Maarta: Keereho Daraaro? Tenne Yesuusi Kiristoosi reyo Qaagooshshi Ayyaanira dawotta daafira lowo geeshsha hagiidhoomma. a Hakko barra gambooshshu hiittooti?

Daraaro: Danchaho; yinoonniri gudisamella dileellinoena. Ani afoommahu mannu Yesuusi ilaminoha Gannanna kaosi ayyaana Faasika ayirrisannaati ikkinninna reyosi ayyaana ayirrisanna afe diegennoomma.

Maarta: Halaale yootta, Gannunna Faasiku alame woꞌmate egennamino ayyaanaati. Yihowa Farciꞌraasine kayinni Yesuusi reyo Qaagooshshe ayirrisa hasiissannota ammantanno. Shiima yanna nooheha ikkiro, konne ayyaana ayirrisa hasiissinohu mayiraatiro kuleemmahe.

Daraaro: Maahoyye, shiima yana nooena kulie.

Maarta: Yihowa Farciꞌraasine Yesuusi reyo Qaagooshshi Ayyaana ayirrissannohu, isi harunsaanosi konne ayyaana ayirrissanno gede hajajino daafiraati. Hanni Yesuusi reyara albaanni noo hashsha mayi ikkinoro laꞌno. Isi hakko hashsha ammanantino harunsaanosi ledo baxxino hurbaate itinota qaagatta?

Daraaro: Mootichu Hurbaate yaakkiiti?

Maarta: Ee. Hakko hashsha Yesuusi harunsaanosi maa assa hasiissannonsaro xawise kulinonsa. Hanni isi Luqaasi 22:19 aana yiinore nabbawattayya?

Daraaro: Maahoyye. “Qoleno, tima haare galata uyi gedensaanni, hiiqqe insara oye togo yii: ‘Kuni kiꞌne daafira uyinanni maalaꞌyaati yaate. Konne ayewoteno qaagooshshiꞌyara asse.’”

Maarta: Galateemmahe. Yesuusi konni biddishshira jeefote, “Konne ayewoteno qaagooshshiꞌyara asse” yiinonsata huwati. Yesuusi harunsaanosi iso qaaggara kulansara albaanni, isi daafira qaaga hasiissannonsari maatiro xawise kulinonsa. Isi heeshshosi harunsaanosi daafira sayise aannota coyiꞌrino. Yesuusi Maatewoosi 20:28 aanano tenne assaawe ledo sumuu yaannore coyiꞌrino. Tini xiqise togo yitanno: “Manchu Beetti dayinohu soqqammasira ikkikkinni soqqamaranna heeshshosi lowo mannira wodo asse aaraati.” Haranchunni, Yihowa Farciꞌraasine diru dirunku gamba yite Yesuusi reyo qaagooshshi ayyaana ayirrissannohu isi shiqishinota wodote kakkalo qaagateeti. Isi reyo hajajamanno manni baalu heeshsho afiꞌranno faro fantino.

Daraaro: Yesuusi reyinohu ninke heeshsho afiꞌnammoraati yinanna macciishshoomma. Halaale coyiꞌniro kayinni, kuni hiitto ikke ikkannoro diafoomma.

Maarta: Hige konne coye buuxoottakkiti ate calla diꞌꞌikkootta. Yesuusi wodore kulanno rosi hawa gede huwantanniha diꞌꞌikkino. Ikkirono Maganu Qaali giddo noohu lowonta hagiirsiisanno halaali  giddo mittu konneeti. Afummana shiima geeshsha lende hasaawate yanna heedhannohe?

Daraaro: Ee, shiima geeshsha lende hasaambummoro qarru dino.

Maarta: Maahoyye. Wodote daafira nabbawoommare hanni haranse kuleemmahe.

Daraaro: Ishshi.

Maarta: Wodo maatiro huwatate, balanxe hunda Addaaminna Heewani Edeni gannatete cubbo loossu wote ikkinore afa hasiissannonke. Roomu Sokka 6:23⁠te noo assaawe nabbawa tenne huwatate kaaꞌlitannonke. Hanni tenne xiqise nabbawattayya?

Daraaro: Ishshi. Togo yitanno: “Cubbu damoozi reyote; Maganu Mootichinke Kiristoosi Yesuusi widoonni aanno elto kayinni hegere heeshshooti.”

Maarta: Galateemmahe. Hanni koye kulloonniha mitto mittonka coye laꞌno. Balaxxe xiqise mayite hanaffannoro lai: “Cubbu damoozi reyote.” Maganu umonni manna kalaqi yannara, cubbu damoozi woy qorichi reyo ikkanno gede higge fushshino. Hige umi qara cubbaataamu dino. Addaaminna Heewani kalaqaminohu guunte noonsare ikkeeti; wonaatiro oosonsa baalantino guuta ikkite ilantanno. Hakko daafira reyinanni gede assannori diheeꞌrannonka. Addaamiranna Heewanira, hattono oosonsa baalantera hagiidhitanni hegerera heedhanno faro faꞌnantinonsa. Kayinni anfummonte gede, coyi hatto diꞌꞌikkino; ikkinoni?

Daraaro: Diꞌꞌikkino. Addaaminna Heewani hoolloonni haqqicho guma itino.

Maarta: Gara yootta. Addaaminna Heewani Maganoho hajajama gibbe tenne assansa cubboho. Hakko daafira guunte noonsakkirenna cubbaataamma ikka doodhitino. Tenne doodhansa insara calla ikkikkinni oosonsa baalantera lowo qarra naqqino.

Daraaro: Hiitto?

Maarta: Tenne huwatatta gede hanni mitto lawishsha kuleemmahe. Hiittooti buddeena gana baxatta?

Daraaro: Ee! Baxeemma.

Maarta: Hanni lawishshaho, haaro buddeenu mixashsho hidhootta yine hendo. Tini mixashsho buddeena mitte higge nafa gaꞌnitakkinni gaꞌnite hiinxidhu. Tenne hiinxidhino mixashshora gaꞌnatta buddeeni baalunku maa adhe kaꞌꞌanno? Hiinxa adhe kaꞌꞌannoha dilawannohe?

Daraaro: Ee, hiinxa adhe kaꞌꞌanno.

Maarta: Hatteente gede, Addaaminna Heewani Maganoho hajajama gibbu yannara, cubbunninna guuntete xeꞌnenni “hiinxidhino” woy musidhino. Insa cubbaataamma ikkitinohu ooso iltara albaanni ikkino daafira, baalanti oosonsa hattee “hiinxa” woy muso adhite ilantino. Cubbaataamma ikkitino yaate. Qullaawu Maxaafi giddo cubbo yaanno qaali meessa loonsanni cubbo calla ikkikkinni ragiꞌnoonni cubbono kulannoho. Soꞌro ikkinore assinoommokkiha ikkirono, woy Addaaminna Heewani cubbo loossu yannara ilammoommokkiha nafa ikkirono, insa cubbi sirchinsa gudisame ninkeno gantummokki guuntete xeꞌnenna cubbo ragiꞌne gumulote reyineemmore ikkineemmo gede assinonke. Roomu Sokka 6:23⁠te aana nabbambummonte gede cubbu qorichi reyote.

Daraaro: Tini kayinni gara dilabbannoe. Addaaminna Heewani loossino cubbinni mannu baalu hegerera qarramannohu mayiraati?

Maarta: Yaakki garaho—tini gara dilabbanno. Ikkollana heda hasiissannonkeri wolurino no. Maganu guuta taashshosinni Addaaminna Heewani loossino cubbinni reyitanno gede wossanino; ikkirono insa ooso ikkinoommori ninke hexxo noonkekkire ikkinammora diagurino. Maganu konni buutote qarri giddonni fulleemmo doogo qixxeessinonke. Yesuusiti wodote kakkalo hasiissinohu iseraati. Hanni galagalle Roomu Sokka 6:23 laꞌno. Tini xiqise “cubbu damoozi reyote” yitu gedensaanni, aantete “Maganu Mootichinke Kiristoosi Yesuusi widoonni aanno elto kayinni hegere heeshshooti”  yitanno. Konni daafira cubbunna reyotenni ganteemmo doogo fantinonketi Yesuusi reyooti. b

Maarta: Tenne xiqise giddo kulammahera hasiꞌroommahu wolu coyino no.

Daraaro: Maatikka?

Maarta: Tini xiqise, “Maganu Mootichinke Kiristoosi Yesuusi widoonni aanno elto kayinni hegere heeshshooti” yitannota wodanchi. Ninke daafira qarraminohunna reye heeshshosi sayise uyinohu Yesuusa ikkina, tini xiqise “Yesuusi aanno elto” yaa agurte “Maganu aanno elto” yitannohu mayiraati? c

Daraaro: Diiwe afoomma.

Maarta: Addaaminna Heewani kalaqinohu Maganoho; qoleno insa Edenete kaashshu basera cubbo loossu wote baddaltinohu isooti. Isi umo kalaqinori lamu manni finqiltinosi daafira lowo geeshsha dadillinoti dihuluullissannote. Ikkirono Yihowa mitto mala qixxeessinota bayichonko kulino. d Isi ayyaanaame kalaqosi giddonni mittu uullara daye guuta mancho ikke heeꞌranno gede, jeefoteno heeshshosi wodote kakkalo asse shiqishanno gede assate alaamu noosita kulino. Konni daafira, wodote kakkalo gudisidhe Maganu eltooti yaa garankolla. Wodote kakkalo Maganu elto ikkitinoti wole doogono no. Yesuusa shini wote Maganoho mayi macciishshaminosiro hedde egennootta?

Daraaro: Hede diegennoomma.

Maarta: Koye xullote qaaqquullu godoꞌlanni worinore laoomma. Hakko daafira qaaqquullu nooheha lawannoe.

Daraaro: Ee, mittu labbaahunna mitte meya qaaqqo nooe.

Maarta: Ooso iloottata ikkootta daafira leellannohena, hanni Yesuusi reyi wote iimi Annisira, Yihowara mayi macciishshaminosiro hedi. Isi iima heeꞌre muxxe Beettosi amandanna, qacifantannanna tuntuꞌmotenni gannanna lai wote mayi maciishshamannosiha lawannohe? Qoleno Beettosi misimaaretenni ganne haqqaho suntanna hakkiinnino qarrame reyanna lai wote mayi macciishshaminosi?

Daraaro: Lowo geeshsha xissiisiꞌrinoha lawannoe. Konni albaanni tenne hede diegennoomma!

Maarta: Hige hakko barra Maganoho mayi macciishshaminosiro gudinse afa didandiineemmo. Ikkirono isi dadillarano hagiidharano dandaannota anfoommo; qoleno kuni baalu coyi ikkara fajjinohu mayiraatirono anfoommo. Mitte lowo manni afino xiqise yaano Yohaannisi 3:16 tenne dancha gede assite kultanno. Hanni tenne xiqise nabbawattayya?

Daraaro: Ishshi. Togo yitanno: “Maganu alame lowo geeshsha baxino daafira, Beettosi ammanannota loosunni leellishannohu baalunku hegere heeshsho afiꞌranno gede ikkinnina baꞌꞌannokki gede, mitto Beettosi uyino.”

Maarta: Galateemmahe. Hanni tini xiqise umo yitannore galagalte lai. “Maganu alame lowo geeshsha baxino daafira” yitanno. Qaru coyi baxilleho. Baxillu, Maganu Beettosi ninke daafira reyara uullara soyanno gede assinosi. Addaho wodote kakkalo geeshsha baxille leellishannori woluri dino. Yihowa Farciꞌraasine diru dirunku gamba yite Yesuusi reyo qaagooshshe ayirrissannohu tenne qixxaawo qaagateeti. Hasaawinke kaaꞌlinoheri nooha lawannohe?

Daraaro: Ee, lowo geeshsha kaaꞌlinoe. Haja assite dagge konne baala kuloottae daafira galaxxeemmahe.