Na Faapeʻī Foliga Vaaia o Iesu?
Tali a le Tusi Paia
E leai se tasi e na te iloa lelei foliga o Iesu, auā e lē o faamatalaina mai i le Tusi Paia. Ua faailoa mai ai, e lē tāua tele foliga vaaia o Iesu. Peitaʻi, ua taʻua i le Tusi Paia ni nai faamatalaga e faatatau i foliga vaaia o Iesu.
Fuaitino: O Iesu o se Iutaia ma atonu na tuufaasolo atu iā te ia foliga vaaia o lona tinā, o se Iutaia. (Eperu 7:14) E mautinoa e leʻi ese mai lava ona foliga. Na iai se taimi na ia maliu faalilolilo atu ai mai i Kalilaia i Ierusalema, e aunoa ma le iloa e tagata. (Ioane 7:10, 11) Atonu foʻi e leʻi matilatila ese ai lava o ia mai i ona soo. Ia manatua, na faamatala atu e Iuta le Sekara foliga o Iesu i tagata na ō atu e puʻe o ia.—Mataio 26:47-49.
Uumi o le lauao: E foliga mai e leʻi uumi le lauao o Iesu, auā o loo taʻua i le Tusi Paia “e faalumaina se tane pe a uumi lona lauulu.”—1 Korinito 11:14.
ʻAva: Na iai le ʻava a Iesu. Na mulimuli o ia i le tulafono a Iutaia, lea e faatonuina ai tane e aua neʻi tafi ese uma ‘o latou pito ʻava.’ (Levitiko 19:27; Kalatia 4:4) E lē gata i lea, ae na taʻua foʻi e Iesu le ʻava i se valoaga e faatatau i ona puapuaga.—Isaia 50:6.
Tino: E tele faamatalaga e iloa ai na mālōlōina lelei le tino o Iesu. A o faagasolo lana faiva, na malaga o ia mo le tele o maila. (Mataio 9:35) E faalua ona ia faamamāina le malumalu i Iutaia, ma fuli laulau a tagata suitupe, ma na ia sasaina i maea ma tutuli ese manu mai le malumalu. (Luka 19:45, 46; Ioane 2:14, 15) Ua taʻua i le tusi o le Cyclopedia a McClintock ma Strong: “Ua faailoa mai i tusitusiga a le ʻau faievagelia uma le malosi ma le soifua mālōlōina lelei o le tino o [Iesu].”—Tusi IV, itulau 884.
Foliga: Na faaalia e Iesu le māfana ma le tigā alofa, ma e mautinoa na atagia atu i ona foliga. (Mataio 11:28, 29) Na ō atu iā te ia tagata mai so o se ituaiga mo faamāfanafanaga ma se fesoasoani. (Luka 5:12, 13; 7:37, 38) E oo lava i tamaiti na faigofie ona faalatalata atu iā te ia.—Mataio 19:13-15; Mareko 9:35-37.
Manatu sesē e faatatau i foliga vaaia o Iesu
Manatu sesē: E manatu nisi e iai se tupuaga Aferika o Iesu, ona o loo faatusa i le tusi o Faaaliga lona lauao i se fulufulu mamoe ma ona vae i le “ʻapa pupula e peiseaʻī ua mu i le ogaumu.”—Faaaliga 1:14, 15, The New Jerusalem Bible.
Mea moni: O le tusi o Faaaliga o loo faailoa mai “i faailoga.” (Faaaliga 1:1) O le faamatalaina o le lauao ma aao o Iesu, o loo faaaogā ai faamatalaga faafaatusa lea e faaāta mai ai uiga o Iesu pe a toe faatūina mai le oti, ae lē o ona foliga vaaia faaletino a o iai i le lalolagi. Ina ua taʻua i le Faaaliga 1:14 “ua matuā paʻepaʻe lona lauao e pei o le paʻepaʻe o fulufulu mamoe,” na faatusa atu i le lanu o le fulufulu mamoe, ae e lē o uiga atu e tutusa lona lauao ma le fulufulu mamoe. O loo faaāta mai ai lona atamai e tusa ma le umi talu ona soifua o ia.—Faaaliga 3:14.
Na faatusa aao o Iesu i le “pupula o le apamemea lelei i le ogaumu.” (Faaaliga 1:15) Na pei ona foliga o le “mumū o le lā ina ua mū tinitini.” (Faaaliga 1:16) Talu ai e leai se atunuu e tutusa lanu o ona tagata ma lenei faamatalaga, e faafaatusa la lenei vaaiga. O loo faailoa mai ai le toe faatūina o Iesu “o lē e afio i le malamalama e lē mafai ona sao i ai se tasi.”—1 Timoteo 6:16.
Manatu sesē: E ʻau vaivai Iesu.
Mea moni: O Iesu o se tagata toa. O se faataʻitaʻiga, na ia faailoa atu ma le lototele o ia lava i le motu o tagata na ō atu ma a latou auupega e puʻea o ia. (Ioane 18:4-8) E mautinoa na malosi faaletino Iesu, ma mafai ai ona galue o se kamuta e faaaogāina meafaigaluega.—Mareko 6:3.
Aiseā la na manaʻomia ai e Iesu se fesoasoani i le amoina o lona laau e faapuapuagatia ai? Aiseā foʻi na maliu ai o ia a o leʻi maliliu isi pagota? (Luka 23:26; Ioane 19:31-33) A o leʻi fasiotia Iesu, na matuā vaivai lona tino. E leʻi moe o ia i le pō atoa ona o le mafatia o ona faalogona. (Luka 22:42-44) Na faileagaina o ia e tagata Iutaia i lenā po, ae na faapuapuagatia e tagata Roma i le taeao na sosoo ai. (Mataio 26:67, 68; Ioane 19:1-3) O le māfuaaga lenā na vave ai ona maliu o ia.
Manatu sesē: O Iesu o se tagata foliga faanoanoa.
Mea moni: Na faaātagia atoatoa mai e Iesu uiga o lona Tamā i le lagi, o Ieova, lea o loo faamatalaina i le Tusi Paia o “le Atua fiafia.” (1 Timoteo 1:11; Ioane 14:9) O le mea moni, na aʻoaʻo e Iesu isi i le auala e maua ai le fiafia. (Mataio 5:3-9; Luka 11:28) O nei mea moni e faailoa mai ai na faaalia e Iesu i taimi uma le fiafia, ma na atagia atu i ona foliga.
E te Ono Fiafia Foʻi
A'OA'OGA FAALE-TUSI PAIA
Pe e Saʻo Aʻiaʻi le Tusi Paia?
Afai o le Tusi Paia e mai le Atua, e tatau la ona sili atu i lo o se isi lava tusi.
MOLIMAU A IEOVA
Talosaga mo se Asiasiga
Ia talanoa se fesili faale-Tusi Paia, pe aʻoaʻo atili e faatatau i Molimau a Ieova.