Masaalo 5. Baattote Daafama

“Baatto huntannore hunatto yanna iillitu.”—YOHAANNISI AJUUJA 11:18.

● Nayijeeriyaho Kipoori qachira heeꞌrannohu Misteri Piiri, saattu haqqenni fultanno woyine daddaꞌle heeꞌranno manchooti. Nijeri Lagi laayyo giddora duꞌnantannoti nadaajete zayite Misteri Piiri looso baasa daaffino. Isi togo yiino: “Nadaajete zayite qulxuꞌmenke shite guddino, bisonke gawajjitino, hattono lagganke daaffino. Loosiꞌre heeꞌreemmori woluri dinoe.”

TAJE MAA LEELLISHSHANNO? Mite xiinxallaano yitanno garinni, diru dirunku 6.5 miliyoone toone ikkanno ishini wuqiyaanoosete giddora eanno. Konni ishini giddo xibbunni mite 50 anga ikkitannoti laastikete woy peestaalete; laastike maniidhannohu qole lowo xibbi diri gedensaanniiti. Mannu ooso baatto daaffanni nootano agurranna, kalaqamu jiro mucuqqi assite guddanni no. Xiinxallo leellishshanno garinni, mannu mittu diri giddo horoonsiꞌrino jiro baatto wirro qoltannohu mittu dirinna ontu agani giddooti. Sidinii Morning Heeraald yinannihu Awustiraaliyu gaazeexi kulanno garinni, “Dagate kiiro togo lexxitanni hadhannoha ikkironna mannu kalaqamu jiro konni garinni horoonsiꞌra agurannokkiha ikkiro, 2035nni Baattote geeshshiti lame pilaaneete hasiissannonke.”

MITU MANNI KAYINNI MAYYAANNO? Manchu beetti hayyicha ikkino daafira, mala dihooganno. Konne qarra tiranna baatto gatisa dandiineemmo.

HATTO YAANSA GARAHO? Mitu chaachaaru manninna addi addi gaamo, qooxeessu daafama daafira mannaho kultanni keeshshitino. Ikkollana, baatto xaano lowo geeshsha daafantannilla no.

TENNERA ATI MAYYAATTO? Uyino hexxo garinni mereero eꞌꞌe baatto baotenni gatisannohu Magano calla dilawannohe?

Qullaawu Maxaafi kageeshsha laꞌnummota onte masaalono agurranna, goofimarchu diro danchu danchuri ikkannotano masaalino. Hanni leekki masaalora mitto lawishsha laꞌno.

[Murre Haaꞌnoonni Hedo]

“Shiima gannateꞌya haaꞌne hoolle hadhaamo ishine duunnoonni bayicho uyinoonnieha lawinoe.”​—AMEERIKAHO BAARU QACCERA HEEDHANNOTI IRIINI TAAMBERI, 2010NNI MEKISKOTE BAARU QASIISORA NADAAJETE ZAYITE DUꞌNANTE ABBITINO GAWAJJO DAAFIRA COYIDHINORE.

[saaxine]

Magano Busha Assa Hasiissanno?

Yannankera alamete aana ikkanni nooha busha coye Qullaawu Maxaafi balaxe masaalino daafira, togoo coye abbinohu Maganoho yaateni? Qarru amadannonke gede assannohu isooti? Yihowa Farciꞌraasine qixxeessitinohu Qullaawu Maxaafi Addinta Mayyee Rosiisanno? yaanno maxaafira fooliishsho 11 tenne xaꞌmuwara duushshitanno dawaro afiꞌratto.

[Buicho]

U.S. Coast Guard photo