Atonu o le toʻatele o au uō o loo faaaogāina fesootaʻiga i le Initaneti po o le social media, ma o se mataupu o a latou talanoaga i le tele o taimi. E latou te ono ulagia foʻi oe ona e te lē o faaaogāina na fesootaʻiga. O le ā e ao ona e iloa e faatatau i lenei mataupu? O le ā se gaoioiga e mafai ona e faia i ai?

 E iai isi talavou e pei o oe. O le toʻatele o mātua, e latou te lē faatagaina a latou fanau e faaaogā fesootaʻiga i le Initaneti po o le social media. Atonu ua latou iloa, o le faaaogāina o na fesootaʻiga e iʻu atu ai i tulaga nei:

•   lotomafatia ma isi faafitauli o le mafaufau.

•   matamata i ata matagā taufeusuaʻiga, lafo atu o ata ma faamatalaga matagā e ala i feʻau tusitusia, ma taufaamataʻuga i luga o le Initaneti.

•   feeseeseaʻiga lē manaʻomia i le vā o uō.

 E toʻatele talavou ua filifili e lē toe faaaogāina le social media. Ua latou faia lenā filifiliga, ona ua latou iloa e sili atu ona tele aafiaga lē lelei o le social media iā i latou, nai lo ni aafiaga lelei. Mātau faaaʻoaʻoga nei o nisi o mea moni na tutupu:

•   Ua iloa e Priscilla, o le faaaogāina o le social media ua faoa uma ai lona taimi lea e mafai ona faaalu i mea e sili atu ona aogā.

•   E leʻi mafai e Jeremy ona pulea faamatalaga ma ata matagā e oso aʻe i luga o lana social media.

•   Ua mātauina e Bethany, o le faaaogāina o lana social media ua uaʻi tele atu ai i mea o loo faia e isi.

 “Na ou filifili e tapē ese laʻu social media, ma ua ou fiafia ona na ou faia faapea. Ua tele atu loʻu taimi e uaʻi atu ai i isi mea e sili ona tāua iā te aʻu.”—Sierra.

 “Ou te leʻi fiafia i le tele o loʻu taimi na alu i le social media, ma o nisi taimi ou te popole ai po o ā manatu o isi e faatatau i faamatalaga ma ata ou te tuuina i luga. E leʻi faigofie ona tapē ese laʻu social media, ae na vave lava ona lelei oʻu faalogona ina ua ou faia faapea. Ua sili atu ona ou toʻafilemu ina ua aveese.”—Kate.

 Ia usitaʻi i tulafono a ou mātua. Ia faamaonia atu i ou mātua e mafai ona e ola e tusa ma a la tulafono, e aunoa ma le lē fiafia pe faitio.

 Mataupu silisili o le Tusi Paia: “O le tagata valea e vave ona faailoa mai lona ita, a o lē e atamai e onosaʻi ma pulea o ia lava.”—Faataoto 29:11, Easy-to-Read Version.

 E ono faaosoosoina oe e nisi e faaaogā le social media e aunoa ma le iloa e ou mātua, pe fai faananā foʻi sau account. Peitaʻi, e lē atamai le faia o lenā mea. O na faiga faalilolilo, o le a atili ai ona e popole ma lagona le nofosala. E lē gata i lea, pe afai e iloa mulimuli ane e ou mātua, o le a e iʻu ai i nisi faafitauli ma la lē toe maufaatuatuaina ai oe.

 Mataupu silisili o le Tusi Paia: “E matou te mananaʻo ina ia faia mea uma ma le faamaoni.”—Eperu 13:18.

 Ia fai sau oe lava faaiʻuga. E pei o talavou na taʻua i luga, atonu e mafai ona e mafaufau i nisi māfuaaga e atamai ai le lē faaaogāina o le social media. Pe a e mautinoa e lē o iai se aafiaga lelei iā te oe, ona aua lea e te toe faaaogāina. Ia faia faapea ona e lē gata o le faaiʻuga ua faia e ou mātua, ae ona o le faaiʻuga foʻi ua e filifili e fai. O le faia faapea, o le a e lē lagona ai le matamuli pe a fesili atu au uō pe aiseā e te lē faaaogāina ai le social media, ma atonu o le a latou lē ulagia ai oe.

 Manatu autū: Ia usitaʻi i ou mātua, ma talatalanoa ma i laʻua i se manatu e tou te ioe faatasi ai, ina ia mafai ai ona faia e oe lava ia lau faaiʻuga. Ae i le taimi lenei, e mafai lava ona e ola e aunoa ma le social media.