Pe e Afio le Atua i Mea Uma?

PLAY

Tali a le Tusi Paia

E silafia e le Atua mea uma ma e iai o ia i so o se mea e finagalo i ai. (Faataoto 15:3; Eperu 4:13) Peitaʻi, e lē o aʻoaʻoina i le Tusi Paia e afio le Atua i so o se mea. O loo faailoa mai e le Tusi Paia o le Atua o le agaga ma e iai lona afioaga e afio ai.

Foliga o le Atua: O le Atua o le agaga. (Ioane 4:24) E lē vaaia o ia e tagata. (Ioane 1:18) O vaaiga e faatatau i le Atua o loo taʻua i le Tusi Paia, ua faaalia ai e afio o ia i se nofoaga faapitoa. E leai se faamatalaga a le Tusi Paia e iloa ai e afio le Atua i mea uma.—Isaia 6:1, 2; Faaaliga 4:2, 3, 8.
Afioaga o le Atua: E afio le Atua i le nofoaga o agaga, e lē mafai ona vaai i ai se isi. E iai le afioaga o le Atua i lenā nofoaga o agaga i le lagi. (1 Tupu 8:30) O loo taʻua i le Tusi Paia se faatasiga a foafoaga agaga lea na “ō mai ai atalii o le Atua moni e tutū i luma o Ieova,” a ua faaalia mai ai e afio le Atua i se nofoaga faapitoa.—Iopu 1:6.

Pe afai e lē afio le Atua i mea uma, pe e mafai moni lava la ona ia fesoasoani mai iā te aʻu?

Ioe. E matuā manatu mamafa mai le Atua i tagata taʻitoʻatasi. E ui e afio o ia i le nofoaga o agaga, ae e na te silafia i latou uma i le lalolagi e mananaʻo moni e faafiafia lona finagalo ma e fesoasoani o ia iā i latou. (1 Tupu 8:39; 2 Nofoaiga a Tupu 16:9) Seʻi o tatou iloiloina auala na fesoasoani ai Ieova i ona tagata tapuaʻi faamaoni:

Pe a e tatalo: E faafofoga mai Ieova i le taimi lava e te tatalo atu ai.—2 Nofoaiga a Tupu 18:31.
Pe a e mafatia: “E latalata mai Ieova iā i latou o ē e loto momomo;Ma e faaola e ia i latou o ē ua loto nutimomoia.”—Salamo 34:18.
Pe a e manaʻomia ni taʻiala: E “foaʻi atu [e Ieova] iā te oe le tofā mamao, ma faatonu oe” e ala i lana Afioga le Tusi Paia.—Salamo 32:8.

Manatu sesē e faatatau i le aʻoaʻoga e afio le Atua i mea uma

Manatu sesē: E afio le Atua i so o se mea.

Mea Moni: E lē afio le Atua i le lalolagi, po o se isi lava nofoaga i le vateatea. (1 Tupu 8:27) E moni ua “faalauiloa” mai e fetu ma isi foafoaga “le mamalu o le Atua.” (Salamo 19:1) Peitaʻi, e lē afio le Atua i mea na ia foafoaina e pei ona lē mafai ona nofo o se tusi ata i totonu o se ata na ia tusiaina. E taʻu mai e se ata tusi iā i tatou se mea e faatatau i le tagata na tusiaina le ata. E faapena foʻi ona tatou iloa “uiga lē vaaia” o Lē na foafoaina mea, e pei o le malosi, atamai ma le alofa pe a tatou vaai i ana foafoaga.—Roma 1:20.

Manatu sesē: E tatau ona afio le Atua i mea uma ina ia silafia ai mea uma e tutupu ma avea ai pea o ia ma pule silisili ese.

Mea moni: O le agaga paia o le Atua po o lona mana galue, o le mana lea e na te faaaogā e faataunuu ai lona finagalo. E ala i lona agaga paia, e silafia ma faia e le Atua so o se mea i so o se taimi po o fea lava le nofoaga, e aunoa ma le iai moni i lenā nofoaga.—Salamo 139:7.

Manatu sesē: O loo aʻoaʻoina i le Salamo 139:8, e afio le Atua i so o se mea: “Afai ou te alu aʻe i le lagi, o loo iai lava oe;Afai foʻi ou te fofola loʻu moega i le Tuugamau, faauta! o loo iai lava oe.”

Mea moni: E lē o talanoa le mau lenei i le afioaga o le Atua. O loo faamatala mai i se auala faafatusolo i inei le manatu, e matuā leai se nofoaga e mafai ona taofia le fesoasoani a le Atua iā i tatou.

a O Ieova o le suafa o le Atua o loo taʻua i le Tusi Paia.