ATINO heeshsho giwisseennahe reyo halchite egennootto? Hatto ikkiro, Adiriyaana qarri leellahera dandaanno. Akimootu isera bayicho assidhino yaaddo nooseta kultinose.

Jaappaanete gobbahu Kaaoruu yinanni manchi, geedhinorenna dhiwamino annasinna amasi towaaxxa hasiissinosi. Isi togo yiino: “Hatte yannara loosu basera iillannoe fonqoli wolqaꞌyara aleenni ikkinoe. Gale hosanni sagale giwisie; qoleno goxichu giwie. Hakko daafira, ‘Reyommoro fooliishshiꞌreemmo’ yee heda hanafummo.”

Ojeboodi yinannihu Nayijeeriyu gobba manchi togo yiino: “Woꞌmanka woyite dadille wiꞌleemmo; konni daafira aneneeto sheemmo gara hasiꞌra hanafummo.” Ojeboodi, Kaaoruuno ikko Adiriyaana insaneeto dishiino; tini hagiirsiissannote. Ikkollana diru kiiro 800,000 meddi yaanno manni insaneeto shaanno.

Insaneeto shaanno manni giddo rooriidihu labballoho; insa giddo batinyu wolootu kaaꞌlitannonsa gede xaꞌmiꞌra saaltanno. Yesuusi dhiwantinorira xagisannohu hasiisannota coyiꞌrino. (Luqaasi 5:31) Konni daafira, atino lowo geeshsha hexxo mudhite ateneeto shaate heddanni noottoha ikkiro, ballo woloota kaaꞌlo xaꞌmiꞌra saalfattooti. Quwa saꞌino yaaddo waaddannohu batinyu manni, xagisiꞌre beedho afiꞌra dandiino. Ojeboodi, Kaaoruunna Adiriyaanano akime uyitinonsa kaaꞌlo adhite beya afidhino.

Akimootu quwa saꞌino yaaddo noonsare xaggatenni woy giddonsata hasaaphitanno gede assite (toki teraappii yinanni ogimma) woy lamenta ogimma mitteenni horoonsidhe xagissara dandiitanno. Quwa saꞌino yaaddo noonsare maatensanna jaallansa cincite shaqqillunni kaaꞌlanna qarransa huwata hasiissannonsa. Baalunkunni roorino jaali Magano Yihowaati; isi Qaalisi Qullaawu Maxaafi widoonni togoo manna irkisanno.

Quwa saꞌino yaaddo noonsa manni seeda yanna xagicho adhanna heeshshonsa giddo mito coye biddi assiꞌra hasiissannonsaha ikkara dandaanno. Ateno quwa saꞌino yaaddo waaddannoheha ikkiro, Ojeboodi gede albillitte daggannota hagiirsiissanno yanna hexxotenni agadha dandaatto. Isi togo yiino: “Isayaasi 33:24te nooti uullate aana ‘Dhiwamoommo yaannoha dianfanni’ yitanno masaalo woꞌmitanno yanna quqquxame agadheemmo.” Atino Maganu “dadillu” heeꞌrannokkita ‘haaro baatto’ abbeemmo yee uyino hexxonni shesho afiꞌra dandaatto. (Yohaannisi Ajuuja 21:1, 4) Tini hexxo surrete xissonna dadilli baalu heeꞌrannokkita kultanno. Xa waaddanni noohe xisso hegerera baꞌanno. Hakkawoyite tenne xissokki ‘hawatto’ hattono ‘horonta diqaagatto.’—Isayaasi 65:17.