BABÂ ti John awara batême tongana Témoin ti Jéhovah na yâ ti mbeni kete gbata ti Gujerat, na Inde, na hunzingo ti angu 1950. Me John, aita ti lo ti koli na ti wali oku nga na mama ti ala ayeke aCatholique na ala ye tënë ti bungbi ti ala mingi. Ni la ala ye tënë ti ye so babâ ti ala amä na bê na ni ape.

Mbeni lâ, babâ ti John atokua lo ti gue na mbeni enveloppe na mbeni kamarade ti lo na yâ ti congrégation. Me na lango ni so na ndapre, John afâ li ti maboko ti lo na kä ngangu na ngoi so lo yeke zi yanga ti mbeni tûku. Ye oko, lo ye ti mä yanga ti babâ ti lo, tongaso atâa so mênë angbâ ti yuru na lê ti kä ni, lo kanga ni na mbeni yanga ti bongo na lo gue na enveloppe ni.

Tongana John asi na ndo ni, wali ti kamarade ti babâ ti lo ni, so lo kue lo yeke Témoin ti Jéhovah, amû enveloppe ni. Lo bâ so kä ayeke na maboko ti John na lo hunda ti soigné ni. Lo sukula kä ni na mbeni yorö na lo kanga ni. Na pekoni, lo sara mbeni wâ ti thé na John. Na ngoi so kue, lo yeke sara tënë na John na ndö ti Bible na nzoni bê.

Ndali ti so wali ni asara ye na nzoni bê, bango ndo ti John na ndö ti aTémoin akomanse ti changé. Tongaso, lo hunda lo tënë use na ndö ti atënë ti mabe ti aTémoin ti Jéhovah so ague nde na ti Eglize Catholique. Lo hunda wala Jésus ayeke Nzapa nga wala a yeke na lege ni ti tene aChrétien asambela Marie. Ita-wali ni ahinga yanga ti Gujerat na lo kiri tënë na John na yanga ti kodro ti John. Lo fa na lo akiringo tënë ni na yâ ti Bible na lo mû na lo brochure “Cette bonne nouvelle du Royaume.”

Na pekoni, na ngoi so John adiko brochure ni, lo hinga so ye so lo diko ayeke tâ tënë. Lo gue na ndo ti prêtre ti lo na lo hunda atënë use so na lo. Ngonzo ahon ndö ti prêtre ni, lo bi Bible na John lo dekongo, lo tene: “Mo ga Satan awe! Fa na mbi na ndo wa la na yâ ti Bible a tene Jésus ayeke Nzapa ape. Fa na mbi na ndo wa la na yâ ti Bible a tene a lingbi mo voro Marie ape. Fa ni na mbi.” Li ti John akpe kue na bango sarango ye ti prêtre ni na lo tene na lo: “Gere ti mbi ayeke si encore na mbeni eglize Catholique ape.” Na lo kiri lo gue na mbeni eglize Catholique lâ oko ape.

A-Témoin ato nda ti manda Bible na John, lo yeda na tâ tënë na lo komanse ti sara na Jéhovah. Ambeni ngoi na pekoni, azo mingi na yâ ti fami ti lo asara legeoko tongana ti lo. Laso, na peko ti ngu 60 tongaso, place ti kä ni so angbâ na li ti maboko ti John adabe ti lo na ye so a sara na lo na nzoni bê so apusu lo ti voro Jéhovah na yâ ti angu mingi.—2 aCor. 6:4, 6.