MAMA ti mbi ahunda mbi, a tene: “Ngbanga ti nyen la mo ye ti voro akotara ti mo ape so? Mo hinga ape so ala la asara si mo yeke na fini so? Mo ye ti kiri singila na ala ape? Mo ke ti sara ye alingbi na angobo so akotara ti e azia na e ti sara so ngbanga ti nyen? Tongana mo ke ti voro akotara ti e andâ mo tene vorongo ti e ayeke tâ buba ye.” Na pekoni Mama atï na toto.

Mbi pensé so Mama apeut ti tene mara ti tënë tongaso ape. Lo la lo leke ti tene mbi komanse ti manda Bible, andâ lo ke na azo ni ti manda Bible na lo ni la lo sara tongaso ti son bê ti azo ni ape. Mbi yeke mä yanga ti lo lakue na ti ke ti mä yanga ti lo ayeke ngangu na mbi. Me ti so ni so, mbi ke ti mä yanga ti lo ndali ti so mbi ye ti zia ngia na bê ti Jéhovah. A yeke lani kete ye ape, me Jéhovah amû ngangu na mbi.

E yeke aBouddhiste tongana mingi ti azo na Japon. Me gi na yâ ti nze use so aTémoin ti Jéhovah amanda Bible na mbi, mbi hinga so atënë ti Bible ayeke tâ tënë. So mbi ga ti hinga so mbi yeke na mbeni Babâ na yayu, mbi ye mingi ti hinga lo nzoni. A nzere lani mingi na mbi na Mama ti sara lisoro na ndo ti ye so mbi yeke manda. Mbi komanse ti gue lani na abungbi ti dimanche na Da ti Royaume. Na ngoi so mbi hinga ye mingi na ndo ti Jéhovah, mbi tene na Mama so mbi yeke sara encore ye ti aBoudiste ni ape. Hio tongaso, sarango ye ti lo achangé. Lo tene: “A yeke ye ti kamene ti tene mbeni zo ti sewa ti e ake ti voro akotara ti e.” Lo tene na mbi ti zia lege ti mandango Bible nga ti guengo na abungbi. Mbi pensé lâ oko ape so Mama apeut ti tene na mbi tënë tongaso. Lo ga lani mbeni zo nde na lê ti mbi.

Na aÉphésien chapitre 6, mbi manda so Jéhovah ahunda na mbi ti mä yanga ti babâ na mama ti mbi. Papa amû part ti Mama. Kozo, mbi pensé so tongana mbi mä ala, ala kue ayeke mä mbi na sewa ti e ayeke kiri ti duti na siriri. Na mbage, mbi yeke ku lani ti sara examen ti gue na Lycée, na mbi ye ti leke tere ti mbi nzoni. Tongaso, mbi yeda ti sara ye so ala hunda na mbi ndali ti nze ota, na mbi tene na Jéhovah so mbi yeke kiri ti gue na abungbi na peko ti nze ota ni.

Desizion so mbi mû so ayeke na lege ni ape ndali ti araison use. Kozoni, mbi pensé lani so na yâ ti nze ota so atënë ti bê ti mbi ayeke changé ape. Me gi hio tongaso, songo ti mbi na Jéhovah  akomanse ti woko. Use ni, Papa na Mama atara ti sara kue ti tene mbi zia lege ti vorongo Jéhovah.

Na Da ti Royaume, mbi wara aita mingi so asewa ti ala akanga lege na ala. Ala dë bê ti mbi so Jéhovah ayeke mû maboko na mbi (Mat. 10:34-37). Ala fa na mbi so tongana mbi ngbâ be-ta-zo na Jéhovah, afami ti mbi alingbi ti manda ye na ndo ti lo. Tongaso, mbi zia lani bê ti mbi kue na Jéhovah, na mbi yeke sambela lo lakue.

Mbi wara kangango lege nde nde na yâ ti sewa ti mbi. Mama avoro yanga na mbi ti zia lege ti étude ni nga lo fa na mbi ndani so lo ye ti tene mbi zia ni. Mingi ni, mbi zi yanga ape. Tongana mbi tene mbeni tënë, e na Mama e yeke papa ka ndali ti so zo oko oko aye ti fa so lo la lo yeke na raison. Ge so, mbi bâ so tongana mbi ne atënë ti bê ti Mama nga na aye so lo mä na bê na ni, kpale ni alingbi ti kaï. Babâ na mama ti mbi amû na mbi lani kua mingi ti sara tongaso si mbi lingbi ti ngbâ na yanga-da. Na ambeni ngoi, ala tomba mbi na da wala ala gbanzi mbi na kobe.

Mama ahunda na ambeni zo ti mû maboko na lo ti sara si mbi yeda na tënë ti lo ni. Lo sara tënë ni na zo so ayeke fa mbeti na mbi, me lo zi ti lo yanga dä ape. Lo gue na mbi na kota zo ti place ti kua ti lo ti tene lo sara si mbi yeda so abungbi ti vorongo kue ayeke ye oko ape. Na yanga-da, Mama ayeke iri afami nde nde na téléphone na lo sara tënë na ala na toto ti mû maboko na lo. Ye so asara mbi nzoni ape, me na bungbi a-ancien ayeke dë bê ti mbi na ala wa mbi ti pensé na azo so Mama ayeke fa tënë na ala sân ti tene lo hinga.

Babâ na mama ti mbi aye lani ti tene mbi gue na dasendagi tongaso si mbi lingbi ti wara mbeni  nzoni kua ti nginza. E kue lani ngonzo ayeke sara e na e lingbi lani ti sara lisoro na ndo ni nzoni ape. Tongaso, mbi sara gbâ ti lettre na ala, mbi fa na ala ye so mbi ye ti sara. Ngonzo asara Papa ngangu, na lo tene: “Tongana mo pensé so mo peut ti wara kua, wara ni kekereke tongaso ape mbi yeke tomba mo.” Mbi zia tënë ni na Jéhovah na yâ ti sambela. Na ndade ni, na ngoi so mbi yeke fa tënë mbi tingbi na ambeni ita-wali use so ala lango nde nde, ala hunda na mbi ti bata amolenge ti ala. A nzere lani na Papa ape na lo ke ti sara tënë na mbi, na lo sara sanka ti mbi. Mama atene so tongana mbi ga mbeni sioni zo ayeke nzoni ahon ti ga Témoin ti Jéhovah.

Na ambeni ngoi mbi hinga ape wala Jéhovah ayeda ti tene mbi dö sese na babâ na mama ti mbi tongaso. Mbi sambela Jéhovah mingi nga mbi gbu li ti mbi na ndo ti aversê ti Bible so asara tënë ti ndoye ti Jéhovah, ye so amû maboko na mbi ti duti na nzoni bango ndo na ndo ti kangango lege, nga mbi hinga so babâ na mama ti mbi akanga lege na mbi ndali ti so ala ye ti tene sioni asi na mbi ape. Jéhovah amû maboko na mbi ti zia li ti mbi kpô nga ti bâ ye so mbi lingbi ti sara. Nga, so mbi fa tënë mingi asara si mbi ye fango tënë ni mingi. Na mbi zia na gbele mbi ti mû kua ti pionnier.

So ambeni ita-wali ahinga so mbi ye ti mû kua ti pionnier, ala wa mbi ti ku juska bê ti babâ na mama ti mbi adë si. Mbi sambela Jéhovah ti mû na mbi ndara, mbi gi nda ti ye, mbi gbu li ti mbi na ndo ti ndani so mbi ye ti mû kua ni, nga mbi sara tënë ni na aita so akpengba na lege ti yingo. Mbi tene na bê ti mbi so mbi ye ti zia ngia na bê ti Jéhovah. Nga, même tongana mbi kiri na kua ti pionnier ni na peko ayeke changé bango ndo ti babâ na mama ti mbi ape.

Mbi komanse ti sara kua ti pionnier na ndangba ngu ti ekole ti mbi na Lycée. Na ngoi so mbi sara kua ti pionnier kete, mbi zia na gbele mbi ti fa tënë na ndo so bezoin ayeke dä mingi. Me babâ na mama ti mbi aye lani ti tene mbi zia ala ape. Tongaso, mbi ku lani juska mbi wara ngu 20 si. Ti tene bê ti Mama ason ape, mbi hunda na filiale ti tokua mbi ti fa tënë na mbongo ti Japon na ndo so afami ti e ayeke dä.

Na yâ ti kua ti fango tënë, a nzere na mbi mingi so mingi ti azo so mbi manda Bible na ala awara batême. Mbi manda lani Anglais ti mû maboko na mbi ti sara kua ti mbi ni mingi. Apionnier spécial use ayeke lani na yâ ti congrégation so mbi yeke dä. Mbi bâ so tere ti ala anzere mingi ti mû maboko na ambeni zo nga ala yapu na yâ ti kua ti ala. Mbi nga mbi ye ti ga pionnier spécial. Na ngoi ni so, fani use tere ti Mama ason ngangu. Fani use kue mbi kiri kâ ti mû maboko na lo. Na ye so ahon gbungo li ti lo na bango ndo ti lo achangé kete.

Ngu mbasambala na pekoni, Atsushi mbeni oko ti apionnier spécial so mbi sara tënë ti ala fade atokua na mbi lettre. Lo tene lo ye ti sara mariage na lo ye ti hinga pensé ti mbi nga na tënë ti bê ti mbi na mbage ti lo. Mbi sara nzara ti lo lâ oko ape, mbi pensé nga ape so lo sara nzara ti mbi. Nze oko na pekoni, mbi tene na lo so mbi ye ti tene e hinga tere nzoni si. E ga ti bâ so mingi ti aye so e ye ague oko, e kue e ye ti ngbâ ti sara kua ti ngoi kue na e yeke nduru ti sara kua kue so a mû na e. Na nda ni, mbi na lo e sara mariage. A nzere na mbi lani mingi ti bâ so Mama, Papa nga na gbâ ti afami aga lani na matanga ti mariage ti e.

Kete na peko ti so e sara kua ti pionnier permanent, Atsushi aga adjoint ti surveillant ti circonscription. Kete na pekoni e kiri e wara mbeni tënë  nzoni ni. E ga surveillant ti circonscription. Na peko ti so e hunzi ti sara vizite ti acongrégation kue aita ti filiale atéléphoné na e. Ala hunda e ti hinga wala e ye ti sara kua ti surveillant ti circonscription na kodoro ti Népal.

Mbi yeke gi bê ti mbi lani na ndo ti ye so babâ na mama ti mbi ayeke tene tongana ala mä so mbi yeke gue na mbeni yongoro ndo. Tongaso, mbi iri ala na téléphone. Papa atene na mbi atene: “Mo yeke gue na mbeni pendere kodoro.” Yenga oko kozo, mbeni kamarade ti lo amû na lo mbeni mbeti so asara tënë na ndo ti Népal, na Papa ayeke pensé lani so Népal ayeke mbeni pendere ndo ti tene zo ague abâ ni.

A nzere na e lani mingi ti sara kua na aita ti Népal so aye azo mingi, e kiri e wara tënë nzoni. A hunda na e ti sara kua ti e juska na Bangladesh, mbeni kodoro so ayeke nduru na e me so aye ti kâ ayeke nde mingi. E yeke lani na aye nde nde ti sara na yâ ti kua ti fango tënë. Ngu oku na pekoni, a kiri na e na Japon, ndo so e yeke sara kua ti e ti circonscription dä fadeso.

Mbi manda aye mingi na ndo ti Jéhovah na ngoi so mbi sara kua ti fango tënë na Japon, Népal nga na Bangladesh. Sarango ye ti azo ti yâ ti akodoro so ayeke nde nde. Na zo oko oko ayeke na asarango ye ti lo. Mbi bâ tongana nyen Jéhovah ayeke bâ ndo na ndo ti zo oko oko, lo bâ ye so ala sara na nene ni, lo mû maboko na ala nga lo iri tënë nzoni na ndo ti ala.

Jéhovah airi tënë nzoni na ndo ti mbi, lo mû lege na mbi ti hinga lo, ti sara kua ti lo nga lo mû na mbi mbeni nzoni koli. Jéhovah amû maboko na mbi ti mû anzoni desizion, fadeso mbi yeke na nzoni songo na lo nga na afami ti mbi. Merci na Jéhovah, mbi na Mama e kiri e ga anzoni kamarade. Merci mingi so fadeso mbi yeke na siriri na Jéhovah nga na mama ti mbi.