HEEꞌNOOMMOHU gibbo woꞌmitino alamera ikkino daafira, keere afiꞌrate sharrama hasiissannonke. Heeshshonkenni shiima keere afiꞌnoommoha ikkiro, kuni keeri baꞌꞌannonkekki gede sharrammeemmo. Qullaawu Maxaafi halaalaanchonna geedanno keere afiꞌra dandiineemmo gara kulannonkehu hiittoonniiti? Wolootu keere afidhanno gede kaaꞌla dandiineemmohu ma garinniiti?

Addu keere afiꞌnoommo yinannihu beꞌe yinummokkinna mansummokki heeꞌneemmoha ikkirooti. Togoo keere afiꞌrate wolootu ledono dancha jaalooma kalaqira hasiissannonke. Baalunkunni roore, geedanno keere afiꞌrate Yihowa ledo muli jaalooma kalaqira hasiissannonke. Togo assa dandiineemmohu hiittoonniiti?

Keeraancho ikkitinota Yihowa hajajonna seerubba ayirrinseemmoha ikkiro, iso addaxxineemmotanna isi ledo muli jaalooma kalaqira hasiꞌneemmota leellinsheemmo. (Erm. 17:7, 8; Yai. 2:22, 23) Hatto assinummoro isi ninkewa shiqqi yaanno, hattono giddiidi keere oye maassiꞌrannonke. Isayaasi 32:17 togo yitanno: “Keeraanchimmate loosi keere abbanno; keeraanchimmate gumino, hegerera hawaqiꞌne heeꞌnanni gede assanno.” Yihowara wodaninni kaꞌne hajajammummoro giddiidi keere afiꞌneemmo.—Isa. 48:18, 19.

Qoleno geedote keere afiꞌneemmo gede kaaꞌlannonkehu iimi Anninke aannonkehu mittu baxxino aamamooshshi no; kuni aamamooshshi qullaawa ayyaanaati.—Soq. 9:31.

Soqqamaasinchu Phaawuloosi ‘qullaawu ayyaani laalanno’ gumma kuli woyite sayikkimeeshsho qummi assinohu keereho. (Gal. 5:22, 23) Addu keeri Maganu ayyaani laalanno guma ikkino daafira, togoo keere afiꞌrate qullaawu ayyaaninni massagama hasiissannonke. Hanni Maganu ayyaani keere afiꞌneemmo gede kaaꞌlannonketa lame doogga laꞌno.

 Umihunni, qullaawu ayyaaninni borreessinoonniha Maganu Qaale ganyine nabbambeemmoha ikkiro keere afiꞌneemmo. (Far. 1:2, 3) Qullaawu Maxaafi sokka hiincineemmoha ikkiro, qullaawu ayyaani babbaxxitino haja daafira Yihowara noosi lao huwanteemmo gede kaaꞌlannonke. Lawishshaho, Maganu keeresi agadhe heeꞌrino garanna isi keere baxannohu mayiraatiro huwanteemmo. Maganu Qaalinni afiꞌnoommoha konne roso loosunni leellinsheemmoha ikkiro, heeshshonke giddo lowo keere afiꞌneemmo.—Law. 3:1, 2.

Layinkihunni, qullaawa ayyaana afiꞌrate Magano huucciꞌra hasiissannonke. (Luq. 11:13) Yihowa kaaꞌlannonke gede huucciꞌnummoro, “Mannu hedora aleenni ikkinohu Maganu keeri, Kiristoosi Yesuusinni [wodanankenna hedonke]” agarannota coyiꞌrino. (Fil. 4:6, 7) Qullaawa ayyaana afiꞌrate ganyine Yihowa huucciꞌneemmoha ikkiro, Isi giddiidi keere aannonke; togoo keere afidhannori Yihowa ledo danchu jaaloomi noonsare callaho.—Rom. 15:13.

Konninni aanchine Qullaawu Maxaafi aanno amaale harunsite, giddiidi keere afidhinori, hattono Yihowanna mannu ledo dancha aante kalaqidhinori lawishsha laꞌneemmo. Kuni manni togoo keere afiꞌranno gede kaaꞌlinonsari maati?

Kiristaanu songora noori giddo mitootu, konni albaanni ‘hanqaaleeyyete;’ xa kayinni wolootu ledo noonsa aante laꞌniro, mannaho heddannore, danchuulle, cincitannorenna keere baxxannore ikkitino. a (Law. 29:22) Hanni xa hanqo qeeꞌlite wolootu ledo dancha aante kalaqidhinori lame Maganu Mangiste halashshaano lawishsha laꞌno.

Deevidi alba gara ikkitinokki lao noosi daafira mannu ledo garunni dihasaawanno. Isi heeshshosi Yihowara sayise aara albaanni, kairira baalaho woloota bushiishanno, hattono maatesi ledo giwamanno. Yannate gedensaanni kayinni Deevidi soorramme keere baxannoha ikkino. Isi togoo keere afiꞌrinohu hiittoonniiti? Deevidi togo yiino: “Heeshshoꞌya giddo Qullaawu Maxaafi seera harunsa hanafoommo; tini qolte maateꞌya ayirriseemmo gede kaaꞌlitinoe.”

 Richeeli lossinoonnise gari, gara ikkitinokki lao heedhannose gede assinose. Ise togo yitino: “Lophoommahu hanqitanno maate giddo ikkino daafira, xa nafa mito woyite hanqo qeeꞌla qarrissannoe.” Ise keere afidhanno gede kaaꞌlinoseri maati? Richeeli “Yihowa kaaꞌlannoe gede ganye huucciꞌraꞌya tennera kaaꞌlitinoe” yitino.

Deevidinna Richeeli woꞌnaalshi, Qullaawu Maxaafiha xintu seera harunsanna qullaawu ayyaani kaaꞌlannonke gede huuccatto assiꞌra, keere afiꞌrate kaaꞌlitannota leellishshanno woꞌnaalshuwa giddo gamaholla. Ee, heeꞌnoommohu gibbo woꞌmitino alamera ikkirono, maatenkenna ammanate roduuwinke ledo sumuu yine heeꞌneemmo gede kaaꞌlannonkeha giddiidi keere afiꞌra dandiineemmo. Yihowa “mannu baalu ledo keere heedhe” yee hajajinonke. (Rom. 12:18) Kayinni togo assa dandiinanni? Mannu baalu ledo keerunni heeꞌrate sharrama maaho kaaꞌlitanno?

Soqqammeemmo woyite, mannu keeraancho ikkitinote Maganu Mangiste sokkanni horo afiꞌranno gede koyinsanni heeꞌnoommo. (Isa. 9:6, 7; Mat. 24:14) Batinyu manni tenne sokka macciishshe adhino; tini hagiirsiissannote. Konninni kainohunni, insa mannu assanna laꞌanno coyinni hexxo dimudhitanno, hattono digiirantanno. Qoleno albillittete hagiirsiissanno hexxo afidhino, hattono ‘keere harunsitanno.’—Far. 34:14.

Umi qara sokkanke macciishshe adhannohu baalanka manna diꞌꞌikkino. (Yoh. 3:19) Ikkirono, Maganu ayyaani insara dancha duduwo keerunninna ayirrinyunni kulleemmo gede kaaꞌlannonke. Konni garinni Yesuusi Maatewoosi 10:11-13 aana hajajinonke hajajo agadhineemmo. Isi togo yiino: “Manni minira eꞌinanni woyite, ‘Keeru ledoꞌne heeꞌro’ yiiyye. Mini manni keereꞌne adhiro keeriꞌne iillonsa; keereꞌne gibbannoha ikkiro kayinni keeriꞌne kiꞌneranni higo.” Mannu kulleemmo sokka adha giwanno woyite Yesuusi lawishsha harunsanke keerinke baꞌꞌannokki gedenna sokkanke adha giwino mancho danchu garinni kaaꞌlineemmo faro afiꞌrate kaaꞌlitannonke.

Silxaane noonsariwa shinqeemmo woyite loosonke gibbannore ikkiturono ayirrinyunni hasaawisa hasiissannonke. Lawishshaho, mitte Afiriku gobbara gashshaano loosonke beebba gibbino daafira, Gambooshshu Addaraashe minnannita hooltino. Konne qarra tirate, alba hatte gobbara misiyoone ikke soqqamino rodii Ingilaandete gobbara, Lendenete katamira nooha hatte gobba ambaasaadericha mare hasaawisanno gede assinoonni. Konne rodoo sonkoonnihu ambaasaaderichaho Yihowa Farciꞌraasine loosi keerunniha ikkinota kulanno gedeeti. Ikkina tini mayi guma abbituyya?

Hakku rodii togo yiino: “Wosina haaꞌnanni kifile marummo woyite hakko loossanno mancho uddidhino uddano hiikkonne afoo coyidhanno gosa uddidhannotero wodanchummo; ani qole hatte gosa afoo rosoommo. Hakkiinni mancho umise afiinni keere haaꞌrummo. Ise dhagge assidhe, ‘Kawira mayira dayootto?’ yite xaꞌmitue. Anino ambaasaadericha hasaawisa hasiꞌreemmota shaqqillunni kulummose. Hakkiinni ise ambaasaaderichaho silke bilbilteenna daye hatte gobba afiinni keere haaꞌrie. Ani Yihowa Farciꞌraasine loossanno loosi daafira xawisanna seekke macciishshie.”

Kuni rodii ambaasaadericha ayirrinyunni hasaawisasi, ambaasaaderichu loosinke daafira noosita gara ikkitinokki lao biddi assiꞌranno gede assitino. Shiima yanna gedensaanni, hattenne Afiriku gobba gashshooti Yihowa Farciꞌraasine Gambooshshu Addaraashe miꞌnitanno gede fajjino. Hatte yannara roduuwu lowo geeshsha hagiidhitinoti egennantinote! Ee, woloota ayirrisa lowo horo afidhino, hattono keeru heeꞌranno gede assitanno.

Xaa yannara, Yihowa manni heeꞌrannohu keeru woꞌminote ayyaanaamittete gannateraati. Atino heeshshokki giddo ayyaanu guma ikkinoha keere laalate sharramattoha ikkiro, Maganu manni mereero noo keeri lexxanno gede kaaꞌlatto. Baalunkunni roore, Yihowa hagiirsiisatto, hattono Maganu abbannote haaro alamera geedannoha bae keere afiꞌratto.—2 Phe. 3:13, 14.