Xiinxallate qixxaambeemmo woyite, xiinxallonkenni ronseemmo coyi heeꞌranno yine heda dandiineemmo. Kayinni Yihowa ninke hendeemmohunni baxxino coye rosiisankera dandaannota qaaga hasiissannonke. Ikkina xiinxallineemmo woyite Yihowa rosiisannonkere macciishsha dandiineemmohu hiittoonniiti?

Hayyo afiꞌrate Yihowa huucciꞌri. Yihowa xa maa rosattora hasiꞌrannoro huwatatto gede kaaꞌlahera huucciꞌri. (Yai. 1:5) Konni albaanni afoottorinni kassi yitooti.—Law. 3:5, 6.

Maganu qaali afiꞌrino wolqa addaxxi. “Maganu qaali lubbo afiꞌrinoho.” (Ibi. 4:12) Lubbo afiꞌrinoha Maganu ‘qaale’ yannate kiiro nabbambeemmoha ikkiro addi addi doogganni kaaꞌlannonke; kayinni tenne horo afiꞌrate Yihowa rosiisannonke rosi hasiisannonkeha ikkinota ammanne adha hasiissannonke.

Yihowa rosiisannonke rosi baalaho galanteemmore ikkino. Yihowa shiqishannonketi ayyaanaamittete sagale ‘jilu’ gedeeti. (Isa. 25:6) Baxisa hoogaera dandaanno yite konne ‘jila’ agurte saꞌooti. Maganu qixxeessanno jili kaaꞌlannoheha calla ikkikkinni godowinta hagiidhatto gede assannohe!