Jaalla jaaloominsa lexxanni haꞌranno gede, mimmitu ledo hasaabbanno. Hatteente gede, Maganuno isi ledo muli jaaloomi heeꞌrannonke gede, hasaawinsammosira koyisinonke. Isi togo yiino: “Kiꞌne woshshitinannie, anewa shiqqineno huuccidhinanni; anino macciishsheemmoꞌne.” (Ermiyaasi 29:12) Magano hasaawisitto deerrinni, ‘isiwa shiqatto, isino atewa shiqanno.’ (Yaaqoobi 4:8) Qullaawu Maxaafi togo yaanno: “Yihowa woshshidhannosirira baalaho . . . muleeti.” (Faarso 145:18) Huuccatto assiꞌnummo kiiro, Maganu ledo noonke jaaloomi lexxanni haꞌranno.

Yesuusi togo yiino: “Kiꞌne giddo, qaaqqisi daabbo huucciꞌreenna kincho aannohu nooni? Woy qulxuꞌmicho huucciꞌreenna hamashsho aannosini? Hakko daafira, kiꞌne . . . oosoꞌnera dancha aamamooshshe uyinanni gara affiniro, iima heeꞌranno Anniꞌne huuccidhannosirira dancha coye hiitto roorse diaanno!” (Maatewoosi 7:9-11) Ee, Maganu huucciꞌrattora koyisinohehu ‘ate daafira hedannonna’ kaaꞌlahera hasiꞌranno daafiraati. (1 Pheexiroosi 5:7) Wole agurina isi qarrisannohe coye isi aana tuqqatto gede koyisinohe. Qullaawu Maxaafi togo yaannonke: “Aye coyirano yaaddinoonte; hatteentenni baalunku coyira huuccattotenninna eeggifatatenni galatu ledo dhiwinoꞌne coye Maganoho kulle.”—Filiphisiyusi 4:6.

Mannu akati daafira xiinxallitanno fullahaano, lowo miliyoone ikkanno manni huuccatto assiꞌra hasiissannote yee hedannota huwattino. Maganu dino yaannohu woy noota huluullamanno manni giddo nafa mitootu tenne ammantanno. a Tini, mannu ooso ayyaanaamu coyira hasatto heedhannonsa gede ikkite kalaqantinota leellishshannote. Yesuusi togo yiino: “Ayyaanaamittete coye goodhinori hagiirraammaho.” (Maatewoosi 5:3) Tenne hasattonke wonshiꞌra dandiineemmo doogga giddo mitte Maganu ledo ganyine hasaawate.

Maganu koyisinonke koyishsha adhine huuccatto assiꞌnummoro, mayi horo afiꞌneemmo?