A dü mbi na Paddington, mbeni ndo so azo ayeke dä mingi na gbata ti Londre, na Angleterre. Mbi na mama ti mbi nga na ayaya ti mbi ti wali ota la e lango da oko. Babâ ti mbi ayeke lango ka lakue na yanga-da ape ndali ti so lo yeke nyon sämba mingi.

Na kete ti mbi, mama ti mbi afa na mbi ti sambela lakue na alakui. Mbi yeke na mbeni kete Bible so gï aPsaume la ayeke na yâ ni, na mbi yeke mû atënë ti yâ ti Psaume ni mbi he na bia. Mbi rappelé na mbeni tënë so mbi diko na yâ ti mbeni buku ti mbi, na tënë ni angbâ na yâ ti li ti mbi, a tene: “Mbeni lâ, zo kue ayeke kui.” Tënë ni so asara si mbi lango na bï ape, mbi yeke pensé gï na ndö ti gigi ti mbi ti kekereke. Mbi tene: ‘Ti tâ tënë ni, aye ti nzoni adoit ti duti na yâ ti gigi so mingi. Ka mbi yeke na fini ngbanga ti nyen?’ mbi ye lani ti kui ape!

Mbi ye ti hinga ye mingi na ndö ti tënë ti sarango yorö. Mbi tara ti sara tënë na akuâ, mbi na akamarade ti mbi ti ekole e yeke gue na cimetière nga e yeke bâ afilm so amû mbeto na zo. E bâ so aye ni anzere na e me na mbage ayeke zia mbeto na yâ ti e.

Mbi komanse ti sara kirikiri na ngoi so mbi yeke na ngu bale-oko. Mbi yeke nyon manga nga hio mbi ga ngbâa ni. Kete na pekoni, mbi komanse ti nyon mbangi. Na ngoi so mbi wara ngu 11, mbi tara ti nyon sämba. Atâa so sämba ni anzere na yanga ti mbi ape, a nzere na mbi tongana mbi soulé. Mbi ye bia nga na dodo mingi. Mbi yeke gue ka na amataga ti amaseka nga na aboite de nuit mingi. Mbi yeke sigi ka yeke na bï mbi hon na mbi yeke kiri yeke na da kozo si ndo ahan. Na ndade ni tongana mbi fatigué, mbi yeke kpe ekole. Lakue tongana mbi gue na ekole, mbi yeke nyon sämba na ngoi ti apermanence.

Mbi wara sioni moyenne na ngoi so mbi yeke na klase ti terminale. Na bango ni, bê ti mama ti mbi ason nga ngonzo ahon ndö ti lo, ngbanga ti so lo hinga fade ape so mbi yeke sara kirikiri mingi. E papa, na mbi kpe da ni. Teti ambeni ngoi, mbi lango na ndo ti ndeko ti mbi, Tony, so ayeke mbeni Rastaman (wala zo so abata kuä ti li ti lo ayo). Lo yeke gbu ye ti azo na ngangu, lo yeke kä mbangi, a hinga lo tongana zo so ayeke sara ye ti ngangu mingi. Kete na pekoni, mbi mû ngo mbi dü molenge ti e ti koli, na ngoi so mbi yeke gï na ngu 16.

Kozo lango so mbi tingbi na aTémoin ti Jéhovah ayeke na ngoi so mbi lango na yâ ti mbeni auberge ti awali kumbamba so ayeke na amolenge. Akota zo ti kodro ni amû na mbi mbeni chambre kâ. Ambeni wali use so ayeke aTémoin ti Jéhovah ayeke ga ka ti bâ ambeni mama so angbâ maseka na ndo ni so. Mbeni lâ, mbi ga na terê ti aTémoin ti Jéhovah ni na ngoi so ala yeke sara lisoro na awali ni. Mbi ye gï ti fa so aTémoin ti Jéhovah ni so ayeke fa tâ tënë ape. Ye oko, ala kiri tënë yeke nga polele na gbâ ti ahunda ti mbi kue gï na lege ti Bible. Ala sara ye yeke nga na ndoye, na ye so andu bê ti mbi mingi. Tongaso, mbi wani mbi yeda ti tene ala manda Bible na mbi.

Kete na pekoni, mbi manda ambeni ye na yâ ti Bible so achangé gigi ti mbi kue. Depuis kete ti mbi, mbi sara mbeto ti kuâ mingi. Me fadeso, mbi hinga fango ye ti Jésus na ndö ti tënë ti zingongo ti akuâ awe (Jean 5:28, 29). Nga, mbi hinga so Nzapa ayeke bi bê ti lo biani na mbi (1 Pierre 5:7). Ye so apika bê ti mbi mingi ayeke tënë so ayeke na Jérémie 29:11, so a tene: “Jéhovah atene: ‘Mbi hinga mbilimbili ye so mbi pensé ti sara ndali ti ala, mbi pensé ti mû na ala siriri, me ye ti vundu pëpe, ti mû na ala mbeni nzoni gigi ti kekereke nga na beku.” Mbi to nda ti hinga biani so mbi lingbi ti wara fini ti lakue lakue na yâ ti Paradis na ndö ti sese ge.—Psaume 37:29.

A-Témoin ti Jéhovah afa tâ ndoye na mbage ti mbi. Na kozo lango so mbi gue na mbeni bungbi ti ala, ala yamba mbi pendere nga ala mû place ti duti na mbi, azo ni kue ayeke sara ye nzoni mingi (Jean 13:34, 35). Sarango ye ti ala na mbage ti mbi ayeke tâ nde mingi na sarango ye ti azo ti mbeni églize ti ndo so mbi yeke dä. A-Témoin ti Jéhovah ayamba mbi atâa dutingo ti mbi ni. Ala mû ngoi ti ala na terê ti mbi, ala yeke bi bê na mbi nga ala yeke mû maboko na mbi mingi. Mbi bâ terê ti mbi mo bâ mo tene mbi yeke na yâ ti kota sewa so tâ yengo terê ayeke na popo ti azo ni.

Mandango Bible asara si mbi hinga biani so mbi doit ti sara achangement na yâ ti gigi ti mbi ti lingbi na andia ti Nzapa so ayeke mbilimbili. A yeke lani ngangu na mbi ti zia lege ti nyongo manga. Na oko ngoi ni, mbi hinga so ambeni bia ayeke sara si nzara ti nyongo mbangi asara mbi, tongaso mbi changé abia so mbi yeke mä ka ni. Ti tene mbi soulé ape, mbi zia lege ti guengo na amatanga ti amaseka nga na aboite de nuit, ngbanga ti so a yeke ando so asara si mbi yeke na nzara ti soulé mingi. Nga, mbi yeke gi ti sara kamarade na afini zo so ayeke na nzoni sarango ye so alingbi ti aidé mbi na yâ ti fini dutingo ti mbi.—aProverbe 13:20.

Na ngoi ni so, Tony kue ayeke manda Bible na aTémoin ti Jéhovah. Na ngoi so aTémoin ti Jéhovah ni ayeke kiri tënë na ahunda ti lo na lege ti Bible, lo nga kue lo hinga biani so ye so lo yeke manda so ayeke tâ tënë la. Lo sara akota changement na yâ gigi ti lo: lo zi terê ti lo na milieu ti asioni zo, lo zia lege ti gbungo ye ti azo na ngangu nga lo zia lege ti nyongo mbangi. Ti tene e nzere na lê ti Jéhovah, e use kue e bâ so e yeke na bezoin ti zia lege ti asioni sarango ye ti e ni nga e gi ti duti mbeni nzoni sewa ndali ti molenge ti e ti koli. E sara mariage na ngu 1982.

Mbi rappelé na recherche so mbi sara lani na yâ ti Tour ti Ba Ndo nga na Réveillez-vous ! * so asara tënë na ndö ti ambaï ti azo so awara lege ti sara achangement so mbi kue mbi ye ti sara ni. Atapande ti ala ni so akpengba mbi mingi. Mbi bâ so mbi wara ngangu ti ngbâ ti gbu ngangu na ti zia lege ni ape. Mbi ngbâ lakue ti sambela Jéhovah si lo zia mbi ape. Mbi na Tony e wara batême, e ga Témoin ti Jéhovah na juillet 1982.

Songo so mbi yeke na ni na Jéhovah Nzapa la asö fini ti mbi. Mbi na Tony kue e bâ so Jéhovah amû maboko na e na yâ ti angoi ti ngangu. E manda ti zia bê ti e kue na Nzapa na yâ ti angoi ti ngangu ni so, na e bâ so lo mû maboko na e lakue nga lo kpengba sewa ti e.—Psaume 55:22.

A nzere na mbi mingi ti mû maboko na amolenge ti e ti koli na ti wali ti hinga Jéhovah tongana ti mbi. Fadeso, mbi yeke nga na ngia tongana mbi bâ nga amolenge ti ala ayeke kono hingango ye ti ala na ndö ti Nzapa.

Lango ayeke kpe encore na lê ti mbi na bï ape ndali ti gingo bê na ndö ti kekereke wala na ndö ti kuâ. Yenga na yenga, mbi na Tony e yeke voyagé mingi na yâ ti acongrégation nde nde ti aTémoin ti Jéhovah ti kpengba amba ti e Chrétien. E yeke bungbi legeoko na ala ti fa ye na ambeni zo so afa na gigi mabe na Jésus, so ala nga kue alingbi ti wara fini ti lakue lakue.