Qullaawu Maxaafi wole baalante maxaaffawiinni baxxinoho. Kuni maxaafi Kalaqaanchinke amaale amadinoho. (2 Ximootewoosi 3:16) Qullaawu Maxaafi sokka heeshshonke soorrite biddi assa dandiitannote. Qullaawu Maxaafi umisi, “Maganu qaali lubbo afiꞌrinohonna loosannoho” yaanno. (Ibiraawoota 4:12) Maganu Qaali lame qara qara doogganni heeshshonke woyyeessanno; insano: xa heeꞌneemmo heeshshora kaaꞌlanno biddishsha aannonke; hattono Maganonna Isi uyino hexxo anfeemmo gede kaaꞌlannonke.—1 Ximootewoosi 4:8; Yaiqoobi 4:8.

Xaa heeshshokki woyyeessanno. Qullaawu Maxaafi meessi hajara kaaꞌlitanno amaale amadino. Kuni  maxaafi aane noorira kaaꞌlitannota kaajja amaale aanno.

• Maatenkenna wolu manni ledo noonke aantera.—Efesooni Sokka 4:31, 32; 5:22, 25, 28, 33.

• Surretenna bisu fayyimmara. —Faarso 37:8; Lawishsha 17:22.

• Danchu amanyootira.—1 Qorontoosi 6:9, 10.

• Maalaamittete coye afiꞌra dandiinanni gara afate.—Lawishsha 10:4; 28:19; Efesooni Sokka 4:28. a

Iisiyaho heeꞌrannori aju minaanninna minaama Qullaawu Maxaafi amaale kaaꞌlitannota huwatino. Mule adhaminohu wolu minaanninna minaamante gede, insarano kuꞌu kuꞌuyi akata rosanna mimmitoho giddonsata fushshe coyiꞌra qarra ikkitinonsa. Ikkollana insa Qullaawu Maxaafinni nabbawinore harunsa hanafi. Tini kaaꞌlitunsari nooyya? Visenti togo yiino: “Qullaawu Maxaafinni nabbawoommori galtenke giddo kalaqamanno qarra baxillunni tireemmo gede kaaꞌlinoe. Qullaawu Maxaafi kulannore harunsa mitteenni hagiirrunni heeꞌneemmo gede assitinonke.” Minaamasi Anaaluno togo yitino: “Qullaawu Maxaafi giddo kulloonni manni lawishsha nabbawanke kaaꞌlitinonke. Xa ani hagiirraamete; galtenkenna fushshiꞌnoommo mixono hagiirsiissannoe.”

Maganu daafira afatto gede kaaꞌlannohe. Visenti galtete daafira coyiꞌrinoreno agurranna togo yiino: “Qullaawa Maxaafa nabbawaꞌya albinni roore Yihowawa shiqeemmo gede assitinoe.” Visenti coyiꞌrinorinni mitto qara coye huwanteemmo; hakkuno: Qullaawu Maxaafi Magano seekkite afatto gede kaaꞌlahera dandaanno. Magano afakki isi aanno amaalenni horo afiꞌratto gede kaaꞌlitannohe; hakkiinni saeno, Iso jaalakki assiꞌra dandaattota huwatatto gede kaaꞌlitannohe. Qoleno Maganu albillittete daafira uyinoti dancha hexxo yaano hegerera geeddannoti “halaalaancho heeshsho” noota afatto. (1 Ximootewoosi 6:19) Qullaawa Maxaafa agurranna tenne kulannohu wolu maxaafi dino.

Qullaawa Maxaafa nabbawa hanafittoronna nabbawa agura hoogittoro heeshshokki woyyaabbanno, hattono Magano seekkite afatto. Ikkollana Qullaawa Maxaafa nabbawatto wote, lowo xaꞌmo kalaqantahera dandiitanno. Hatto ikkiro, 2,000 diri albaanni heeꞌrinohu mittu Itophiyu manchiha dancha lawishsha qaagi. Isira Qullaawu Maxaafiti lowo xaꞌmo noosi. Isi nabbawannore buuxinoronna teꞌee xaꞌminisita, “Kulannoehu nookkiha maminni buuxeemmo?” yiino. b Hakkiinni isi Qullaawa Maxaafa dancha gede asse rosiisate dandoo noosihu Yesuusi rosaanchi Filiphoosi kaaꞌlasira kaita maahoyye yiino. (Soqqamaasinete Looso 8:30, 31, 34) Atino, Qullaawu Maxaafi daafira ledde afa hasiꞌrittoro, www.mr1310.com/sid widoonni sokka soya woy tenne metseetera noo teesso giddo mulannohewa sokka borreessa dandaatto. Qooxeessikkira heedhannore Yihowa Farciꞌraasine shiqqe hasaawisa woy qooxeessikkira noota Mangistete Addaraashe haꞌra dandaatto. Heeshshokki woyyeessannohe gede, Qullaawa Maxaafa mayira techonni nabbawa dihanafatto?