Barnabaasinna soqqamaasincho Phaawuloosi Giriikete Afiite Qullaawa Borro giddo duucha basera qummi assinoonni. Insa basetenni base hadhe babbaxxitino songo towaattino. Kageeshsha daafurtinohu mayiraati? Ammanate roduuwinsara lowo geeshsha heddanno daafiraati. Phaawuloosi “wirro mare roduuwu noo gara laꞌꞌa” hasiꞌrannota coyiꞌrino. Isi umisi fajjonni lowo xibbe kiilomeetire ikkitanno doogo haꞌre roduuwa jawaachishino. (Soqqamaanote Looso 15:36) Yannankera woradu aliidi laꞌꞌaanono hattonni kaaꞌla hasidhanno.

Insa daggannohu ninke jawaachishateeti. Mittu mittunku woradu aliidi laꞌꞌaanchi 20 meddi yitanno songuwa towaatanno gede gaammanni; mitte mittenta songo dirunni lame hige mitte lamala geeshsha towaatanno. Kuri roduuwi woꞌnaalsha, hattono galte noonsaha ikkiro galtensahano macciishshanke lowore kaaꞌlitannonke. Insa jajjabbano ikko wedella roduuwa shiqqe hasaawisate woꞌnaaltanno, qolteno ninke ledo mitteenni soqqamanna Qullaawa Maxaafa xiinxallisa hasidhanno. Kuri aliidi laꞌꞌaano songote cimeeyye ledo roduuwa towaattanno, hattono songote giddonna jajjabbu gambooshshiwa jawaachishshanno lallawo shiqishshanno.—Soqqamaanote Looso 15:35.

Insa baalunkura heddanno. Woradu aliidi laꞌꞌaano songote ayyaanaamittera lowo geeshsha heddanno. Insa cimeeyyetenna songote soqqamaano ledo gamba yite songonniha lophote deerra hasaabbanno, hattono loosu qeechansa albinni roore danchu garinni wonshitanno gede amaaltannonsa. Qolteno suwisaano soqqanshonsanni dancha guma afidhanno gede kaaꞌlitannonsa; hattono haarote ninke ledo gamba yaa hanaffinori ledo egennamanna ayyaanaamittete lophonsa mageeshsha martinoro afa hagiirsiissannonsa. Kuri mittu mittunku roduuwi insaneeto qooffattukki “[ninke] horora yite ledonke loossannoreeti.” (2 Qorontoosi 8:23) Ninkeno ammanatenni, hattono ninkeneeto gudinse Maganoho uyine insa lawishsha harunsino.—Ibiraawuyaani 13:7.

• Woradu aliidi laꞌꞌaano songo towaattannohu mayiraati?

• Insa towaanyonni ati mayi horo afiˈratto?