I le lalolagi aoao, o loo fesagaʻia ai e tagata le matuā faateteleina o le vevela o le tau, lea e sili atu nai lo o se isi lava taimi, faapea isi mala faalenatura e māfua mai ona o le vevela. Mātau lipoti o loo mulimuli mai:

•   “Talu ona faamauina e tagata le vevela o le tau i le lalolagi aoao i le 174 tausaga talu ai, o Iuni o le tausaga lenei ua faamauina le sili atu ona vevela.”—Pulega o Ogāsami ma le Atimosifia, Matagaluega o Tupe a le Iunaite Setete, Iulai 13, 2023.

•   “O loo feagai Italia, Sepania, Falani, Siamani ma Polani ma le matuā faateteleina o le vevela, ma o loo faatalitalia e oo atu i le 48°C [118°F] le vevela i motu o Sicily ma Sardinia. E foliga mai o le vevela aupito i sili lea ona mataʻutia ua faamauina i Europa.”—Faalapotopotoga a Europa mo Saʻiliʻiliga i le Vateatea, Iulai 13, 2023.

•   “A o faasolo ina vevela le lalolagi, e faatalitalia o le a faateteleina ma mamafa foʻi timuga, ma iʻu atu ai i lologa mataʻutia.”—Stefan Uhlenbrook, faatonu sili o vai i le Faalapotopotoga o Vāaitau a le Lalolagi, Iulai 17, 2023.

 Pe e faapopoleina oe i nei lipoti o suiga mataʻutia i le tau? Mātau le manatu o le Tusi Paia e faatatau i lenei mataupu tāua.

 Ioe, o le matuā faateteleina o le vevela i le lalolagi aoao, faapea ma isi suiga mataʻutia i le tau, ua talafeagai lelei ma mea na valoia i le Tusi Paia o le a tutupu i o tatou aso. O se faataʻitaʻiga, na valoia e Iesu o le a tatou vāai i “vaaiga e matataʻu ai,” po o “mea uigaese ma e faapopoleina ai.” (Luka 21:11; Good News Translation) O le faateteleina o le vevela i le lalolagi aoao, ua faapopoleina ai le toʻatele e faapea o le a faaleagaina le lalolagi.

 E leai, auā na foafoaina e le Atua le lalolagi e avea ma o tatou nofoaga tumau, ma e na te lē faatagaina tagata e faaleagaina le lalolagi. (Salamo 115:16; Failauga 1:4) O le mea moni, ua ia folafola mai o le a ia faafanoina i “latou o loo faaleagaina le laueleele.”—Faaaliga 11:18.

 Ua faailoa mai i le Tusi Paia, e mafai e le Atua ona puipuia lo tatou lalolagi paneta mai i mala faalenatura, ma o le a ia faia faapea.

•   “Ua ia [Atua] faatoʻafilemu le afā; ua malū galu o le sami.” (Salamo 107:29) E iai le mana o le Atua e pulea ai malosiaga faalenatura. O lea, e mafai ona ia toe faaleleia mea ua faaleagaina i le siʻosiʻomaga, lea ua māfua ai ona pagatia tagata i suiga mataʻutia o le tau.

•   “Ua e tausia le lalolagi, ina ia fua tele mai ma matuā faaʻoaina.” (Salamo 65:9) O le faamanuia a le Atua, o le a avea ai le lalolagi ma parataiso.

 Ina ia iloa atili le folafolaga a le Tusi Paia e faatatau i le faaleleia o le siʻosiʻomaga, tagaʻi i le mataupu “O Ai o le a Faasaoina le Lalolagi?”