O SE tasi lenei o atunuu e aupito i laʻitiiti i le lalolagi, e tū i le va o atumauga o Suisilani ma Oseteria. A o faagasolo senituri, sa nonofo ai tagata Celt, Rhaetia, Roma, ma Alemanni i lea vaipanoa. I aso nei, e silia i le 60 pasene o tagata Liechtenstein e tupuga mai i le ituaiga e taʻua o Alemanni, ia na nofoia lea vaipanoa i le pe tusa ma le 1,500 tausaga ua mavae.

O le gagana Siamani o le gagana autū lea e faaaogā i Liechtenstein, e ui e eseese auala e tautatala ma faaleo ai upu i nuu taʻitasi. O nisi o a latou meaʻai masani, o le Tüarka-Rebel lea e fai mai i le saga, ma le Käsknöpfle lea e fai mai i se ituaiga o mataloni ma le sisi.

E vaaia e turisi e asiasi i lenei atunuu vaaiga eseese i le laufanua, o mauga e lilofia i le aisa, o vanu lanulauʻava, togāvine ma isi laau eseese. O se faataʻitaʻiga, e toetoe 50 ituaiga o oketi e maua i atumauga o lenei atunuu. E iai foʻi falemataʻaga, falematamata ma fale e gaosi ai uaina. O le pogai lea e asia ai e turisi lenei atunuu i le taumāfanafana ma le taumālūlū.

 Na amata ona iai Molimau a Ieova i Liechtenstein talu mai le vaitausaga o le 1920. I le taimi lenei, e pe ā ma le 90 Molimau a Ieova i lea atunuu, o loo latou aʻoaʻo atu le feʻau mai i le Tusi Paia i tagata o le atunuu ma ē e asiasi atu.