A dü mbi na Acul, mbeni kete kodoro na mbage ti ouest ti Guatemala. Asewa ti mbi ayeke azo ti mara ti Ixil, mbeni kete mara ti aMaya. Na ndo ti yanga ti Espagnole so mbi yeke tene, mbi yeke tene nga kete yanga ti kodoro ti e. Ngoi so a dü mbi atï na mbeni sioni ngoi ti bira, so akporo lani na popo ti azo ti kodoro ti Guatemala ni, na a ninga ngu 36 tongaso. Na ngoi ni so, gbâ ti azo ti mara ti Ixil ni akui.

Na ngoi so mbi wara ngu osio, ita ti mbi ti koli, so ayeke na ngu mbasambala, asara ngia na grenade, na a sungba. Ye so asara si lê ti mbi abuba. Ti ita ti mbi ni, lo kui ti lo. Na pekoni, a gue a zia mbi na mbeni ndo so a yeke bâ lege ti amolenge so lê ti ala abuba, na gbata ti Guatemala, na kâ la si mbi manda Braille. Me, ndali ti ambeni raison so mbi hinga ni nzoni ape, a ke na mbi ti sara lisoro na atanga ti amolenge so ayeke na ndo ni so, nga amba ti mbi ti klase ni ayeke kpe gi mbi kpengo. Mbi yeke lakue gi mbi oko, na teti so ngu oko oko a yeke zia lege na e ti gue na yanga-da, mbi yeke ku lani ngoi ni so kungo ti gue ti bâ mama ti mbi. Lo yeke sara ye lakue na nzoni bê na mbage ti mbi nga lo yeke bâ mawa ti mbi. Mawa ni ayeke so, na ngoi so mbi wara ngu bale-oko, mama ti mbi ni akui. Mbi bâ so mbi girisa oko zo so aye mbi mingi, ye ni so ason tâ mbi mingi.

Na ngoi so mbi wara ngu 11, mbi kiri na kodoro ti mbi, na mbi gue mbi lango na ndo ti yaya ti mbi ti koli, so mbi na lo e yeke babâ oko. Ala mû na mbi aye so mbi yeke na bezoin ni, me zo oko apeut pëpe ti hinga ye so ayeke na yâ ti bê ti mbi. Na ambeni ngoi, mbi hunda Nzapa na kota go, mbi tene: “Ngbanga ti nyen la mama ti mbi akui? Lê ti mbi abuba ngbanga ti nyen?” Azo atene na mbi so, Nzapa la ayeda si akpale ni so asi so. Ye so asara si mbi tene so Nzapa ayeke na bê ape nga lo yeke sara ye na lege ni ape. Tâ tongana mbi hinga kode ti tene mbi fâ tere ti mbi, ka mbi sara ni lani.

Teti so lê ti mbi akanga, a sara si azo ayeke sara ye ti ngangu na mbi nga mbi yeke na mbeni zo ti tene mbi fa atënë ti bê ti mbi na lo ape. Fani mingi, azo agbu mbi na ngangu na ala lango na mbi. Lâ oko mbi fa peko ti asioni ye ni so na gigi ape, ndali ti so mbi pensé so mbeni zo ti bâ lege ti tënë ni na mbi ayeke dä ape. Azo ayeke sara tënë na mbi ape, nga mbi yeke causé ka na azo ape. Mbi duti gi mbi oko na vundu, nga mbi yeke lani na confiance na zo oko ape.

Na ngoi so mbi wara lani ngu bale-oko na ota tongaso, aTémoin ti Jéhovah use (mbeni koli  na wali ti lo) aga nduru na mbi, na ngoi so e sigigi na récréation na ekole. Mbeni maître ti ekole ti mbi, so mawa ti mbi ayeke sara ka lo, la ahunda na ala ti ga ti bâ mbi. Ala sara lisoro na mbi na ndo ti azendo ti Bible, so fade a yeke zingo ande akuâ nga so, mbeni lâ, lê ti azo so akanga ayeke kiri ti zi (Ésaïe 35:5; Jean 5:28, 29). Ye so ala fa na mbi so anzere na mbi lani mingi, me a yeke ngangu na mbi ti causé na ala, ndali ti so mbi yeke tene ka tënë mingi ape. Me, atâa so mbi yeke duti gi mbi oko, na nzoni bê nga na kangango bê ala ngbâ lakue ti ga ti bâ mbi, ti fa tënë ti Nzapa na mbi. Koli na wali so ayeke tambela lani ahon kilomètre 10 tongaso, nga na ndo ti hoto, ti gue juska ti si na kodoro so mbi yeke dä.

Ita ti mbi ti koli so la afa ala na mbi, lo tene azo ni so ayü bongo nzoni me ala yeke na ye mingi ape. Atâa so kue, ala yeke fa lakue so ala bi bê ti ala na mbi, na gango na mbi ambeni kete cadeau. Mbi bâ so gi atâ Chrétien la alingbi ti sara mara ti asacrifice ni so.

Mbi manda Bible grâce na ambeti ti Braille. Atâa so mbi comprendre aye so mbi yeke manda so nzoni, a yeke lani ngangu na mbi ti yeda na aye ni so. Na tapande, a yeke lani ngangu na mbi ti mä na bê so Nzapa ayeke pensé tâ na mbi, nga so ambeni zo kue apeut ti fa mara ti asarango ye ti Nzapa ni so na mbage ti mbi. Mbi hinga ndani so Jéhovah azia lege na aye ti sioni ti si, me a yeke lani ngangu na mbi ti bâ lo tongana mbeni Babâ ti ndoye. *

Yeke yeke, ye so mbi manda na yâ ti Bible a-aidé mbi ti changé bango ndo ti mbi. Na tapande, mbi manda so Nzapa ahinga ti zia tere ti lo na place ti azo so ayeke bâ pasi. Na ndo ti awakua ti lo ti ândö, so azo asara pasi na ala, Nzapa atene: “Mbi bâ ye ti vundu ti azo ti Mbi . . . Mbi hinga pono ti ala.” (Exode 3:7). Na ngoi so mbi ga ti bâ anzoni sarango ye ti tere ti Jéhovah, tere ti mbi anzere mingi, ye so apusu mbi ti mû fini ti mbi na lo. Na ngu 1998, mbi wara batême, mbi ga Témoin ti Jéhovah.

Ngu oko na peko ti so mbi wara batême, mbi gue na mbeni ekole ti azo so lê ti ala abuba, nduru na gbata ti Escuintla. Mbeni ancien ti congrégation ti gbata ni ahinga so a yeke ngangu na mbi ti londo na kodoro ti mbi ti ga na bungbi. Congrégation so ayeke nduru na ndo so mbi yeke dä ayeke na peko ti hoto so koli na wali so ayeke hon lani na ndo ni ti gue ti manda Bible na mbi so. Me a yeke ngangu lani na mbi ti gue dä. Ni la, ti aidé mbi, ancien ni so ahunda na mbeni sewa, so ayeke na Escuintla, ti mû mbi na ndo ti ala, na sewa ni ayeda nga ala mû maboko na mbi ti gue na bungbi. Juska laso, ala ngbâ ti bâ lege ti mbi nzoni mo bâ mo tene mbi yeke tâ mbeni zo ti sewa ti ala.

Mbi lingbi ti fa gbâ ti atapande ti tâ ndoye so aita ti yâ ti congrégation ni so afa na mbage ti mbi. Aye so asi na mbi na yâ ti gigi ti mbi so, tongana a bungbi ni kue oko, afa na mbi so aTémoin ti Jéhovah kue so mbi yeke na popo ti ala ayeke atâ Chrétien.—Jean 13:34, 35.

Mbi bâ so mbi peut fadeso ti sara mbeni ye nga mbi yeke na beku. Mbi yeke na gbâ ti aye ti sara fadeso na yâ ti gigi ti mbi. Teti so mbi yeke mû mbage na kua ti fango tënë ti Nzapa teti al’heure mingi, mbi zia lê ti mbi gi na ndo ti kua ti fango tâ tënë ti Bible na azo ahon ti pensé gi na ndo ti akpale ti mbi ni. Nga, mbi yeke na pasa ti sara kua tongana ancien na yâ ti congrégation nga ti fa tënë ti Nzapa na yâ ti acongrégation ti ndo ni so. Mbi wara même pasa ti fa tënë ti Nzapa na ngoi ti akota bungbi ti e, so azo gbani gbani ayeke ga dä.

Na ngu 2010, mbi wara diplôme ti Ekole ti formation ministérielle (so laso a iri ni Ekole ti awafango nzoni tënë ti Royaume) so a sara ni na Salvador. Ekole ni so aleke mbi ti sara akua ti mbi nzoni na yâ ti congrégation. So mbi wara formation so, a sara si mbi bâ so Jéhovah abâ aye so mbi yeke sara na nene ni nga lo ye mbi mingi. Jéhovah alingbi ti leke zo kue so lo ye, ti sara kua ti lo.

Jésus atene: “Ngia ayeke mingi tongana zo amû ye na zo ahon ti wara ye na maboko ti zo.” (Kusala 20:35). Laso, mbi peut ti tene so mbi yeke na ngia, na fadeso mbi hinga so mbi lingbi ti aidé ambeni zo, atâa so kozo mbi pensé na ni tongaso ape.