TALA A NISI TAGATA

Na tapuaʻi Isaraelu i se “atua o le faamasaatoto ma taua.”

LE MANATU O LE TUSI PAIA

O nuu ia na faatoʻilaloina e Isaraelu na matuā aafia i faiga sauā ma amioga matagā, e aofia ai feusuaʻiga ma manu, mataifale, ma le faaaogāina o tamaiti e fai ai taulaga. Ina ua mavae le faitau selau o tausaga ae e leʻi suia lava o latou ala, ona fetalai atu lea o le Atua: “O mea ia ua lē mamā ai nuu ia ou te tuliesea mai i o outou luma.”​—Levitiko 18:21-25; Ieremia 7:31.

“Ona o amioga leaga a nei nuu e aveesea ai e Ieova lou Atua i latou mai i ou luma.”​—Teuteronome 9:5.

ATONU UA E MATĀUINA

I le tele o fetauaʻiga, e fai mai lava taʻitaʻi lotu o itu ia e vatau o loo fesoasoani le Atua i la latou itu. Ua faapea mai le tusi The Causes of War, “E iai lava le vaegafai a lotu i so o se taua.”

LE MANATU O LE TUSI PAIA

E lē faatagaina Kerisiano ona tau faasaga i o latou fili. Na tusi le aposetolo o Paulo i ona uso Kerisiano: “Afai e mafai iā te outou, ia nonofo filemu ma tagata uma. . . . Aua tou te tauimasui.”​—Roma 12:18, 19.

Nai lo o le auina atu o ona soo i taua, na fetalai atu Iesu iā i latou: “Ia alolofa atu pea i o outou fili ma tatalo pea mo ē ua sauāina outou; ina ia avea ai outou ma atalii o lo outou Tamā o i le lagi.” (Mataio 5:44, 45) E tusa lava pe ō i taua atunuu o loo nonofo ai Kerisiano, ae e tatau ona leai sa latou vaega ona “e lē o ni tagata o le lalolagi” i latou. (Ioane 15:19) Pe afai e finagalo le Atua i ona tagata tapuaʻi i atunuu uma, ina ia alolofa i o latou fili ma vavaeese mai i le lalolagi, e faapefea la ona ia lagolagoina ni itu o loo fetauaʻi i aso nei?

“O loʻu malo e lē mai le lalolagi lenei. Ana mai le lalolagi nei loʻu malo, semanū ua tau aʻu auauna, ina neʻi tuuina atu aʻu i tagata Iutaia. A o lenei, e lē mai i inei loʻu malo.”​—Ioane 18:36.

TALA A NISI TAGATA

E lē mafai ona ʻalofia taua. Ua faapea mai le tusi War and Power in the 21st Century, “E faaauau pea ona iai taua. E leai se faamoemoe o le a iai se filemu e faavavau i le lalolagi atoa i lenei senituri.”

LE MANATU O LE TUSI PAIA

O le a faaiʻuina taua pe a lē toe iai i tagata ni faanaunauga e fetauaʻi. O lea la, o le a aveesea e le Malo o le Atua, o se Malo moni e pule mai i le lagi, auupega uma i le lalolagi ma aʻoaʻoina tagata ia saʻili le filemu. Ua faamautinoa mai e le Tusi Paia o le a “faasaʻo [e le Atua] mataupu lē tonu e faatatau i nuu malolosi e mamao. E latou te tuʻi a latou pelu e fai ma suōtosina, ma a latou tao e fai ma pelu e teu ai laau. E latou te lē toe sii le pelu, o le tasi atunuu i le isi atunuu, pe e latou te toe aʻoaʻo foʻi i taua.”​—Mika 4:3.

Ua aʻoaʻoina foʻi i le Tusi Paia pe a pule le Malo o le Atua, o le a lē toe iai ni faigāmalo e finau mo lo latou lava lelei, faiga lē tonu e māfua ai solo tetee a tagatānuu, po o faiga faailoga tagata lea e māfua ai ona fevaevaeaʻi ituaiga eseese o tagata. O le iʻuga, o le a lē toe iai ni taua. Ua folafola mai e le Atua: “E latou te lē faia se mea e lamatia ai pe faaleagaina se mea . . . ; auā o le a tumu le lalolagi i le poto e uiga iā Ieova e pei ona ufitia o le ilititai i le suāsami.”​—Isaia 11:9.

“Ua ia faaiʻuina taua i tuluʻiga o le lalolagi. Ua ia gauia foʻi le ʻaufana ma vaevaeina le tao; ma ua ia susunuina i le afi o taavale toso.”​—Salamo 46:9.