Lani so Nzapa asara azo, lo ye ti tene ala duti na fini lakue lakue na ndo ti sese so pasi, kobela nga na kuâ ayeke dä ape. Me kozo koli, Adam, ake lani yanga ti Nzapa, na lo girisa fini ti lakue lakue ni. Teti so e yeke amolenge ti Adam, e kue e yeke kui (aRomain 5:8, 12; 6:23). Me, tâ Nzapa, Jéhovah, atokua Molenge ti lo, Jésus, na sese ge ti kui nga ti kiri na ye so Adam agirisa ni lani.—Diko Jean 3:16.

Grâce na kuâ ti Jésus, Nzapa apardone siokpari ti e nga e lingbi ande ti duti na fini lakue lakue. Bible afa na e dutingo ti azo ande na ndo ti sese na ngoi ni kâ, tongana mbakoro, kobela nga na kuâ ayeke ande dä mbeni ape.—Diko Ésaïe 25:8; 33:24; Apocalypse 21:4, 5.

Na bï so aga kozoni na kuâ ti Jésus, lo tene na adisciple ti lo ti dabe ti ala na lo na lege ti mbeni senge matanga. Na sarango Matanga ti kuâ ti Jésus so ngu oko oko, a yeke mû lege na e ti bâ yengo so Jésus na Jéhovah aye na e azo.—Diko Luc 22:19, 20; 1 Jean 4:9, 10.

Ti ngu so, lango ti Matanga ti kuâ ti Jésus ayeke na lundi lango 14 ti avril na peko ti lindango ti lâ. A-Témoin ti Jéhovah, ti ndo so mo yeke dä, atisa mo na matanga ni.—Diko aRomain 1:11, 12.