Ago bikkunni aga cubbo diꞌꞌikkitino. Qullaawu Maxaafi woyine Maganu elto ikkitinotanna wodana hagiirsiissannota kulanno. (Faarso 104:14, 15; Rosiisaancho 3:13; 9:7) Qoleno Maganu Qaali, woyine xaginaateho kaaꞌlitannota kulanno.—1 Ximootewoosi 5:23.

 Yesuusi uullate aana noo yannara woyine agino. (Maatewoosi 26:29; Luqaasi 7:34) Isi mitte hige, sargete jiliwa maalaletenni waa woyinete soorre danchumma assino.—Yohaannisi 2:1-10.

Quwa sayise aga gawajjitanno gara

 Qullaawu Maxaafi woyine kaaꞌlitanno gara kulannoha ikkirono, quwa sayise aganna dimba gara ikkitinokkita xawisanno. Konni daafira, mittu Kiristaanchi aga hasiꞌrannoha ikkiro, quwa saikki aga hasiissannosi. (1 Ximootewoosi 3:8; Tiito 2:2, 3) Qullaawu Maxaafi quwa sayise aga hasiissannokkihu mayiraatiro kulanno:

•   Quwa sayise aga, coye heeshshi gotti asse hedate dandoo huntanno. (Lawishsha 23:29-35) Dimbino manchi “mannimmaꞌne lubbotenni noo kakkalo gede, Magano hagiirsiissannotanna qullaawa assitine [shiqishshe]” yitanno hajajo wonshe diafanno.—Roomu Sokka 12:1.

•   Quwa sayise aga, mittu manchi saala woy mayinae baꞌꞌanno gede assitanno; hattono ‘wodana huntanno,’ yaano gara ikkinore assate hasattosi baꞌanno gede assitanno.—Hoosei 4:11; Efesooni Sokka 5:18.

•   Quwa sayise aga buxissanno hattono buutote dhibbi aana tuggara dandiitanno.—Lawishsha 23:21, 31, 32.

•   Quwa sayise aganna dimba Magano dadillissanno.—Lawishsha 23:20; Galatiyu Sokka 5:19-21.

Mittu manchi quwa saino yinannihu mageeshsha agirooti?

 Mittu manchi age isonooto woy woloota gawajjannoha ikkiro, quwa sae agino yaate. Qullaawu Maxaafi kulanno garinni, mittu manchi dimbino yinannihu damme uwanno deerra iillanno woyite ikkikkinni, raga hawe jaanjurannoha, gaggawannoha, giwamannoha, woy coyiꞌranno woyite lollobbannoha ikkirooti. (Iyyoobi 12:25; Faarso 107:27; Lawishsha 23:29, 30, 33) Mittu manchi dimba hoogiro nafa ‘agu batinyinni wodanisi daafuraranna’ konninni kainohunni buutote qarri iillasira dandaanno.—Luqaasi 21:34, 35.

Horonta aga hooga

 Qullaawu Maxaafi Kiristaanu ago horonta qoropha hasiissannonsa yanna nootano kulanno:

•   Woloota gufisannoha ikkiro.—Roomu Sokka 14:21.

•   Ago aga gashshootu seeri ledo sumuu yitannokkiha ikkiro.—Roomu Sokka 13:1.

•   Mittu manchi bikkunni aga dandaannokkiha ikkiro. Agu araado qarrissannonsari woy quwa sayisse aggannori, agu qooxo nafa martannokki gede qoropha hasiissannonsa.—Maatewoosi 5:29, 30.