti ngu 2016.

“Mbi yeke ku lani kungo ti manda Bible yenga oko oko nga ti gue na abungbi na Da ti Royaume. Mbi yeke lani na ngia mingi ti hinga aye so Bible atene biani. Ahon ngu oko na pekoni, mbi wara batême mbi ga Témoin. Mbi yeke fadeso na ngu 79, na mbi kiri singila mingi na Nzapa so mbi wara tâ bungbi ti vorongo Nzapa. Jéhovah asara tufa na ndö ti mbi na lege so lo aidé mbi ti ga na yâ ti sewa ti awakua ti lo so ayeke na yâ ti dunia kue.”