ලෝකේ පුරාම ඉන්න හුඟදෙනෙක්ට හරි හමං කෑමක්වත් ඉන්න හිටින්න තැනක්වත් නැහැ. තවත් අයට අනාගතය ගැන කිසිම බලාපොරොත්තුවක් නැහැ. ඒ වගේ අයට උදව් කරද්දී දෙවියන්ගේ ආශීර්වාද අද්දකින්න අපිට පුළුවන්. ඒ කොහොමද?

“දුප්පතාට කාරුණිකව සලකන තැනැත්තා යෙහෝවා දෙවිට ණයට දෙයි. ඔහු දක්වන සැලකිල්ලට දෙවි හොඳ ප්‍රතිඵල දෙයි.”—හිතෝපදේශ 19:17.

කොල්ලකරුවන්ගෙන් හොඳටම ගුටි කාලා සිහි නැතුව පාරේ වැටිලා හිටපු මිනිසෙක් ගැන යේසුස් උපමාවක් කිව්වා. (ලූක් 10:29-37) හොඳටම අසරණ වෙලා හිටපු ඒ මිනිසාව දැක්ක කෙනෙක් එයාගේ උදව්වට ආවා. තුවාල වෙලා හිටියේ තමන්ගේ ජාතියට අයිති කෙනෙක් නොවුණත් ඒ මිනිසාට උදව් කරන්න එයා ඒක බාධාවක් කරගත්තේ නැහැ.

එයා ඒ අසරණ කෙනාට පුළුවන් උපරිමයෙන් සාත්තු කරලා අවශ්‍ය දේවල් ලබා දුන්නා විතරක් නෙවෙයි එයා වැටිලා හිටපු තත්වයෙන් ගොඩ එන්නත් එයාට උදව් කළා.

ඒ උපමාවෙන් ඉගෙනගන්න පුළුවන් මොනවාද? යේසුස් උගන්වමින් හිටියේ අවශ්‍යතාව තියෙන අයට උදව් කරන්න අපි අපේ උපරිමයෙන් වෑයම් කරන්න ඕනෙ කියන එක ගැනයි. (හිතෝපදේශ 3:27) දෙවියන් ළඟදීම දුප්පත්කමට, දුක් කරදරවලට නිමාවක් ගේනවා කියලා ශුද්ධ ලියවිල්ලේ සඳහන් වෙනවා. ඒත් දෙවියන් ඒ දේ කරන්නේ කොහොමද? කොයි කාලේදීද? ඔයාට ගොඩක් ආදරය කරන ඔයාගේ නිර්මාතෘ දෙන්න යන ආශීර්වාද මොනවාද? ඒ ගැන ඊළඟ ලිපියෙන් බලමු.