Doodha Hasiissannohe Doorsha
Doodhineemmo doorshi hagiidhineemmo woy dadillineemmo gede assankera dandaanno. Yihowa tenne afino. Isi biddishshisi garinni heeꞌnammora hasiꞌrannohu iseraati.
Yihowa keerunna hagiirru noo heeshsho heeꞌnammora hasiꞌranno.
“Woyyannoꞌnere baala rosiiseemmoꞌnehunna, hadhinanni doogo kuleemmoꞌnehu Maganiꞌne Kaaliiqi aneeti. Hajajoꞌya seekkitine macciishshitinoonniha ikkoommero, keeru moolannokki wayi gede, keeraanchimmano baaru dambali gede ikkite heedhannoꞌne.”—Isayaasi 48:17, 18.
Maganu Kalaqaanchonke ikkino daafira, heeꞌra hasiissannonketa baalantenni woyyitino heeshsho afino. Isi biddishshisi kaaꞌlannonketa afinohura, biddishshisi garinni heeꞌnammora hasiꞌranno. Maganu hajajo agadhineemmoha ikkiro, doodhineemmo doorshi dancha guma abbannoronna teꞌee dihuluullammeemmo. Woꞌmanka woyite geedote keerenna hagiirre abbannoha gara ikkino doorsha doodhineemmo.
Yihowa dandiineemmokkire asse diyaannonke.
“Techo eemmoꞌne hajajo lowo geeshsha digoꞌlitannote; woy hajajamateno diqarrissannote.”—Marro 30:11.
Maganu biddishshi garinni heeꞌrate, hedonkenna assootenke biddi assiꞌra hasiissannonkeha ikkara dandaanno. Ikkirono Yihowa dandiineemmokkire asse diyaannonke. Isi Kalaqaanchonke ikkino daafira dhukanke afino. Qoleno Yihowa roore anfanni haꞌneemmo woyite, ‘hajajosino kaajjado ikkitinokkita’ huwanteemmo.—1 Yohaannisi 5:3.
Yihowa biddishshisi garinni heeꞌra doodhitannore kaaꞌlate qaale eino.
“Qiniiticho angakki irkiseemmohe; ‘Kaaꞌleemmohena waajjitooti’ yeemmohehu, Maganikki ani Kaaliiqaati.”—Isayaasi 41:13.
Maganu kaaꞌlannonke daafira isi biddishshi garinni heeꞌra dandiineemmo. Isi jawaantenna hexxo aannohu Qaalisi Qullaawu Maxaafi widoonni kaaꞌlannonke.
Alamete doyichora heeꞌrannohu lowo miliyoone ikkanno manni, Qullaawu Maxaafi biddishshi garinni heeꞌranno daafira heeshshonsa woyyaabbino. Qullaawu Maxaafi kulannota dancha amaale ledde rosatto gede koyinsoommohe! Woxe baaxxittokkinni jw.org aana noota Qullaawu Maxaafi aana xintantinota Hegerera Hagiidhitanni Heeꞌra Dandaatto! yitanno biroshere nabbabbe hanafa dandaatto. Tini biroshere aane noo roso amaddino:
-
Qullaawu Maxaafi Kaaꞌlannohehu Hiittoonniiti?
-
Qullaawu Maxaafi Kaajja Hexxo Noonketa Kulanno
-
Qullaawu Maxaafi Yaannore Ammana Dandiineemmo?
Maganu Qaale Qullaawa Maxaafa xiinxallatto woyite, kuni Maxaafi diru shaarannokkihanna ‘hegerera soorramannokkiha’ ikkinota wodanchatto. (Faarso 111:8) Garanna gara ikkinokki coyi daafira Qullaawu Maxaafi kulanno biddishsha harunsa, baalantenni woyyitino heeshsho heeꞌneemmo gede kaaꞌlitannonke. Ikkirono, Maganu tenne assineemmo gede digiddeessannonke. (Marro 30:19, 20; Iyyaasu 24:15) Kuni ninke mittu mittunku banxe doodhineemmo doorshaati.
