5. Bubango ti sese

“[Nzapa ayeke] buba azo so ayeke buba sese.”​—APOCALYPSE 11:18.

● Mbeni koli so iri ti lo Pirri ayeke na Kpor na Nigeria. Lo sara kua ti gingo kangoya. Gbâ ti pétrole so atuku na yâ ti ngu ti Delta ti Niger asara si buze ti lo so abuba. Lo tene: “A fâ asusu, abuba poro ti tere ti e nga abuba angu. Mbi yeke na mbeni ye ti sarango ni pëpe.”

AYE SO ASI AFA NYEN? Ambeni wandara atene so na yâ ti ngu oko oko, a yeke tuku atonne omene na ndambo ti azende na yâ ti ngu-ingo. Ndambo ti azende so ayeke aye so a leke ni na plastique na ti tene ague ngbii aga sese, a hunda angu ngbangbo mingi. Azo ayeke buba sese, ala yeke buba nga amosoro ti gbe ti sese nga na aye tongana ngu na gbako na mbeni lege so amû mbeto na zo. Agingo nda ti ye afa so ti tene aye ti sese so azo abuba ni na yâ ti ngu oko akiri na place ni, a hunda ngu oko na nze oku. Mbeni mbeti-sango (Sydney Morning Herald) na kodoro ti Australie atene: “Tongana wungo ti azo angbâ ti gue na li ni nga ala ngbâ ti buba aye ti sese tongana ti so e bâ laso juska ti si na ngu 2035, e yeke duti na bezoin ti mara ti sese so e yeke na ndo ni so fani use.”

TËNË WA AZO AYEKE TENE KA MINGI? Azo ahinga ye mingi nga ala yeke na akode ti leke akpale. E lingbi ti leke akpale so ti bata sese.

TËNË SO ALA TENE AYEKE NA LEGE NI? Azo mingi so ayeke sara kua ngangu nga na ambeni bungbi alondo ti sara tënë na ndo ti bubango ti aye tongana ngu nga na pupu. Me, sese angbâ lakue ti buba gi bubango ti gue na ni.

MO TENE TI MO NYEN? A lingbi Nzapa asara mbeni ye ti bata sese ti e si abuba pëpe, tongana ti so lo mû zendo ni so?

Nde na aprophétie oku so e londo ti bâ, Bible afa nga mbeni ye ti nzoni so ayeke si na alango ti nda ni. Zia e bâ mbeni oko na yâ ti omene prophétie ni.

[Kete tënë na lembeti 8]

“A yeke mo bâ mo tene mbi zia ndo ti mbi so ayeke mbeni paradis mbi gue na mbeni ndo so asioni zende ayeke dä.”​—TËNË TI ERIN TAMBER, MBENI ZO SO ALANGO NA GOLFE TI MEXIQUE, NA AMERIKA, NA NDO TI AYE SO AGA NA PEKO TI PÉTROLE SO ATUKU NA YÂ TI NGU TI GOLFE TI MEXIQUE NA NGU 2010.

[Encadré na lembeti 8]

Nzapa la ayeke na gunda ti aye ti sioni so?

Teti so Bible afa kozoni awe tënë ti aye ti sioni so e yeke bâ laso, a ye ti fa so Nzapa la ayeke na gunda ni? Lo la lo sara si e yeke bâ pasi? Mo lingbi ti wara anzoni kiringo tënë na ahundango tënë so na chapitre 11 ti buku Bible afa nyen biani? so aTémoin ti Jéhovah asigigi na ni.

[Lingu ti foto na lembeti 8]

U.S. Coast Guard photo