O le Malo o le Atua o se pulega moni lava ua faavaeina e Ieova le Atua. E taʻua foʻi i le Tusi Paia “le malo o le Atua” o le “malo o le lagi,” ona e pule mai i le lagi. (Mareko 1:14, 15; Mataio 4:17) E tele vala e tutusa ai le Malo o le Atua ma malo faaletagata, peitaʻi e sili atu le Malo o le Atua nai lo o se isi lava faigāmalo.

•   Taʻitaʻi. Ua tofia Iesu Keriso e le Atua ina ia avea ma Tupu o le Malo, ma ua tuuina atu iā te ia le pule uma e lē mafai ona maua e se pule faaletagata. (Mataio 28:18) E faaaogā e Iesu lana pule mo na o le lelei o tagata, auā na ia faamaonia mai o ia o se Taʻitaʻi e maufaatuatuaina ma alofa. (Mataio 4:23; Mareko 1:40, 41; 6:31-34; Luka 7:11-17) E ala i le taʻitaʻiga a le Atua, ua filifilia e Iesu ni tagata mai i atunuu uma o le a “pule mai foʻi o ni tupu i le lalolagi” faatasi ma ia i le lagi.—Faaaliga 5:9, 10.

•   Le Umi e Pule Ai. O pulega a malo faaletagata e fai ma muta, ae o le Malo o le Atua “e lē faaumatia lava.”—Tanielu 2:44.

•   Tagatānuu. O so o se tasi lava e na te faia mea e finagalo i ai le Atua, e mafai ona avea ma tagatānuu o le Malo o le Atua, e tusa lava po o fea na tupuga ma fanau mai ai.—Galuega 10:34, 35.

•   Tulafono. E tele aogā o tulafono (po o poloaʻiga) a le Malo o le Atua i lo o le tau ina faasā ai o amioga sesē. O na tulafono e fesoasoani ina ia faaleleia ai amioga a tagatānuu. O se faaaʻoaʻoga, ua faapea mai le Tusi Paia: “‘Ia e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa.’ O le poloaʻiga silisili ma le muamua lenā. E faapena foʻi le poloaʻiga lona lua, ‘⁠Ia e alofa atu i lou tuaoi e pei o oe lava iā te oe.’” (Mataio 22:37-39) O le alofa i le Atua ma tuaoi e uunaʻia ai tagatānuu o le Malo o le Atua ina ia faia mea e sili ona lelei mo isi.

•   Aʻoaʻoga. Talu ai e maualuluga tapulaa ua faataatitia e le Malo o le Atua mo ona tagatānuu, e aʻoaʻoina foʻi la e le Malo o le Atua tagata i auala e tausisia ai na tapulaa.—Isaia 48:17, 18.

•   Fuafuaga. E lē o le fuafuaga o le Malo o le Atua ina ia galulue ona tagatānuu e faatamaoaiga ai ona taʻitaʻi. Nai lo o lea, o le a faataunuuina ai le finagalo o le Atua, e aofia ai le folafolaga o le a ola e faavavau i le lalolagi parataiso i latou uma e alolofa i le Atua.—Isaia 35:1, 5, 6; Mataio 6:10; Faaaliga 21:1-4.