Nyen la alingbi ti aidé ande mo ti wara ngia nga na gbâ ti aye ti nzoni na yâ ti dikongo Bible ti mo? Bâ aye oku so amû maboko na azo mingi.

Gi ti wara nzoni ndo. Tara ti wara mbeni ndo so ayeke kpô. Zia si mbeni ye agboto lê ti mo ape tongaso si mo zia bê ti mo na ndö ti ye so mo yeke diko. Nzoni lumière nga na ndo so ade nzoni alingbi nga ti aidé mo ti wara aye ti nzoni na yâ ti dikongo Bible ti mo.

Duti na nzoni bibe na ndö ti Bible. Teti so Bible alondo na Babâ ti e ti yayu, mo yeke wara ande aye ti nzoni mingi, tongana bibe ti mo ayeke tongana ti mbeni molenge so ayeke nduru ti manda ye na mbage ti babâ wala mama ti lo so aye lo. Tongana mo yeke na sioni bibe na ndö ti Bible, gi ti zi ni tongaso si Nzapa apeut ti fa ye na mo.—Psaume 25:4.

Sambela kozo si mo diko Bible. A yeke wara apensé ti Nzapa na yâ ti Bible. Ni la, e yeke na bezoin ti tene lo mû maboko na e si e comprendre ni. Nzapa amû zendo ti mû “yingo vulu na ala so ahunda ni na lo”. (Luc 11:13). Yingo vulu ni so alingbi ti mû maboko na mo ti comprendre apensé ti Nzapa. A si na ambeni ngoi, a yeke zi ande yâ ti bibe ti mo ti comprendre “même aye ti Nzapa so ndani alï mingi.”—1 aCorinthien 2:10.

Diko Bible nga gi ti comprendre ni. Mo yeke diko Bible pëpe gï ti hunzi ni kue. Gbu li na ndö ti ye so mo yeke diko. Hunda terê ti mo wani na atënë tongana ti so: ‘Sarango ye ti azo so mbi diko ye na ndö ti ala ayeke tongana nyen? Tongana nyen la mbi lingbi ti sara ye alingbi na ni na yâ ti gigi ti mbi?’

Zia na gbele mo aye so mo ye ti si dä. Ti wara ye ti nzoni na peko ti dikongo Bible ti mo, gi ti hinga ambeni ye so alingbi ti ga na mo aye ti nzoni na yâ ti gigi ti mo. Peut-être, mo peut ti leke na bê ti mo mo tene: ‘Mbi ye ti hinga ye mingi na ndö ti Nzapa.’ ‘Mbi ye ti ga mbeni nzoni zo, mbeni nzoni koli ti wali wala nzoni wali ti koli.’ Na pekoni, soro mbage ti Bible so alingbi ti aidé ande mo ti sara ye alingbi na ye so mo leke ti sara so. *

Aye oku so a fa ni ge so, a yeke aidé ande mo ti komanse ti diko Bible. Me tongana nyen la mo lingbi ti sara si dikongo Bible ti mo akiri anzere na mo mingi? Mbage so aga na peko ayeke fa ambeni ye ni.