Nefiliimootu Ayeooti?
Qullaawu Maxaafi mayyaanno?
Nefiliimi yinanniri, Nohi waro maala uddidhino sokkaasine mannu meento adhiteenna ilantino diqaallaati; tini jigeeyyenna mannaho aleenni higgino ooso kaajjaddahonna bushuulleho. a
Qullaawu Maxaafi, “Maganu ooso mannunnihu seennu xumuulle ikkinota laꞌu” yaanno. (Kalaqama 6:2) Kowiicho “Maganu ooso” yiniri, Maganoho hajajama gibbe gordoho ‘heedhanno dargansa agurte’ dirritino sokkaasineeti; insa mannu biso uddidhe, meentu giddonni “baxxinore doodhite [adhitino].”—Yihuda 6; Kalaqama 6:2.
Kalaqamunni rosaminokkihu konni xaadooshshinni ilantino diqaalla, shaaꞌꞌa ooso diꞌꞌikkitino. (Kalaqama 6:4) Nefiliimootu mannu waajjanno jigeeyyeeti; mararro nookkiti tini ilama baattote aana bunshe batidhanno gede assitino. (Kalaqama 6:13) Qullaawu Maxaafi insa daafira kulanni, “Kuri, albi yannara suꞌminsa egennaminore wolqaataamma ikkitu” yaanno. (Kalaqama 6:4) Insa bunshenna waajjishshanno gari lowo diri geeshsha hambannikkiha ikkino.—Kalaqama 6:5; Kiiro 13:33. b
Nefiliimootu daafira mannu hedannota soꞌrote hedo
Soꞌrote hedo: Nefiliimootu xaano uullate aana no.
Halaale: Yihowa bunshe batidhinota hattenne hundi alame Baote Wayinni hunino. Nefiliimootuno bushu mannino baalunku mitteenni gooffino. Nohinna maatesi kayinni Yihowa hagiirsiissino daafira, hatte yannara baotenni gattinori insa callaati.—Kalaqama 6:9; 7:12, 13, 23; 2 Pheexiroosi 2:5.
Soꞌrote hedo: Nefiliimootu annuwa mannu oosooti.
Halaale: Insa annuwa “Maganu ooso” ikkitinota kulloonni. (Kalaqama 6:2) Qullaawu Maxaafi sokkaasine kulate konne suꞌma horoonsiꞌranno. (Iyyoobi 1:6; 2:1; 38:7) Hakkawaro sokkaasine mannu biso uddiꞌra dandiitanno. (Kalaqama 19:1-5; Iyyaasu 5:13-15) Soqqamaasinchu Pheexiroosi, ‘biꞌre Nohi markaawe boci waro Maganu cince agare heeꞌreennanni, hajajama gibbino’ ayyaanna noota coyiꞌrino. (1 Pheexiroosi 3:19, 20) Qullaawu Maxaafi borreessaanchi Yihudano hattenne ikkito kulanni, mite sokkaasine “heedhanno darga calla ikkikkinni uyinoonninsa roorre agurtino” yiino.—Yihuda 6.
Soꞌrote hedo: Nefiliimootu gordunni tungoonni sokkaasineeti.
Halaale: Kalaqama 6:4 qooxeessira noo hedonni huwata dandiineemmonte gede, Nefiliimootu sokkaasine ikkitukkinni mannu biso uddidhino sokkaasine meentu ledo siimu xaadooshshe assiteenna ilantino diqaallaati. Sokkaasine meentu giddonni “baxxinore doodhite adhitu” gedensaanni, Yihowa 120 diri giddo hattenne busha alame hunannota coyiꞌrino. (Kalaqama 6:1-3) Qoleno “hatte yannara” maala uddidhino sokkaasine ‘mannu seenne adhitinotanna’ “albi yannara suꞌminsa egennaminore wolqaataamma” ooso yaano Nefiliimoota iltinota Qullaawu Maxaafi xagge kultanno.
a “Nefiliimi” yine tirroonnihu Ibiraawootu qaali “Kaachishshe Uulla Tuggannore” yitanno tiro afiꞌrinoha ikkikki digatino. Wilsenisi Oldi Testamenti Wordi Isteediisi yaanno garinni, kuni qaali “manna gantannorenna mulqidhannore, hattono manna uulla tuggannore” kulannoho.
b Kiiro 13:33 aana kulloonniti Israeelete qotaasine laꞌino manni lowo xibbi diri albaanni reyitinore Nefiliimoota qaagganno gede assinonsa.—Kalaqama 7:21-23.
Kurino Lai
QULLAAWU MAXAAFI XAꞌMONNA DAWARO
Agaaninte Isi Addanka No?
Agaaninte maati? Insa mamiinni dagginoreeti?
NINKE DAAFIRA
Hasaawinseemmohe Gede Kuꞌli
Qullaawu Maxaafi xaꞌmo hasaawa, woy Yihowa Farciꞌraasine daafira ledde afa dandaatto.