Ibiraawootu afiinni Beeteele yaa, “Maganu Mine” yaate. (Kalaqo 28:17, 19) Kuni suꞌmi, Yihowa Farciꞌraasine sabbakate looso qineessatenna kaaꞌlate alamete doyichora mintino minnara malinoho. Aliidi Bisi Yunayitidi Isteetete, Niwu Yoorkira qara biirora heeꞌre batinye gobbara heedhannotera sinu biirora biddishsha aanno. Tenne minnara soqqantannore mitteenni Beeteelete maate yinanni. Insa mitte maate gede mitteenni heedhanno, mitteenni loossanno, sagale mitteenni ittanno, hattono Qullaawa Maxaafa mitteenni xiinxallitanno.—Faarso 133:1.

Beeteele, hakko heedhanno maate insaneeto gudisse uyite soqqantannoho baxxino bayichooti. Baalante Beeteelera Maganu fajjo wonshatenna Maganu Mangiste looso loosate insaneeto qooffattukki woꞌma yanna soqqantannori meyanna labbaa roduuwi no. (Maatewoosi 6:33) Insa giddo mittohono damooza woy loosinsara woxe dibaantanni; ikkollana galtannowanna sagale, hattono mitu coyira ikkannoha boode woxe uyinanninsa. Beeteelete heedhannorira baalunkura loosu noonsa; lawishshaho biirote, kusheenaho woy sagale intanni addaraashera loossanno gede gaammanni. Mitu roduuwi maashinetenni borro attantanno, borro xarrazzanno, woy mine fiitannonna hayishshitanno, uduunne hayishshitanno, hiiqqaminore seekkitanno, hattono woleno togoo looso loossanno.

Beeteele, sabbakate looso kaaꞌlate lowo looso loonsanni baseeti. Beeteele minnoonnihu qaru korkaati, Qullaawu Maxaafi halaale dandaami deerrinni lowo mannira iillishateeti. Lawishshaho tenne biroshereno isera qixxeessinoonni. Tenne biroshere borreessantanno gede assinohu Aliidi Bisooti; hakkiinnino alamete doyichora nootera lowo xibbe ikkitannote tirote gaamora kompiyuterete widoonni iillitanno gede assinoonni; aanteteno haammata Beeteelera noote anga iimanni attantanno maashinenni attamme, 110,000 saꞌanno songora iillitanno gede assinoonni. Beeteelete maate konne baala assinanni woyite, baalunku loosinni roore wiinamme loonsanniha sabbakate looso kaaꞌlate lowore assitanno.—Marqoosi 13:10.

• Beeteelete soqqantannori hiittoo roduuwaati? Insa towaantannihu hiittoonniiti?

• Mitte mittente Beeteelera loonsanni loosi hiikkoye wiinamme loonsanni looso kaaꞌlannoho?