Onkoleessa 19, 2022nni 75 ale ikkitannoti jajjabba gashshaasine Buusantino Mangistubbahu Gaꞌlabbote Yoo Minira mitte rippoorte sokkino; tenne rippoorte garinni, “Koroonu fayyanninna ayyarete gade soorramanni kainohunni wonanni qarra ikkite nooti sagalete anje, Yukireenete olinni kainohunni alamete deerrinni hudete soorrantara dandiitanno.” Hakkiinni mulenni, Ze Ikonoomist yinanni gaazeexi “wonanni qarru amadeenna gaggabbanni noote tenne alamera xa konni olinni kainohunni lowo manni hudiꞌraraati” yiino. Qullaawu Maxaafi yannankera togooti sagalete anje heedhannota balaxe masaalino; ikkirono, togoo qarra cincine saꞌneemmo gede kaaꞌlannonkereno kulanno.

•    Yesuusi togo yee masaalino: “Gosa gosate aana, gashshootu gashshootu aana ola kayisanno. Addi addi darga hude . . . ikkanno.”—Maatewoosi 24:7.

•    Qullaawu Maxaafihu Ajuujate maxaafi, shoole faradaasine daafira kulanno; kuri faradaasine lawishshu tiro afidhinoreeti. Insa giddo mittu olaho lawishsha ikkannoho. Isi hoode daanno farashshaanni hudete lawishshaho; kuni farashshaanni daanno woyite sagalete anje heedhanno daafira, sagalete waagi giira kaxxanno. “Hakkiicho kolishsho farashsho afummo; farashsho gulufe noohu keenaasincho anga haaꞌre no. . . . ‘Mittu barri loosi kirira, kiilote darate ikkitanno qamadenna mitte kiilonna darate ikkanno hayixe calla uyinona . . .’ [yitanno huuro] macciishshummo.”—Yohaannisi Ajuuja 6:5, 6.

 Sagalete anje heedhannota kultannoti tini Qullaawu Maxaafi masaalo, xa yannankera woꞌmitanni no; Qullaawu Maxaafi tenne yanna “goofimarchu barra” yaanno. (2 Ximootewoosi 3:1) ‘Goofimarchu barri’ daafiranna Ajuujate maxaafi giddo kulloonni faradaasine daafira ledde afate, Alame 1914 Kawa Soorrantino yitanno viidiyo lai; hattono “Farado Guluffinori Shoolu Ayeooti?” yaanno birxicho nabbawi.

•    Qullaawu Maxaafi qarra ikkannonkere, lawishshaho sagalete anje cincine saꞌꞌa dandiineemmo gede kaaꞌlitannonke amaale kulannonke. Tennera mito lawishsha laꞌꞌate, “Shiimu Woxinni Heeꞌra Dandiinanni Gara” yaanno birxicho lai.

•    Qoleno Qullaawu Maxaafi woyyitino yanna daggannota kule hexxo aannonke. Maganu Qaali ‘baatto gide laashshiteenna ilaallate aana jajju woꞌmanno’ yanna daggannota hattono albillitte mannu baalunku sagale duuwannota kulanno. (Faarso 72:16) Qullaawu Maxaafi albillittete yanna daafira kulanno hexxo daafiranna tenne hexxo addaxxa dandiineemmohu mayiraatiro ledde afate, “Woyyitino Yanna Dagganno Yine Hexxa Dandiineemmo?” yaanno birxicho lai.