Na Faapefea ona Faasaoina i Tatou e Iesu?

PLAY

Le tali a le Tusi Paia

Na laveaʻiina e Iesu tagata faatuatua ina ua ia foaʻi mai lona ola o se taulaga togiola. (Mataio 20:28) O le māfuaaga lena ua taʻua ai i le Tusi Paia Iesu o le “Faaola o le lalolagi.” (1 Ioane 4:14) Ua faapea mai foʻi: “E leai foʻi se isi e mafai ona maua ai le faaolataga, auā e leai se isi igoa i lalo o le lagi ua tuuina mai e le Atua i tagata, e tatau ona faaolaina ai i tatou.”—Galuega 4:12.

ʻNa oo le oti ia [Iesu] ona o tagata uma’ e faaalia le faatuatua ia te ia. (Eperu 2:9; Ioane 3:16) Ina ua māeʻa lena, “na toe faatūina o ia e le Atua mai i le oti,” ma toe afio aʻe i le lagi o se foafoaga agaga. (Galuega 3:15) O ina na mafai ai e Iesu ona “faaolaina atoatoa i latou e faalatalata atu i le Atua e ala iā te ia, auā o loo soifua pea o ia e ʻaiʻoi atu mo i latou.”—Eperu 7:25.

Aiseā e manaʻomia ai ona aioi atu Iesu mo i tatou?

Ona o i tatou uma lava o tagata agasala. (Roma 3:23) Ua avea le agasala ma pa puipui i le va o i tatou ma le Atua, ma ua iʻu atu ai i le oti. (Roma 6:23) Ae ua avea Iesu ma “fesoasoani” mo i latou e faaalia le faatuatua i lana taulaga togiola. (1 Ioane 2:2) E ʻaiʻoi atu o ia mo i latou, ma talosaga atu i le Atua ina ia faafofogaina a latou tatalo ma faamagaloina a latou agasala, e ala i le maliu faataulaga o Iesu. (Mataio 1:21; Roma 8:34) Na faafofogaina e le Atua le talosaga a Iesu ona na ōgatusa ma Lona finagalo. Na ia auina mai Iesu i le lalolagi ina “ia faaolaina e ala iā te ia.”—Ioane 3:17.

Pe e lava le tau ina talitonu iā Iesu e faasaoina ai i tatou?

E leai. E ui e tatau ona tatou talitonu iā Iesu ina ia maua ai le ola, ae e tele isi mea e aofia ai. (Galuega 16:30, 31) Ua faapea mai le Tusi Paia: “E pei lava ona oti le tino pe a leai le agaga, e faapea foʻi ona mate le faatuatua pe a leai ni galuega.” (Iakopo 2:26) Ina ia faasaoina, e tatau ona:

Aʻoaʻo e faatatau iā Iesu ma lona Tamā o Ieova.—Ioane 17:3.
Atiaʻe le faatuatua iā i laʻua.—Ioane 12:44; 14:1.
Faaalia lo tatou faatuatua e ala i le usiusitaʻi i a la faatonuga. (Luka 6:46; 1 Ioane 2:17) Na aʻoaʻo e Iesu e faapea, e lē o tagata uma e valaau atu iā te ia “Le Alii e” o le a faasaoina. Ae na o i latou e “faia le finagalo o [lona] Tamā o i le lagi.”—Mataio 7:21.
Ia faaauau ona faaalia le faatuatua e ui i faigatā. Na faamanino mai e Iesu lenā manatu ina ua ia faapea mai: “O lē e tumau seʻia oo i le iʻuga, o le a faaolaina o ia.”—Mataio 24:13.