1, 2. Yesuusi Niisaani 14, 33 M.D. hashsha ma assino? (Umi misile lai.)

 NIISAANI 14, 33 M.D., Yerusaalamete dukkaadure fulte no. Isiraeele 1,500 diri albaanni Gibitsete borojjimmanni fultinota qaagate, Yesuusinna hawaariyaatesi hakko hashsha Faasika ayirrissino. Hakkiinnino Yesuusi 11 ammanantino hawaariyaate ledo heeꞌre, baxxino hurbaate xintino; hakku hurbaati Yesuusi hakko barri goofara albaanni reyanno reyo qaagiissannoho. a—Mat. 26:1, 2.

² Yesuusi galata shiqishe kae irsho nookki tima hawaariyaatete oye, “Hiiꞌe itte” yiinsa. Qoleno, woyinete uduunnicho haare xaano galata shiqishe kae togo yii: “Baalunku kawiinni agge.” (Mat. 26:26, 27) Yesuusi hakkiinni aanche insara wole sagale diuyino; kayinni hakkoye baxxino hashsha ammanantino harunsaanosira kulinori lowori no.

3. Konni birxichi giddo hiittee xaꞌmuwara dawaro afiꞌneemmo?

³ Yesuusi konni garinni reyosi Qaagooshshi Ayyaana xintino; konne ayyaana “Mootichu Hurbaate” yinanni wotino no. (1 Qor. 11:20) Mitu  manni tennera togo yee xaꞌmara dandaanno: Yesuusi reyo qaaga hasiissinohu mayiraati? Timunna woyinete tiro maati? Qaagooshshu Ayyaanira qixxaawa dandiineemmohu hiittoonniiti? Timanna woyine qamasa hasiissannonsari ayeooti? Kiristaanu hexxonsa kaffi asse laꞌꞌannota leellishannohu hiittoonniiti?

4. Yesuusi reyo mayi faro fantinonke?

⁴ Addaami sircho ikkinoommo daafira, cubbonna reyo ragiꞌnoommo. (Rom. 5:12) Guuntete xeꞌne noosihu aye manchino umisi daafira woy wolu manni heeshshora Maganoho wodo kaffale diafanno. (Far. 49:6-9) Ikkollana Yesuusi reyasinni xeꞌne nookki maalasinna duꞌnantino mundeesi ninkera wodo asse uyino. Yesuusi wodote waaga Maganoho shiqishasi, cubbunninna reyotenni gante hegere heeshsho elto afiꞌneemmo faro fantinonke.—Rom. 6:23; 1 Qor. 15:21, 22.

5. (a) Maganunna Kiristoosi mannu ooso baxxannota mayinni anfeemmo? (b) Yesuusi reyo qaagooshshira haꞌra hasiissannonkehu mayiraati?

⁵ Wodote kakkalo Maganu mannu ooso baxannota leellishshannote. (Yoh. 3:16) Yesuusi kakkalo, isino ninke lowo geeshsha baxannonketa leellishshanno. Isi uullara daara albaanni iima Maganoho “qara loosaasincho” ikke noo waro nafa ‘mannu ooso baxanno’! (Law. 8:30, 31) Maganohonna Beettisira galatu noonketa leellishate Yesuusi reyo Qaagooshshi Ayyaanira haꞌra hasiissannonke; konni garinni aante noota Yesuusi hajajo wonshineemmo: “Konne ayewoteno qaagooshshiꞌyara asse.”—1 Qor. 11:23-25.

6. Qaagooshshu Ayyaani timinna woyine daafira maa huwata hasiissannonke?

⁶ Yesuusi Qaagooshshu Ayyaana xinti yannara, timanna woyine maalisiranna mundeesira qole disoorrino. Isi timu daafira togo yiino: “Kuni maalaꞌyaati yaate.” Woyinete daafira qole togo yiino: “Tini lowo manni daafira duꞌnantannote ‘gondooru mundeeꞌyaati’ yaate.” (Marq. 14:22-24) Konninni buuxa dandiinanninte gede, timunna woyine lawishshu tiro afidhinote.

7. Qaagooshshu Ayyaanira shiqinshanni timi maa riqiwanno?

⁷ Hakkoye baxxino hashsha, Yesuusi Faasikaho qixxeessinoonniha irsho nookki tima horoonsiꞌrino. (Wol. 12:8) Qullaawu Maxaafi giddo irsho mito wote cubbo riqibbanno. (Mat. 16:6, 11, 12; Luq. 12:1) Yesuusi irsho nookki tima horoonsiꞌrasi maltinote; korkaatuno kuni timi xeꞌne nookki maalasi riqiwanno. (Ibi. 7:26) Konni daafira Qaagooshshu Ayyaanira qixxeessinanni timi hattooho.

8. Qaagooshshu Ayyaanira shiqinshanni woyine maa riqibbanno?

⁸ Yesuusi Niisaani 14, 33 M.D. horoonsiꞌrino woyine, mundeesi riqibbannote; yannankera Qaagooshshu Ayyaanira shiqqanno woyineno hattonni mundeesi riqibbanno. Yerusaalamete gobbaanni Golgoota yinanni bayicho Yesuusi mundee ‘cubboho maaro afiꞌneemmo gede’ duꞌnantino. (Mat. 26:28; 27:33) Qaagooshshu Ayyaani timinna woyine hajajamanno manni daafira shiqqinota Yesuusita muxxe kakkalo riqibbanno daafira, hattono tenne baxillu qixxaawo kaffi assine laꞌneemmo daafira, Mootichu Hurbaatira mittu mittunku qixxaawa hasiissannonke.

9. (a) Qaagooshshu Ayyaanita Qullaawu Maxaafi niwaawe nabbawa hasiissannonkehu mayiraati? (b) Wodote kakkalo daafira mayi macciishshamannohe?

⁹ Qullaawu Maxaafire Barru Barrunku Hasaawa yinanni buukileetera noo pirogiraame garinni Qaagooshshu Ayyaanita Qullaawu Maxaafi niwaawe nabbambe, Yesuusi reyara albaanni assinore hiinca dandiineemmo. Tenne assanke Mootichu Hurbaatira wodananke qixxeessiꞌrate  kaaꞌlitannonke. b Mitte rodoo togo yite borreessitino: “Qaagooshshu Ayyaana quqquxamme agadhineemmo. Kuni ayyaani diru dirunku lowo tiro afiꞌrinota huwanteemmo. Anniꞌya reeshshi noo mine uurre . . . baxeemma annaꞌya laꞌꞌanni wodote kakkalo daafira lowo geeshsha dhagge assiꞌre hedoomma yanna qulli yitannoe. . . . [Wodote daafira kultanno] xiqisubba baalanta afoomma; hattono tenne xiqisubba mannaho seekke xawisa dandeemma! Muxxe ikkitinoti wodote kakkalo assitannonke coyi daafira wodaniꞌya lowo geeshsha hagiidhinohu kayinni shiirumma woteeti.” Ee, Qaagooshshu Ayyaanira qixxaambeemmo wote, Yesuusi kakkalo cubbunninna reyotenni keere fushshitannonke gara hiinca hasiissannonke.

10. Qaagooshshu Ayyaanira qixxaawate wolere maa assa dandiineemmo?

¹⁰ Qaagooshshu Ayyaanira qixxaawate, soqqanshonke halashshiꞌrate lawishshaho Qaagooshshu Ayyaani woggara kaaꞌlaano suwisaano ikkate soma fushshiꞌrano hasiissannonke. Qullaawu Maxaafi rosaanonkenna woloota Mootichu Hurbaatira koyinseemmo wote, Maganunnire, Beettisirenna Yihowa hagiirsiissannorinna iso guwisidhannori albillitte afidhanno atootire wolootaho kulle lowo hagiirre afiꞌneemmo.—Far. 148:12, 13.

11. Mitu Qorontoosi Kiristaani Qaagooshshu Ayyaani timanna tsuuwa gariweelo itinohunna aginohu hiittoonniiti?

¹¹ Mootichu Hurbaatira qixxaawatto wote, hawaariya Phaawuloosi Qorontoosi Kiristaanira borreessino sokka deꞌooti. (1 Qorontoosi 11:27-29, 31 nabbawi; c 1 Qor. 11:30, 32-34) Phaawuloosi, hasiisisikkinni timanna tsuuwa qamasannohu aye manchino Mootichu Yesuusi Kiristoosi “bisinna mundee daafira [xaꞌmamannota]” coyiꞌrino. Konni daafira, mittu buuramino Kiristaanchi ‘hasiisannositanna teꞌee buuxate balaxe isonooto layiꞌra’ hasiissannosi; timanna woyine qamasa hasiissannosihu hakkuyi gedensaanniiti. Hakkuyi kaꞌa “umisira firde abbannore itanno, hattono aganno.” Batinyu Qorontoosi Kiristaani gara ikkinokki amanyootinsanni kainohunni ‘daafurtino, xiwantino, mitootu isinni [ayyaanaamittetenni] reyitino.’ Miteekkite insa giddo mitootu Qaagooshshu ayyaani yannara woy hakkuyira albaanni quwa saꞌe itansanninna agansanni surrensa woy ayyaanaamittensa daafurtinoha ikkara dandaanno.  Togooha gara ikkinokki amanyoote leellishansa Magano dadillissino.

12. (a) Phaawuloosi Qaagooshshu Ayyaana mayi ledo heewisiisino? Shiqanno timanna woyine qamassannore mayyee qorowisiisino? (b) Qaagooshshu Ayyaani timanna woyine qamasanno manchi kabbaade cubbo loosiro ma assa hasiissannosi?

¹² Phaawuloosi Qaagooshshu Ayyaana wolootu ledo intanni hurbaati ledo heewisiise, ittannore togo yee qorowisiisino: “Yihowa tsuuwanna agaanintete tsuuwa mitteenni aga didandiitinanni; qoleno, ‘Yihowa sagale’ beeqqaano ikkitine heedhinenni, agaanintete sagale beeqqaano ikka didandiitinanni.” (1 Qor. 10:16-21) Mootichu Hurbaati timanna woyine qamasannohu mittu manchi kabbaade cubbo loosiro, ayyaanaamittete kaaꞌlo hasiꞌra hasiissannosi. (Yaaqoobi 5:14, 16 nabbawi; d Yaq. 5:15) Togoohu buuramino manchi ‘maaro einota leellishanno guma laaliro,’ Qaagooshshu Ayyaani timanna woyine qamasasi Yesuusi kakkalo misha diꞌꞌikkitanno.—Luq. 3:8.

13. Maganu uyinonke hexxo daafira huuccatto assiꞌra hasiissannonkehu mayiraati?

¹³ Qaagooshshu Ayyaanira qixxaambeemmo wote, Maganu uyinonke hexxo daafira huuccatto assiꞌnanni heda hasiissannonke. Isonooto Yihowara sayise uyinohunna ammanaminoha Yesuusi rosaancho ikkino manchi, buuramino Kiristaancho ikkinota buuxissanno taje noosikkiha Qaagooshshu Ayyaani timanna woyine diqamasanno; hakkuyi kaꞌa tini Yesuusi kakkalo mulluri gede asse laꞌꞌate. Ikkina, mittu manchi Qaagooshshu Ayyaani timanna woyine qamasa hasiissannositanna teꞌee afa dandaannohu hiittoonniiti?

14. Haaru gondoorinna Qaagooshshu Ayyaani yannara timanna woyine qamasate mereero noo xaadooshshi maati?

¹⁴ Qaagooshshu Ayyaani timanna woyine qamasate qoosso noonsari, haaru gondoorira beeqqaasine ikkansa dihuluullantanno. Yesuusi woyinete daafira togo yiino: “Kuni tsuuwi mundeeꞌyanni xintamannoho haaro gondoorooti yaate.” (1 Qor. 11:25) Maganu hunda Isiraeelete ledo einohu Higgete gondoorinni baxxinoha wole haaro gondooro eannota masaalaanchu Ermiyaasi widoonni coyiꞌrino. (Ermiyaasi 31:31, 32 nabbawi; e Erm. 31:33, 34) Maganu haaro gondooro einohu ayyaanaame Isiraeele ledooti. (Gal. 6:15, 16) Kiristoosi kakkalo ikke reyasi konni gondoorira xinta ikkitino. (Luq. 22:20) Haaru gondoorira Mereerimu Yesuusaati; konni gondoorira beeqqaasine ikkitinori ammanantino buuramaasine iimi ragge afidhanno.—Ibi. 8:6; 9:15.

15. Mangistete gondoori beeqqaasine ikkitinori ayeooti? Insa ammanantinore ikkite heedhuro mayi qoosso afidhanno?

¹⁵ Qaagooshshu Ayyaani timanna woyine qamasate qoosso noonsari Mangistete gondoorira beeqqaasine ikkitara doorantinota affino. (Luq. 12:32) Buurantinorinna qarrisira beeqqaasine ikkitinori Yesuusi harunsaano isi ledo iimi gashshoote adhitanno. (Fil. 3:10) Ammanantino buuramaasine, Mangistete gondoori beeqqaasine ikkitino daafira Kiristoosi ledo iima nugussa ikkite hegerera mookkanno. (Aju. 22:5) Togoo Kiristaani Mootichu Hurbaati yannara timanna woyine qamasansa garaho.

16. Roomu Sokka 8:15-17 tiro maatiro haranchunni xawisi.

¹⁶ Qaagooshshu Ayyaani timanna woyine qamasa hasiissannonsari Maganu ooso ikkansa ayyaanu farciꞌrinonsare callaati. (Roomu Sokka 8:15, 16 nabbawi; f Rom. 8:17) “Anna” yine  tirroonnihu Phaawuloosi horoonsiꞌrinohu Aramayikete qaali, baxillenna ayirrinye leellishannoho. Kuni qaali buuramaasine ‘ooso ikkitinota leellishanno ayyaana’ adhitanno wote Yihowa ledo heeꞌrannonsaha baxxino fiixooma kulannoho. Maganu ayyaani ayyaaninsa ledo farciꞌranno daafira, insa buurantinore Yihowa ooso ikkansa buuxxanno. Hatto yaa insa uullate aana heeꞌra dibaxxanno yaa diꞌꞌikkino. Insa reyote geeshsha ammanantinore ikkituro Yesuusi ledo iimi Mangistera mookkannota dihuluullantanno. Kuni Kiristaani ‘qullaawu Magani Yihowa ayyaanunni buurinoreeti’; kuri 144,000 Kiristoosi harunsaano giddo xa uullate aana gattinori kiiro shiimate. (1 Yoh. 2:20; Aju. 14:1) Insa “Anna, Anna!” yite woshshitannohu Yihowa ayyaaninniiti. Ee, Maganu ledo kaajju fiixoomi noonsa!

17. Buurantinorira noonsa hexxo hiitteeti? Insa tenne hexxonsa ma garinni laꞌanno?

¹⁷ Ati buuramootto Kiristaanchootiro, iimira haꞌrate hexxo daafira ganyite huucciꞌrattoti egennantinote. Qullaawu Maxaafi iimi Idayichira Yesuusi Kiristoosira ‘huuccamate’ daafira coyiꞌranno wote, tini atere kultannota huwatte Kiristoosi “idayicho” wido ikkate quqquxamatto. (2 Qor. 11:2; Yoh. 3:27-29; Aju. 21:2, 9-14) Maganu Qaalisi widoonni, ayyaanaamitte oososi baxannota coyiꞌranno wote, “Hakku aneeti” yite hagiidhatto. Qoleno, Yihowa Qaali buurantino oososira biddishsha aanno wote, qullaawu ayyaani hajajamatto gedenna wodanikkinni “Kuni anino assa hasiissannoereeti” yaatto gede assannohe. Konni garinni, Maganu ayyaaninna ate ayyaani mitteenni iimira haꞌrate hexxo nooheta farciꞌranno.

18. ‘Wolu geꞌreewira’ noonsa hexxo hiitteeti? Tenne hexxo daafira mayi macciishshamannohe?

¹⁸ “Lowo daga” ikkinohu “wolu geꞌreewi” wido ikkittoro kayinni, Maganu atera uullate aana heeꞌrate hexxo uyinohe. (Aju. 7:9; Yoh. 10:16) Ati Gannatete hegerera heeꞌra halchatto; hattono Qullaawu Maxaafi albillitte uullate aana heeꞌnanni heeshsho daafira kulannore hiinca hagiirsiissannohe. Minikki manninna wolu keeraano manni ledo mitteenni hagiidhitanni salaametenni heeꞌratto yanna halchishshannohe. Hude, buxima, qarru, xiwanunna reyo baꞌanno yanna quqquxante agadhatto. (Far. 37:10, 11, 29; 67:6; 72:7, 16; Isa. 33:24) Uullate aana hegerera heeꞌrate hexxo afidhe reyotenni kaꞌannori ledo xaadatto yanna leeltannohe. (Yoh. 5:28, 29) Yihowa uullate aana heeꞌrate hexxo uyinohe daafira lowo geeshsha galatattosi! Qaagooshshu Ayyaani timanna woyine qamasattokkiha ikkirono, Yesuusi Kiristoosi kakkalora diniqo nooheta leellishate konne ayyaana ayirrinsanniwa haꞌratto.

19, 20. (a) Maganu uyinohe hexxo woꞌmitannohehu ma assittorooti? (b) Mootichu Hurbaatira haꞌrattohu mayiraati?

¹⁹ Hexxokki uullate aana heeꞌra woy iimira haꞌrano ikkituro, tini hexxokki woꞌmitannohehu Magano Yihowa, Yesuusi Kiristoosinna wodote kakkalo ammanattota loosunni leellishittoro callaati. Qaagooshshu Ayyaanira haꞌrakki, hexxokki daafiranna Yesuusi reyo mageeshshi geeshsha hasiissinoro hiincatto gede faro fantannohe. Konni daafira, Arbe Dotteessa 3, 2015 arrishsho eꞌu gedensaanni Mangistete Addaraasheranna wole bayicho alamete deerrinni lowo miliyoone ikkanno manni Mootichu Hurbaatira gamba yaanno wote daate mixo fushshiꞌri.

²⁰ Qaagooshshu Ayyaanira haꞌrakki Yesuusite wodote kakkalora noohe galati lexxanno gede assitahera dandiitanno. Shiqqanno nigiggire seekkite macciishshakki, mannaho Yihowa baxillirenna mannu oosora noosi alaama kulte olliichokki baxattota leellishatto gede kakkayissahera dandiitanno. (Mat. 22:34-40) Konnira, Mootichu Hurbaatira haꞌrate murcidhe kai.