E faasino atu “le Alefa ma le Omeka” iā Ieova le Atua, o Lē e ona le malosi uma lava. E faatolu ona taʻua lenei faaupuga i le Tusi Paia.​—Faaaliga 1:8; 21:6; 22:13. a

 O le alefa ma le omeka o mataʻitusi muamua ma le mulimuli o le alafapeta Eleni, lea na tusia ai le vaega o le Tusi Paia ua taʻua o le Feagaiga Fou, e aofia ai le tusi o Faaaliga. O tulaga o nei mataʻitusi i le alafapeta Eleni, ua faaata mai ai e na o Ieova o le amataga ma le gataaga. (Faaaliga 21:6) O ia o le Atua o Lē e ona le malosi uma lava mai lava i le amataga seʻia oo i le faavavau. E na o ia foʻi “e mai i le vavau e oo i le faavavau.”​—Salamo 90:2.

 E faatatau atu lenei faaupuga iā Ieova le Atua ma lona Alo o Iesu. Peitaʻi, e ese le uiga pe a faasino atu iā Ieova, e ese foʻi le uiga pe a faasino atu iā Iesu. Mātau faaaʻoaʻoga nei.

•   I le Isaia 44:6, ua fetalai mai Ieova: “O aʻu o lē e muamua o aʻu foʻi o lē e mulimuli, e leai se isi Atua ua na o aʻu lava.” Ua faamatilatila mai e Ieova i inei, e na o ia lava o le Atua moni e faavavau. (Teuteronome 4:​35, 39) I lenei tulaga, o le faaupuga ʻlē e muamua ma lē e mulimuli’ e tutusa lona uiga ma le faalupega “le Alefa ma le Omeka.”

•   O loo taʻua foʻi le faaupuga “Lē e muamua [pro’tos, ae lē o le alefa] ma Lē e mulimuli [e’skha·tos, ae lē o le omeka]” i le Faaaliga 1:​17, 18 ma le 2:8. Ua faaalia i le siʻomaga o nei mau, na maliu lē e faasino iai lenei faaupuga ae mulimuli ane toetū. E lē mafai la ona uiga atu nei mau i le Atua, ona e lē mafai ona maliu o ia. (Sapakuka 1:​12) I se faaeseesega, na maliu Iesu ma mulimuli ane toe faatūina mai. (Galuega 3:​13-​15) O ia o le tagata muamua na toe faatūina i se tino agaga i le lagi, ma o loo soifua ai nei seʻia oo i le “faavavau, faavavau lava.” (Faaaliga 1:​18; Kolose 1:​18) O toetū na faia mulimuli ane, na ala mai iā Iesu. (Ioane 6:​40, 44) O lea la, o Iesu o lē mulimuli na faatūina e Ieova lava ia. (Galuega 10:40) E tusa ai ma lenei manatu, e mafai la ona faasino atu iā Iesu le faaupuga “Lē e muamua ma Lē e mulimuli.”

 Leai. E lē o iloa po o ai tonu e ana upu o loo i le Faaaliga 22:13, ma e toʻatele foʻi isi o loo iai i lenei mataupu. Na taʻua e le Polofesa o William Barclay e faatatau i le vaega lenei o le Faaaliga e faapea: “E lē o faasolosolo lelei le auala o loo tusia ai mea; . . . ma o le tele o taimi e faigatā ona iloa po o ai tonu o loo tautala.” (The Revelation of John, Volume 2, Revised Edition, itulau 223) O lea, e faasino atu le faaupuga “le Alefa ma le Omeka” o loo i le Faaaliga 22:13 iā Ieova le Atua, e pei lava ona faasino iā te ia isi taimi o loo taʻua ai lenei faalupega i le tusi o Faaaliga.