A yeke ti sara ye na baba pëpe wala na pikango kate pëpe. Zo so ayeke na tâ be-ti-molenge ayeke bâ amba ti lo tongana ambumbuse zo ape nga lo hinga akatikati ti lo.

Moïse azia pëpe si komandema ague na lo ti ga zo ti baba. Mingi ni, tongana zo awara mbeni kete komandema, ge la a yeke bâ wala lo yeke zo ti tâ be-ti-molenge wala pëpe. Pakara Robert G. Ingersoll atene ândö: “Mingi ti azo ayeke luti ka na lê ti akpale. Me tongana mo ye ti hinga tâ sarango ye ti mbeni zo, mû na lo komandema, mo bâ.” Na ndo ti tënë ti komandema, Moïse azia na e mbeni pendere tapande. Tongana nyen?

Jéhovah amû lani na Moïse mbeni kota kua ti sara, so ayeke ti fa lege na azo ti Israël. Me lâ oko baba alï bê ti Moïse ape. Na tapande, bâ tongana nyen la na tâ be-ti-molenge lo leke tënë na ndo ti tënë ti warango ye ti héritier (Nombre 27:1-11). Tënë so ane, ngbanga ti so a yeke lï ande na yâ ti ndia ndali ti azo kue.

Moïse ayeke sara tongana nyen? Fade lo yeke tene so, so ni yeke Mokonzi ni, ni la ni yeke mû desizion ni? Fade lo yeke zia bê ti lo na ndo ti hingango ye ti lo wani? na ndo ti aye so gigi afa na lo? wala na ndo ti ye so lo hinga na ndo ti pensé ti Jéhovah?

Zo ti baba ayeke sara peut-être tongaso. Me Moïse ape. Bible atene: “Moïse aga na tënë ti ala na gbele L’Éternel.” (Nombre 27:5). Bâ kete si! Même na peko ti so lo fa lege na azo ti Israël angu 40 tongaso, Moïse azia bê ti lo na ndo ti lo wani ape, me na ndo ti Jéhovah. Biani, ye so afa so Moïse ayeke tâ na be-ti-molenge.

Moïse ahule gi na ndo ti komandema ti lo ni ape. Tongana lani Jéhovah asoro ambeni zo ti sara kua ti prophète na tere ti lo, tere ti Moïse anzere (Nombre 11:24-29). Tongana lani kogara ti lo awa lo ti zia ambeni kua ni na tïtî ambeni koli nde, lo yeda na ni na tâ be-ti-molenge (Exode 18:13-24). Nga, tongana Moïse aga nduru ti kui, atâa so lo ngbâ na ngangu ti tere, lo hunda na Jéhovah ti zia mbeni zo ti sara kua na place ti lo. Tongana Jéhovah asoro Josué, Moïse amû maboko mingi na maseka-koli so, lo tene na azo ti Israël ti yeda ti tene Josué afa lege na ala ti si na Sese ti Zendo (Nombre 27:15-18; Deutéronome 31:3-6; 34:7). Ti tâ tënë ni, na lê ti Moïse lani a yeke mbeni pendere pasa ti mû maboko na azo ti Israël ti sara na Jéhovah. Me lo zia komandema ti lo aga kozo pëpe na nzoni ti amba ti lo.

E ye lâ oko pëpe ti zia si komandema so e yeke na ni wala hingango ndo ti e asara si e suku na baba. Zia e girisa pëpe so ti tene Jéhovah asara kua na e, a lingbi e duti lakue na tâ be-ti-molenge mingi (1 Samuel 15:17). Tongana e yeke biani na tâ be-ti-molenge, e yeke sara kue ti bata wango ti Bible so atene: “Zia bê ti mo kue na L’Éternel, na zia bê ti mo na hingango ye ti mo mveni pëpe.”​—aProverbe 3:5, 6.

Tapande ti Moïse afa nga na e ti zia bê ti e mingi pëpe na ndo ti kota ndo wala kamba ti kua ti e.

Tongana e gi ti sara ye na tâ be-ti-molenge tongana ti Moïse, e yeke bâ nzoni dä? En. Tongana e sara tongaso, e yeke sara si azo so ayeke na tere ti e ayeke duti na ngia, nga ala yeke ye e. Me nga, Jéhovah Nzapa ayeke ye e, teti lo nga kue lo yeke na mara ti pendere sarango ye tongaso (Psaume 18:36). “Nzapa ake azo ti baba, me lo yeke mû kota nzobe ti lo na azo so ayeke na tâ be-ti-molenge.” (1 Pierre 5:5). Biani, tënë so apusu e ti sara ye na tâ be-ti-molenge tongana ti Moïse.