UIGA O MAU

Kenese 1:1—“Na Foafoaina e le Atua le Lagi ma le Lalolagi i le Amataga”

PLAY

“Na foafoaina e le Atua le lagi ma le lalolagi i le amataga.”—Kenese 1:1, Faaliliuga a le Lalolagi Fou.

“Na faia e le Atua le lagi ma le lalolagi i le amataga.”—Kenese 1:1, Tusi Paia Samoa—Lomiga 1969.

Uiga o le Kenese 1:1

Ua taʻu mai e lenei fuaiupu amata o le Tusi Paia ni upu moni tāua se lua. Muamua, o le “lagi ma le lalolagi,” po o le vateatea e iai lona amataga. Lua, na foafoaina nei mea e le Atua.—Faaaliga 4:11.

E lē o taʻua i le Tusi Paia po o le ā le umi talu ona foafoaina e le Atua le vateatea, e lē o taʻu mai ai foʻi le auala na foafoaina ai e le Atua le vateatea. Ae o loo taʻu mai i le Tusi Paia na foafoaina e le Atua le vateatea e ala i le “tele ma le mataʻutia o lona malosi.”—Isaia 40:26.

O le upu “foafoaina,” e faaliliu mai i se veape Eperu e na o galuega e fai e le Atua e faaaogā e faamatala ai. a I le Tusi Paia, e na o Ieova b le Atua e faasino i ai Lē na foafoaina mea.—Isaia 42:5; 45:18.

Siʻomaga o le Kenese 1:1

Ua faatomua mai e le fuaiupu muamua o le tusi o Kenese le tala o le foafoaga o loo i le Kenese 1 ma le 2. E puupuu faamatalaga a le Tusi Paia i le Kenese 1:1 seʻia oo i le mataupu 2:4 i le auala na foafoaina ai e le Atua le lalolagi ma meaola uma o loo i ai, e aofia ai le uluaʻi tamāloa ma le fafine. Ina ua uma lenā, ona faamatala auʻiliʻili mai lea e le Tusi Paia o le foafoaina o le tamāloa ma le fafine.—Kenese 2:7-25.

O loo faamatalaina i le tusi o Kenese le vaitaimi o “aso” e ono na faia ai galuega o le foafoaga a le Atua. E lē faasino atu nei aso i ni aso e taʻi 24 itula le umi, ae e faasino atu i ni vaitaimi e lē iloa le umi. O le mea moni, o le upu aso e mafai foʻi ona faasino atu i se vaitaimi nai lo o le na o se aso e 24 itula. O loo faailoa mai lenei mea i le Kenese 2:4 lea o loo faaaogā ai le upu “aso” ma le upu “taimi” i se uiga tutusa, e faamatala ai aso e ono na foafoaina ai e le Atua mea uma e pei na faia i se “aso” e tasi.

Manatu Sesē e Faatatau i le Kenese 1:1

Manatu Sesē: Na foafoaina e le Atua le vateatea i ni nai afe o tausaga ua mavae.

Mea Moni: E lē o taʻua i le tusi Paia le taimi na foafoaina ai le vateatea. O le faaupuga o loo i le Kenese 1:1 e lē feteenaʻi ma le talitonuga o saienitisi ua faitau piliona le matua o le vateatea. c

Manatu Sesē: O loo faaalia mai i le Kenese 1:1, o le Atua o le Tolutasi ona e numera tele le upu Eperu o loo faaaogā mo le “Atua.”

Mea Moni: O le faalupega “Atua,” e faaliliu mai i le upu Eperu numera tele o le ’Elo·himʹ, lea e faasino atu i le mamalu po o le silisili o le Atua ae e lē faasino atu i ni atua se tele. Ua faailoa mai i le New Catholic Encyclopedia o le upu Eperu numera tele o le ’Elo·himʹ i le Kenese 1:1 “o taimi uma e faaaogā ai lenā upu e numera tasi le veape e faaaogā ai, ua faailoa mai ai e pei o le masani a se tupu i le faaaogāina o le upu matou i le numera tele lea e uiga atu i lona malualii ae e lē uiga atu i se aofaʻi o tagata.”—Second Edition, Volume 6, itulau 272.

Faitau le Kenese mataupu 1, faatasi ai ma faamatalaga pito i lalo, ma mau faasino.

a Ua faapea mai le HCSB Study Bible e faatatau i le upu foafoaina: “O le veape Eperu o le bara’ lea e uiga atu i le ʻfoafoa,’ o lē e na te faatinoina, e lē mafai ona faasino atu i se tagata. O lea la, o le upu bara’ e faasino atu i se galuega e na o le Atua e mafai ona faatinoina.”—Itulau 7

b O Ieova o le suafa lenā o le Atua.—Salamo 83:18.

c E tusa ai ma le vaitaimi o loo faasino i ai le faaupuga Eperu ua faaliliuina mai ai “i le amataga,” ua faapea mai le The Expositor’s Bible Commentary: “E lē o taʻua patino mai e lenā faaupuga le umi o le taimi talu ona foafoaina le vateatea.”—Revised Edition, Volume I, itulau 51.