Lophoommohu Ispeenete gobbara soojjaatoonni baaru qaccera noohu Alikaante yinanni katamiraati. Maateꞌya heeshsho umo lekkicho baꞌinote; hakko daafira wedellichu noommo waro roore yannaꞌya dooggate sayiseemmo. Mininke mule kaameelu gomma seekkisiisiꞌnanni mini no. Hakkiicho qaxarame loosannohu Hose Maariya yinanni manchi ledo jaalooꞌmummo. Isi shaqqado mancho ikkinohura maateꞌya nafa assitinoekkire assinoe. Isi ane 20 diro bayirannoeha ikkirono qarru yannara addu rodoonna jaala ikkinoe.

Hakkawote Hose Maariya Yihowa Farciꞌraasine ledo Qullaawa Maxaafa xiinxalla hanafe no. Isi Maganu Qaale baxannota huwata dandoommo; qoleno Qullaawu Maxaafi halaale duucha wote kulannoe. Yaannore ayirrinyunni macciishsheemmoha ikkirono, gari hasatto dinoe. Hakkawote wedellicha ikkoommo daafira wodaniꞌya duuchawa bebbeehaminoho. Ikkollana, yannate gedensaanni tini ikkito soorrantino.

Iillitinoe dano daafira lowore hasaawa dibaxeemmo. Hakkawote wodancha xeꞌinore assoommo, qoleno akkimale ikkoommo. Mittu barrinni heeshshoꞌya gudisante soorrantu. Lowo jawaantenna hirre nooe wedellichi, hedeweelcho laanshaawe hospitaale eꞌꞌe daallasunni kae afeemmokkiha ikkummo. Iillinoere ammane adha kabbaade ikkitue. Duucha wote, ‘Heeꞌraꞌya hanni mayi waaga afidhino?’ yee hedeemmo.

Mitto barra Hose Maariya laꞌꞌaera hospitaale dayi; hakkiinni bayichonko qooxeessaho noo songora heedhannori Yihowa Farciꞌraasine dagge laꞌannoe gede kulinsa. Insa ane duucha higge dagge towaatansa wodanaꞌya kakkayissue. Xiwantinore baxxino garinni towaantanni kifilenni fulanni heeꞌrenni Qullaawa Maxaafa xiinxalla hanafummo. Mannu qarramannohunna reyannohu, hattono Maganu bushu coyi ikkara fajjinohu mayiraatiro afummo. Qoleno, Maganu albillitte guutu manni uulla woꞌmanno gede assaranna “Xiwamoommo” yaannohu heeꞌrannokki alame abbara qaale einota rosummo. (Isayyaasi 33:24) Heeshshoꞌya giddo mite yee tenne maalaꞌlissanno hexxo afummo.

Hospitaaletenni fulummoti, Qullaawu Maxaafi xiinxalloꞌyanni jawaatanni haꞌrummo. Isinni baxxitino gaarera worreennae Yihowa Farciꞌraasineha mito gambooshshe haꞌranna insa ledo soqqama dandoommo. Bocaasa 5, 1988⁠nni 20 dirihu heeꞌre baxxino gandi giddo cuuamummo. Maganu Yihowa heeshshote heeꞌra baxissannoe gede assinoe. Ikkina, tennera galatu nooeta leellisha dandeemmohu hiittoonniiti?

Bisiꞌya xeꞌne Yihowara soqqammeemmokki gede guficho ikkitaera wodha hoogate murciꞌre kaoommo. Ayyaanaamittetenni lopha hasiꞌrummo. (1 Ximootewosi 4:15) Maateꞌya wole ammaꞌno harunsaꞌyanni gibbue; hakko daafira umi qara coyi shota diꞌꞌikkinoe. Ikkollana, Magano ledonsa magansiꞌreemmori ammanate roduuwiꞌya nooe. Roduuwu baalanka gambooshshe beeqqeemmo gedenna diinaggaawe soqqameemmo gede kaaꞌlitinoe.

Yannate gedensaanni kayinni, barra woꞌma towaanyo hasiissannoe deerra marummo. Lowo yanna hanse tunqi gedensaanni, Alikaante katamira aliyyeenni 160 kiilo meetire fafe noohu Vaalensiyu katamira, bisu xeꞌne noonsa manni heeꞌrannota injiitanno base anfie. Hatti base geedote qaeꞌya ikkitu.

Daallasu aaninni kae afeemmokkiha ikkummorono, Yihowara soqqama agura hoogate murciꞌrummo. Bisu xeꞌne noonsarira uyinanni woxenna wole kaaꞌlonni afiꞌroommore gamba asse kompiyutere hidhe daallasiꞌya mule worrannie gede assiꞌrummo. Qoleno, mobayile hidhummo. Towaatannoe manni soodote kiiro kompiyutereꞌyanna silkeꞌya fane biddi asse worannoe. Kompiyutere horoonsiꞌreemmohu joyistiki yinanni uduunnichinniiti; konne uduunnicho milli asseemmohu gacciꞌyanniiti. Qoleno, afiiꞌyanni gaꞌme amadeemmoti baxxitino siqqo nooe. Tini siqqo kompiyuterete aana fidalla borreessatenna silke bilbilate kaaꞌlitannoe.

Tini tekinooloje kaaꞌlitinoehu hiittoonniiti? Umihunni, jw.org yinanni webisayitenna Agarooshshu Shaeta INTERNEETETE LAYIBIRERE horoonsiꞌrate kaaꞌlitinoe. Tini Webisayite baasa kaaꞌlitinoe! Barru baala lowo saate sayiseemmohu Qullaawu Maxaafi aana xintantino borruwa nabbawanninna xiinxallanniiti; tini qolte Maganunnirenna baxissanno akattasire lede afeemmo gede kaaꞌlitinoe. Callateemmonna hexxo mudheemmo yannara Webisayitenke aana sheshifachishannoere hooge diegennoommo.

Kompiyutereꞌya songote gambooshshe macciishsheemmonna beeqqeemmo gedeno kaaꞌlitinoe. Gambooshshu yannara assaawe coyiꞌre beeqqa, huuccatto assanna lallawo shiqisha, wole agurina tariꞌya iillanno wote Agarooshshu Shae nabbawa dandeemmo. Gambooshshu base haꞌre afa hoogummorono, songote miila ikkoommohu gede ikke macciishshamannoe.

Silkenna kompiyutere heeꞌrase sabbakate loosira guuteemmo gedeno kaaꞌlitinoe. Hige roore Yihowa Farciꞌraasine assitanno gede minunni mine haꞌre soqqame diafeemmo. Ikkollana, tini soqqama agureemmo gede diassitinoe. Konne uduunne horoonsiꞌre ammanaꞌya wolu mannira kula dandoommo. Isinni silketenni farciꞌra lowo geeshsha baxeemmo daafira songonke cimeeyye silketenni farciꞌnanni zamachira qineessaancho ikkeemmo gede xaꞌmitinoe. Kuni zamachi roorenkanni mininni fulte affannokkire songote miilla baasa kaaꞌlino.

Togo yaa kayinni, barra woꞌma tekinoolojete  uduunne horoonsiꞌranni calla hoseemmo yaa diꞌꞌikkino. Jaallaꞌya barru baala laꞌaera dagganno. Insa fiixansanna Qullaawu Maxaafire hasaawa hasiꞌranno manna haadhe dagganno. Isinni duucha wote ani hasaawiseemmo gede assitanno. Wole yannara qolte, mite maate dagge towaattannoe, hattono ledonsa maatete magansiꞌra beeqqeemmo gede koyissannoe. Roorenkanni, qaaqquullu muleꞌya ofolte Yihowa baxxannohu mayiraatiro kultannoe wote lowo geeshsha tashshi yaannoe.

Laꞌꞌaera lowo manni daanno wote baasa hagiidheemmo. Mulinnino fafowiinnino jaalaꞌya laꞌaera daggannohura mineꞌya duucha wote lowo manni heeꞌranno. Tini baxillu towaanyo noommo basera towaattannoerira dhagge ikkitannonsa. Togo baxamannohu roduuwu maamari miila ikkeemmo gede kaaꞌlinoehura Yihowa barru tuqa galaxxeemmo.

Mannu keere haareꞌꞌe kae, “Hiitto nootto?” yaannoe wote “Kuneeti, sharramannilla noommo!” yee qoleemmo. Hige konni garinni sharramanni noommohu ane calla ikkoommokkita afoommo. Iillannonke qarri babbaxxinoha ikkirono, woꞌmunku Kiristaani “dancha ammanate sharro” sharramanni no. (1 Ximootewosi 6:12) Qarru heeꞌreennanni lowo diro sharramanni heeꞌreemmo gede kaaꞌlinoeri maati? Barru baala huuccatto assiꞌreemmo; qoleno heeshshoꞌya alaamu noota ikkitanno gede assinoehura Yihowa galateemmo. Qoleno, ayewoteno Maganu loosi batiꞌrinoeha ikkate sharrameemmo; hattono illeꞌya albillittete hexxo aana illachishshanno gede assiꞌreemmo.

Duucha wote haaro alame daafiranna galagale dodanna kubba dandeemmo wote ikkeemmore hedeemmo. Mito wote, pooliyote dhiwani amadinohu jaaliꞌya Hose Maariya ledo maraatoonete qolchansho daafira kayinse haariimmeemmo. “Hakkawote lamunku giddo ayi qolchanno?” yee xaꞌmeemmosi. Isi qole, “Qolchihuno qolchiro qarru dino. Qaru coyi ninke Gannate eꞌne qolchamankeeti” yaannoe.

Bisiꞌya xeꞌne ammane adha kabbaade ikkitinoe. Xa shete noommohu wedellichu noommo waro gowwa gede ikkeenna iillinoerinni ikkinota afoommo. Ikkirono, Yihowa tuge agurinoekki daafira lowo geeshsha galaxxeemmosi. Isi assinoeri loworeeti; ayyaanaame maate, heeshshote heeꞌrate hasatto, woloota kaaꞌline afiꞌnanni hagiirrenna konni kaꞌira hagiirsiissanno hexxo uyinoe. Giddiidiꞌya hedo haranse kulate, Yihowa hasiisannoehunni aleenni ikkinore uyinoe yaa dandeemmo.