TONGANA na yâ ti angu so ahon mo si na kete zoa ti Sangir Besar so ayeke na Indonésie awe, peut-être mo bâ aita-wali ota na yanga ti ngu ni. A hinga ala mingi na yâ ti zoa ni ndali ti kua ti fango tënë ti ala, ala yeke aidé azo ti mä yâ ti atënë ti Bible. Me na ngoi ni so, ala yeke sara mbeni kua so ayeke tâ nde mingi.

Kozoni, ala yeke gue na yâ ti ngu ni ala yô anengo tênë ala sigi na ni na yanga ti ngu ni. Ambeni tênë ni akono tongana ballon ti football. Na pekoni, awali so ayeke duti na ndö ti mbeni kete banc ti keke, ala yeke pika yâ ti atênë ni na marteau kete kete ahon para ti kondo. Na pekoni, ala zia akete kete tênë so na yâ ti aseau ti plastique ala monté na ni juska na ndo so ala lango dä. Na pekoni, ala yeke zia atênë ni na yâ ti akota sac so ayeke zia ni na yâ ti a-oto so ayeke gue na ni ti leke na lege.

Hulda ayeke na popo ti aita-wali so. Dutingo ti lo amû lege na lo ti mû ngoi mingi ti sara kua so ahon amba ti lo. Mingi ni, lo yeke mû ka pata ni kue ti vo na aye so sewa ti lo abezoin ni. Me ti so ni so, lo ye nga ti mû mbage ti nginza ni ti vo na mbeni ye nde. Lo ye lani ti wara tablette tongaso si lo peut ti sara kua na application JW Library^®. Hulda ahinga lani so avidéo nga na ambeni ye so ayeke na yâ ti application ni ayeke aidé lo ti fa tënë na azo, ti manda Bible nga ti mä yâ ni.

Na yâ ti nze oko na ndambo, lakue na ndapre, Hulda ayeke sara kua l’heure use ti pika yâ ti atênë so gbani ti tene a zia na yâ ti mbeni kete oto asi yâ ni. Na nda ni, lo wara nginza so alingbi ti vo na tablette ni.

Hulda atene: “Atâa so mbi fatigué nga yâ ti terê ti mbi ason ndali ti pikango atênë ni, hio mbi girisa songo terê ni na ngoi so mbi wara lege ti sara kua na fini tablette ni, so a-aidé mbi ti fa tënë nzoni nga ti leke abungbi hio mingi.” Lo tene nga so tablette ni a-aidé lo ti connecté na tanga ti aita ti congrégation ti sara abungbi nga ti fa tënë na ngoi so COVID-19 akomanse. E yeke na ngia legeoko na Hulda so awara ye so lo ye ti wara.