Azo kutu mingi asara ye alingbi na amama-ndia so a sara tënë ni na yâ ti ambage so ahon, na ala sara aye mingi ti zi bibe ti kengo zo senge senge na bê ti ala. Me ti vrai ni, e yeke na ngangu ape ti sara si bibe ti kengo zo ahunzi kue. Eskê a ye ti fa so kengo zo senge senge ayeke ngbâ ande lakue lakue?

Agouvernement ti azo awara lege pëpe ti zi tënë ti kengo zo senge senge na yâ ti bê ti azo. Me eskê a ye ti fa so mbeni gouvernement apeut ti zi ni lâ oko ape?

Ti tene mbeni gouvernement azi tënë ti kengo zo senge senge biani biani, a lingbi

1. 1. Lo sara si azo azi asioni pensé so ala yeke na ni na ndö ti amba ti ala.

2. 2. Lo zi aye kue so asara si a yeke ngangu na azo ti sara ye nzoni na amba ti ala.

3. 3. Azo so amû li ni na yâ ti gouvernement ni aduti azo so bibe ti kengo zo senge senge ayeke na yâ ti bê ti ala ape.

4. 4. Lo sara si azo ti amara nde nde aduti beoko.

Bible adë bê ti e so Nzapa azia mbeni gouvernement tongaso na sese awe. A iri ni “Royaume ti Nzapa.”​—Luc 4:43.

Bâ aye so e yeke wara ande na gbe ti gouvernement so.

“Azo ni ayeke manda [ande] ye na ndö ti sarango ye mbilimbili.”​—ÉSAÏE 26:9.

“Tâ sarango ye na lege ni ayeke sara si siriri aduti dä, nga a yeke sara si azo aduti na siriri ti bê nga na siriri aninga.”​—ÉSAÏE 32:17.

Aversê so aye ti tene nyen? Royaume ti Nzapa ayeke fa ande na azo ye so ayeke na lege ni. Tongana azo ahinga nyen la ayeke nzoni nga nyen la ayeke sioni, fason so ala yeke bâ na amba ti ala ayeke changé. Azo kue ayeke hinga ande so, nzoni ye so zo adoit ti sara ayeke ti ye mara ti azo nde nde kue.

Nzapa “[a]yeke mbô ande ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.”​—APOCALYPSE 21:4.

Versê so aye ti tene nyen? Nzapa ayeke sara ande si apasi kue so azo ayeke bâ ndali ti so a sara ye na ala na lege ni ape ayeke hunzi. Mbeni raison ti tene azo abata ngonzo na bê na terê ti amba ti ala ayeke duti ande dä ape.

“Lo yeke fâ ngbanga pëpe na lege ti ye so lê ti lo abâ, nga lo yeke suku pëpe gï ndali ti tënë so lo mä mango. Lo yeke fâ ngbanga ti azo ti mawa na lege ni, lo yeke suku na azo ndali ti azo so abâ terê ti ala kete.”​—ÉSAÏE 11:3, 4.

Versê so aye ti tene nyen? Jésus Christ so ayeke Gbia ti Royaume ti Nzapa ayeke komande ande na lege ni na ndö ti sese kue nga lo yeke zia kangbi pëpe na popo ti azo. Jésus aye mbeni mara ahon mbeni ape, nga lo yeke sara ande si azo kue na ndö ti sese ayeke sara ande ye alingbi na andia so lo lu.

Royaume ti Nzapa ayeke fa na azo ti “tene tënë ti ala kue amä terê, si kangbi aduti na popo ti ala pëpe, me dusi ala duti biani beoko na yâ ti bibe oko nga na bango ndo oko.”​—1 ACORINTHIEN 1:10.

Versê so aye ti tene nyen? Beoko so a tene ayeketi ande na popo ti azo ti gbe ti Royaume ti Nzapa so ayeke masque ape. Ala yeke duti ande “biani beoko” ndali ti so ala yeke na tâ ndoye na popo ti ala ande.