Xiinxalloottore qaaga qarra ikkite egentinohe? Ninke baalunkura mito woyite tini qarra ikkitannonke. Ikkina maa assa dandaatto? Qara qara hedo galagalte laꞌꞌa kaaꞌlitannohe.

Xiinxallatto woyite, lowo geya hasiissanno hedo huwatate boode geya taxxi yii. Soqqamaasinchu Phaawuloosi isi borreessino sokka nabbawanno manni hatto assanno gede kaaꞌlino gara wodanchi; isi, “Hasaambeemmohu qaru coyi konneeti” yee borreessino. (Ibi. 8:1) Konni garinni, insa mayinoro huwattanno gedenna isi coyiꞌrinohu baalunku coyi afiꞌrino xaadooshshe huwattanno gede kaaꞌlinonsa.

Atino xiinxallittohu gedensaanni, tonnu daqiiqi geeshsha gaaꞌmite qara qara hedo hiinca dandaatto. Nabbawootto hedo qaaga hoogittoro, cinaancho hedo wirro laꞌꞌa woy mitte mittenta gufota umi fooliishsho wirro laꞌꞌa dandaatto. Haaro hedo huwatittoro, hattee hedo umikki yaattonni xawisate woꞌnaali. Qara qara hedo wirro laꞌꞌakki xiinxalloottore qaagatto gede calla ikkikkinni, loosu aana hosiisatto gara afateno kaaꞌlitannohe.