1. Yihowa galatu hasiisannoho yineemmohu mayiraati?

 “DANCHA eltonna guuta atoote baalanka” aannonke Magani Yihowa galatu hasiisannosiho. (Yaq. 1:17) Isi baxillaancho Allaalaanchonke ikkino daafira, maalaamittete ikko ayyaanaamittete hasiisannonkere shaqqillunni aannonke. (Far. 23:1-3) Isi roorenkanni qarrinke yannara “golonkenna wolqanke” ikkanno! (Far. 46:1) Ee, faarsaanchu borreessinote aante noo assaawe ledo sumuu yineemmo gede assannonkehu lowo korkaati no: “Yihowa galatte, isi danchahona; baꞌꞌannokki baxillisino hegerera kaajje uurranno.”—Far. 106:1.

2, 3. (a) Afiꞌnoommo atoote mulluri gede asse laꞌꞌa abbitanno qarri maati? (b) Konni birxichira hiittee xaꞌmuwa laꞌneemmo?

² Yihowa galatate daafira seekkine heda hasiissannonkehu mayiraati? Balanxe masaalloonninte gede, tenne goofimarchu barruwara heeꞌranno manni galatu nookkiha ikkino. (2 Xim. 3:2) Batinyu manni noonsa coye mulluri gede asse laꞌꞌanno. Heeꞌnoommo alame, lowo miliyoone ikkanno manni noonsa coyinni kassi yaa agure hasiisannonsahunni saino uduunne hidhanno gede xixxiibbannote. Tini galata baꞌꞌate hedo ninkerano saꞌankera dandiitanno. Hundi Isiraeele gede, ninkeno galata baꞌne Yihowa ledo noonkeha muxxe fiixoomanna isi uyinonke atoote naada hoongammora dandiineemmo.—Far. 106:7, 11-13.

³ Hanni buutote qarri iillannonke wote ma assinammora dandiineemmoro hedi. Hattoo yannara, qarru hedonke tunsiise amadaranna noonke atooti leella hoogankera dandaanno. (Far. 116:3) Ikkina, galanteemmore ikkanna kuni akatinke baikki heeꞌra dandiineemmohu hiittoonniiti? Qoleno, kabbaade qarri giddo heeꞌnoommo woteno hagiirrinke baꞌꞌannokki gede agadha dandiineemmohu ma garinniiti? Hanni laꞌno.

4. Ayewoteno galanteemmore ikka dandiineemmohu hiittoonniiti?

⁴ Galanteemmore ikkanna kuni akatinke baikki heeꞌrara hasiꞌneemmoha ikkiro, Yihowawiinni afiꞌnoommo atoote dhagge assiꞌne hiincanna isi baꞌꞌannokki baxillisinni assinonkere seekkine heda hasiissannonke. Faarsaanchu konni garinni hiincasi, Yihowa assinohu dhaggete coyi lowoha ikkinota huwatannonna maalaꞌlanno gede assitinosi.—Faarso 40:5⁠a a nna 107:43 nabbawi. b

5. Galanteemmore ikkate daafira hawaariya Phaawuloosiwiinni maa ronseemmo?

⁵ Galata hawa hoogate daafira hawaariya Phaawuloosiwiinni lowore ronseemmo. Phaawuloosi duucha hige Yihowa galatino daafira, isi afiꞌrino atoote hiincannoha ikkinoti egennantinote. Isi alba “xonamannoha, darammanni gede assannohanna booꞌnaleessa” ikkinota dideino. Konnira, isi Maganunna Kiristoosi bashsho cubbosi maarte soqqanshote qoosso uyitinositera galatino. (1 Xim. 1:12-14) Qoleno Phaawuloosi ammanate roduuwasi lowo geeshsha naadanno, hattono danchu akatinsaranna ammanante soqqantanno daafira Yihowa ganye galatino. (Fil. 1:3-5, 7; 1 Tes. 1:2, 3) Phaawuloosi qarra ikkannori tuncu yaannosi wote, hasiissannosi kaaꞌlo ammanate roduuwisi widoonni afiꞌrannotera bayichonko Yihowa galatanno. (Looso 28:15; 2 Qor. 7:5-7) Hakko daafira, Phaawuloosi Kiristaana togo yee amaalasi garankolla: “Galattinannire ikkaꞌne leellishshe . . .  qoleno faarsotenni, Maganoho guweenya uyitine, hattono galatunnita ayyaanaame faarso faarsitine mimmito jawaachishshe.”—Qol. 3:15-17.

6. Ati roorenka Yihowa galatattohu maahooti?

⁶ Phaawuloosi lawishsha harunsine galanteemmore ikka dandiineemmohu hiittoonniiti? Phaawuloosi gede ninkeno, Yihowa ninkera gilletenni assinonkere hiinca hasiissannonke. (Far. 116:12) ‘Yihowa maa maaho galata hasiꞌratto?’ yine xaꞌminihero mayite qolatto? Kulatto coyi giddo mittu Yihowa ledo nooheha muxxe fiixooma ikkara dandaanno. Woy Kiristoosita wodote kakkalo ammanakkinni afiꞌrootto maaro qummi assattoha ikkanno. Qoleno, qarrikki yannara irkissinohe roduuwa kulattoha ikkara dandaanno. Baxatto galtekki woy muxxe oosokki kulittokki saꞌꞌattokkitino egennantinote. Baxillaanchu Annikki Yihowawiinni afiꞌroottoha togooha kaajja atoote yanna gaaꞌmite hiincakki, galatu batiꞌrannohe gedenna barru baala galatatto gede kakkayissannohe.—Faarso 92:1, 2 nabbawi. c

7. (a) Galatu huuccatto assiꞌra hasiissannonkehu mayiraati? (b) Yihowa huuccattotenni galata uyitannohe horo hiikkuriiti?

⁷ Afiꞌnoommo atoote hiincineemmoha ikkiro,  huuccattotenni Yihowa galata hasiꞌneemmoti egennantinote. (Far. 95:2; 100:4, 5) Duuchu manni huuccatto assiꞌrannohu Magano mitore huucciꞌrate callaati. Ninke kayinni, Yihowa uyinonke atootira galantummosiro hagiidhannota anfoommo. Qullaawu Maxaafi, Magano galatate yine assiꞌnoonnita batinye huuccatto amadino; kuri giddo Haannanna Hiziqiyaasi huuccatto no. (1 Sam. 2:1-10; Isa. 38:9-20) Ninkeno kuri ammanantino soqqamaano lawishsha harunsine galanteemmore ikka hasiissannonke. Ee, afiꞌrootto atootira huuccattotenni Yihowa galati. (1 Tes. 5:17, 18) Konne assakki lowo horo uyitannohe. Dancha simmeete macciishshantannohe, Yihowara noohe baxilli lexxanno, hattono isiwa albinni roore shiqatto.—Yaq. 4:8.

8. Yihowa assinonke coyira diniqo baꞌannonke gede assara dandaannori maati?

⁸ Qoropha hoongummoro, Yihowa uyinonkete dancha eltora noonke diniqo baꞌara dandiitanno. Mayira? Korkaatuno guuntete xeꞌne noonke daafira galata baꞌꞌate dooꞌꞌo noonkereeti. Umi annankenna amanke ikkinore Addaaminna Heewani, hunda gannatete worroonninsa. Hakkiicho hasiisannonsare baalankare uyinoonninsa; hattono salaametenni hegerera heeꞌrate faro faꞌnantinonsa. (Kal. 1:28) Insa kayinni afidhino atoote dinaaddino. Hafuurte wolere yortino. Tini qolte noonsare baalankare hoogganno gede assitinonsa. (Kal. 3:6, 7, 17-19) Ninkeno heeꞌnoommo alame galatu nookkita ikkitino daafira, Yihowa assinonkeri leella hoogankera dandaanno. Isi ledo noonke fiixooma mulluri gede assine laꞌꞌa jammarrammora dandiineemmo. Alamete deerrinni noohu roduuwu maamari miilla ikkate qoossonkera diniqo baꞌankera dandiitanno. Baꞌara kaꞌe noote tenne alame giddo noo coyibba illachisha jammarrammora dandiineemmo. (1 Yoh. 2:15-17) Tenne woshshaadonni gatate, afiꞌnoommo atoote hiincanna Yihowa mannisi widira kiirammeemmo gede assinonketera ganyine galata hasiissannonke.—Faarso 27:4 nabbawi. d

9. Buutote qarri tuncu yaannonke wote, noonke atoote hiinca hasiissannonkehu mayiraati?

⁹ Galanteemmore ikkanke qarru yanna dandiine saꞌneemmo gede kaaꞌlitankera dandiitanno. Heeshshonke giddo buutote qarri hedeweelcho tuncu yaannonke wote lawishshaho, galtenke ninkera ammanantukki gattanno wote, lowo geeshsha xiwammeemmo  wote, shiiꞌneemmo wote, woy kalaqamu dano gawajjitannonke wote coyi wolqankera aleenni ikkinoha lawankera dandaanno. Togoo yannara, noonke atoote hiincanke sheshifachishshannonke, hattono wolqa ikkitannonke. Hanni aante noo temokkiruwa laꞌno.

10. Iriina noose atoote hedase kaaꞌlitinosehu hiittoonniiti?

¹⁰ Hanni Aliyye Ameerikira heedhannote Iriina e yinannite woꞌma yanna suwisaanchora iillinore laꞌno. Cimeessa ikkinohu minaannise isera ammanamikki gatino; hakkiino sae, isenna oosonsa hune haꞌrino. Iriina Yihowara soqqamase agurtannokki gede kaaꞌlinoseri maati? Ise togo yitino: “Yihowa ane gilletenni towaatannoeta lowo geeshsha naadeemma. Nooe atoote barru barrunku hedaꞌya, agaraanchu iimi Anninke afinoetanna baxannoeta ikkaꞌya lowo qoosso ikkitinota huwateemma gede assitannoe. Isi horonta tuge agurannoekkita afoomma.” Iriinara heeshshose giddo batinyu dadillisanno coyi iillinoseha ikkirono, hagiirrise baꞌꞌannokki gede agadhase dandiite heedhanno gedenna woloota jawaachishshanno gede kaaꞌlitinose.

11. Kiyongisuuki amadinoseha buutote dhibba dandiitanno gede kaaꞌlinoseri maati?

¹¹ Iisiyaho heedhannoti Kiyongisuuki minaannise ledo suwisaancho ikkite 20 saꞌꞌanno diro soqqantino. Kayinni hedeweelcho, shombu kaansere amaddinosetanna xaate lubbote heedhannohu sasunni lewu agani geeshsha ikkinota kullise. Iseranna minaannisera wolu lowo qarri iillinonsaha ikkirono, ordu fayyimmansa daafira kayinni yaade diegennino. Ise togo yitino: “Kuni dhibbi lowo geeshsha masisinoe. Nooere baalankare hoogoommahu gede ikke macciishshaminoe, hattono lowo geeshsha waajjoomma.” Kiyongisuuki konne baala dandiitanno gede kaaꞌlinoseri maati? Togo yitino: “Hashshu baala goxammara albaanni, mininkera iimaanni fule hakko barra afiꞌroommaha onte coye kule qoonqoꞌya gotti asse Yihowa galateemma. Konne assaꞌya sheshifachishshannoe; hattono Yihowara nooe baxille kuleemma gede kakkayissannoe.” Kiyongisuuki hashshu baala assidhanno huuccatto kaaꞌlitinosehu hiittoonniiti? Ise togo yitino: “Yihowa qarrinke yannara wolqa ikkannonketanna afiꞌnoommo atooti iillannonke qarrinni roorannota huwata dandoomma.”

12. Jeeseni minaama shiiri gedensaanni shesho afiꞌrinohu hiittoonniiti?

¹² Afirikaho noote mitte sinu biironkera soqqamannohu Jeeseni, 30 saꞌꞌanno diro woꞌma yanna soqqansho giddo keeshshino. Isi tuncu yiinosire kulanni togo yiino: “Lamalu diri albaanni minaamaꞌya shiiroommo; xisso lowo geeshsha kabbaade ikkitinoe. Ise amaddinose kaansere mageeshshi geeshsha shetissinosero hedeemmo wote, lowo geeshsha xissiisiꞌreemmo.” Jeeseni konne baala dandaanno gede kaaꞌlinosiri maati? Togo yiino: “Mitte yannara, aninna minaamaꞌya mitteenni hagiirrunni sayinsoommo yanna qaagummo; hakkiinni hattee yanna qaageemmo gede assinoe daafira huuccattotenni Yihowa galatummo. Tini sheshifateemmo gede assitinoe; hakkiinni jammare togoote hagiirsiissanno yanna daafira Yihowa ganye galata jammarummo. Galateemmoha ikkaꞌya laoꞌya lowo geeshsha soorritinoe. Xaano ikkiro lowo geeshsha xissiisiꞌreemmo woti no; ikkirono, alba dancha galte nooe daafiranna Yihowa lubbora baxxanno galteꞌya ledo isira soqqamoommotera iso galataꞌya laoꞌya woyyaabbanno gede assitinoe.”

13. Sheriili maatese giddo roore manna shiidheenna iillitinose xisso dandiitanno gede kaaꞌlinoseri maati?

¹³ Hayeni yinanniti buutote hambabalatte 2013⁠nni Filippiinsi gantu yannara, Sheriili yinanni qaaqqo noosere baalankare hooggino yaa dandiinanni. Hakkawote 13 diro ikkinoseti tini qaaqqo togo yitino: “Mininke diigame bai, maateꞌya giddonnino roore manna shiirumma.” Annise, amasenna sasu roduuwise tenne danonni reyitino. Sheriili konne buutote qarra dandiitanno  gede kaaꞌlinoseri maati? Ise noose atoote deꞌukkinni Yihowa galattanno. Togo yitino: “Baalunku roduuwi kaaꞌlo hasiissinore irkisatenna jawaachishate assitinore baalankare laoomma. Alame woꞌmate noo roduuwi ane daafira huuccatto assitanni nootano afoomma.” Ise ledde togo yitino: “Yihowa Maganoꞌya ikkino daafira lowo geeshsha galaxxeemmasi. Isi ayewoteno hasiisannonke coye aannonke.” Ee, noonke atoote dea hooganke dadillisanno coye dandiineemmo gede wolqa ikkitannonke. Galanteemmore ikkanke baxi qarri iillinkerono albillitte qaanfeemmo gede kaaꞌlitannonke.—Efe. 5:20; Fil. 4:6, 7.

14. Albillittete yannara noonketi hagiirsiissanno hexxo hiitteeti? (Umi misile lai.)

¹⁴ Hundinni hanaffe Yihowa soqqamaano afidhino atootinni hagiidhitanno. Lawishshaho, Isiraeele Yihowa Duumu Baariwa Feriooninna saraawitesi anganni gatisinsahu gedensaanni, kaajja galatunna guweenyu faarso faarsite hagiirrensa leellishshino. (Wol. 15:1-21) Xaa yannara lowo geeshsha kaffi assine laꞌneemmo atootinke giddo mittu, dadillisannonkenna xissiisannonke coyi baalunkunni ganteemmo yanna daggannota kultanno hexxooti; tini hexxonke dihuluullissannote. (Far. 37:9-11; Isa. 25:8; 33:24) Yihowa diinnasi baalanta cancananno wotenna salaamenna keeraanchimma woꞌmitinota haaro alame eessannonke wote mayi macciishshamannonkero hanni hedi. Ee, hatti yanna Yihowara galatu batiꞌrannonkete!—Aju. 20:1-3; 21:3, 4.

15. Tayixe 2015⁠nni, diro woꞌma maa assate murcidhe kaootto?

¹⁵ Tayixe 2015⁠nni, Yihowawiinni kiirre tunqannikki atoote afiꞌneemmo yine hexxineemmo. Kayinni konne diro mitu qarrino iillankera dandaanno. Baxi coyi iillinkerono, Yihowa tuge agurannonkekkita anfoommo. (Marro 31:8; Far. 9:9, 10) Isi ammanamme isira soqqamate hasiisannonkere baalankare aannonke. Hakko daafira, ninkeno masaalaanchu Imbaaqoomite gedee hedo heedhannonke gede murciꞌne kaꞌno; isi togo yiino: “Belesete haqqicho laala hooggurono, woyinete haqqichora gumu hoogirono, ejersuno laala hoogiro, gate intanniri hoogirono, geꞌreewu gooꞌraani fano ikkirono, hadiro lalu hoogirono, anera kayinni Yihowanni tashshi yaannoe; gatisannoe Maganinnino hagiidheemmo.” (Imb. 3:17, 18) Ee, konne diro woꞌma noonke atoote hagiirrunni hiincino, hattono 2015⁠nniti diru xiqise yitannonkere assino: “Yihowa galatte, isi danchahona”—Far. 106:1.