MINAANNI minaamasi teesse heedhanno gede assa dandaannohu hiittoonniiti? Batinyu manni minaannihu qaru loosi minisi mannira maalaamittete hasiisannore shiqishate yee ammananno dagoomi giddo lophino. Ikkollana, maalaamittetenni qawaaxxiꞌre heeꞌrannohu mitu minaamuwira teese heeꞌranni noohu gede ikke dimacciishshamannonsa; isinni waajjanni heeꞌranno. Lawishshaho, Ispeenete gobbati Roosa yinanni mancho minaannise daafira togo yitino: “Isi gobba mannira dancha manchooti; mine kayinni kaajjadoho.” Nayijeeriyaho heedhannoti Joyi togo yite noore coyidhino: “Minaanniꞌya ledo sumuu yoommakki coyi heeꞌranno wote isi, ‘Ani minaannakki ikkummo geeshsha yeemmohere baala assa hasiissannohe’ yaannoe.”

Minaanni silxaanesi baxillunni horoonsiꞌra dandaannohu ma garinniiti? Qoleno, minisi minaamasira teesse heedhannoha woy “fooliishshote bayicho” ikkannose gede maa assa dandaanno?—Ruuti 1:9, lekkaalliidi qaagiishsha.

Maganu minaannanna minaama taashshe laꞌꞌannoha ikkirono, Qullaawu Maxaafi lamunkura mini giddo addi addi qeechi noonsata kulanno. Roomu Sokka 7:2 mine assidhino mancho “minaannise higge” hunda noota kultanno. Duucha dirijjitta albisa ikke addi addi hajonsa qineessanno mancho shoontannonte gede, Maganu minaanni minaamasira umo ikkanno gede shoomino. (1 Qorontoosi 11:3) Minaanni mini giddo albisa ikke marraꞌꞌa hasiissannosi.

Minaanna, Maganu uyinohe silxaane horoonsiꞌra hasiissannohehu hiittoonniiti? Qullaawu Maxaafi togo yaanno: “Minaannuwa, Kiristoosi songo baxinonna isonooto isera sayise uyinonte gede, kiꞌneno minaamuwaꞌne baxaꞌne agurtinoonte.” (Efesooni 5:25) Ee, Yesuusi Kiristoosi seenne adhe egenninokkiha ikkirono, isi lawishshi dancha minaanna ikkatto gede kaaꞌlannohe. Togo yineemmohu mayiraatiro hanni laꞌno.

Yesuusi woloota sheshifachishino hattono duhansa shaashshino. Yesuusi gadadaaꞌmitinorenna addi addi qarrinni duhu batiꞌrinonsare baala togo yiino: “Anewa amme, . . . ani fooliishshiisheemmoꞌnena.” (Maatewoosi 11:28, 29) Isi duuchanka wote mannu shetto tirino hattono ayyaanaamittetenni fooliishsho afidhanno gede assino. Konni daafira, batinyu manni Yesuusi duhansa shaashshannota huwate isiwa shiqansa dhagge assiꞌnannita diꞌꞌikkitino.

 Minaanni Yesuusi lawishsha harunsa dandaanno gara. Minaamakkira duha shaashsha dandaatto doogga hedi. Mitu minaamuwira Roosara noosete gede hedo macciishshantannonsa; ise xissiisidhe togo yitino: “Minaanniꞌya ashikarchosi gede asse laꞌꞌannoe.” Hagiirraame galte noosihu Kuweku kayinni togo yiino: “Duucha wote minaamaꞌya duhase kaaꞌla dandeemmo gara xaꞌmeemmo. Baxeemmose daafira, duucha wote mini loosose umiꞌyanni kaaꞌleemmose.”

Yesuusi shaqqadohonna mararannoho. Mitte buxicho mancho 12 diro buutote xibbinni amadante shette heedhino. Ise Yesuusi maalale loosanno wolqa afiꞌrinota macciishshituti, “Uddanosilla kisummaro, hureemma” yite heddu. Hatto yite hedase garaho. Ise Yesuusiwa shiqqe uddanosi handaara kissu gedensaanni, bayichonko hurtu. Mitu manni tini mancho seyattinohu gede asse hedinoha ikkara dandaanno; ikkirono Yesuusi ise mararsitannota ikkitinota huwatino. a Isi shaqqillunni togo yiinose: “Beettoꞌya, . . . waadannohe dhibbikkinni fooliishshiꞌri.” Isi ise saalfattanno gede diassino woy diboroorinose; qoleno, dhibbise waadannoha ikkinota huwatinota coyiꞌrino. Konni garinni isi manna mararannoha ikkinota leellishino.—Marqoosi 5:25-34.

 Minaanni Yesuusi lawishsha harunsa dandaanno gara. Minaamakki hisattinokki wote, albinni roore shaqqado ikki; qolteno cinci. Isera macciishshaminore atera iillinohu gede assite hedate woꞌnaali. Lawishshaho, Rikaardo togo yiino: “Minaamaꞌya shiimurinni caaccaabbanni noota huwateemmo wote, roore hifachishannosere coyiꞌreemmokki gede albinni roore qoropheemmo.”

Yesuusi rosaanosi ledo hasaawino. Yesuusi jaallasi ledo duuchare hasaawanno. Isi togo yiino: “Anniꞌyawiinni macciishshoommo coye baalanka kuloommoꞌne.” (Yohaannisi 15:15) Yesuusi hiincatenna huuccatto assiꞌrate yee callisi sayisino yanna nooti dikaandannite. Ikkirono, isi duucha wote giddosi hedo baalanta rosaanosira kulanno. Jaddo loosinohu gede assine kiirre shinasira albaanni noo hashsha, isi “lowo geeshsha dadillinota” maaxikki kulinonsa. (Maatewoosi 26:38) Isi rosaanosi ikkitonni koffi yiino wote nafa, insa hasaawisa horonta diagurino.—Maatewoosi 26:40, 41.

Minaanni Yesuusi lawishsha harunsa dandaanno gara. Giddokki hedonna simmeetekki minaamakkira kulte ise ledo hasaawi. Minaama minaannise mannu noowa fulino wote hasaawa goolannoha ikke mine kayinni sammiima ikkeenna qarrantara dandiitanno. Aana yinanni mancho minaannise godowisi hedo kule hasaawisannose wote mayi macciishshamannosero kultino. Ise togo yitino: “Baxannoeti leeltannoe; qoleno isira muli jaalasi ikkoommata huwateemma.”

Minaamakki qaxxaasate yite cuqqo gibbooti. Mitte mancho togo yitino: “Minaanniꞌya anera koffi yaanno wote, haammata barra dicoyishiishannoe. Hunoommari noohu gedenna mishamoommahu gede asse hedeemma gede assannoe.” Ediwiini kayinni Yesuusi lawishsha harunsate woꞌnaalanno. Isi togo yiino: “Giirinoe coyi heeꞌranno wote, bayichonko tumo diqoleemmo; ikkollana, lamunkura coyenke hasaawe tirate injiitannonke yanna haseemmo.”

Bitimaho qummi assiniti Joyi, minaannise Yihowa Farciꞌraasine ledo Qullaawa Maxaafa xiinxalla jammari kawa woyyaawanni noota huwattino. Ise togo yitino: “Isi xa woyyaawino; qoleno Yesuusi lawishsha harunse shaqqado minaanna ikkate lowo geeshsha sharramanni no.” Lowo miliyoone ikkannohu adhamino manni konni garinni Qullaawa Maxaafa xiinxalle lowo horo afiꞌrino. Atino Qullaawa Maxaafa xiinxallite horo afiꞌra hasiꞌratto? Woxe kaffaꞌlittokki xiinxallissannohe gede Yihowa Farciꞌraasine shiqqe xaꞌma dandaatto.