Ia Olioli i le Faamoemoe

NA MAʻI tigāina Sio i le kanesa, lea na iʻu ai lava lona soifua. I autafa o lona moega, o loo talatalanoa ai lana avā o Kirsten ma nisi o a la uō. E tepa atu Kirsten i lana tane, o maligiligi ifo ona loimata. O le manatu na oo ifo iā te ia, ua tagi Sio ona o ona tigā. Atonu o loo lagona e Sio le tigā, peitaʻi na ia faailoa ane i lana avā, e lē o le māfuaaga lea o le maligi o ona loimata.

Ua faamatala e Kirsten: “Na siʻomia Sio i lea taimi faigatā e ana uō māfana, o ē na ō mai e faatasi ma ia. E lē gata i lea, sa iā te ia le faamoemoe lea ua sili ona ia mautinoa na i lo se isi lava taimi i lona olaga, ma na ia iloa e leai se isi e mafai ona aveesea. Na ia faailoa mai, ua māfua ona tagi, ona o lona fiafia tele. Na maliu Sio i se taimi mulimuli ane i lenā lava pō.

O le ā le faamoemoe lea na faamalosia ai Sio a o faagasolo lona gasegase? O le folafolaga a Ieova le Atua e faatatau i le ola e faavavau i le soifua lelei atoatoa, i le parataiso i le lalolagi. (Salamo 37:10, 11, 29) Ua faapea mai le Faaaliga 21:3, 4: “Faauta, ua i ai le afioaga o le Atua faatasi ma tagata. . . . E soloiesea foʻi e le Atua loimata uma i o latou mata; e leai foʻi se toe oti, po o se faanoanoa, po o se auē, e leai foʻi se toe puapuaga; auā ua mavae atu mea muamua [e aofia ai le mau faafitauli o loo iai nei].”

E Iai Foʻi le Faamoemoe o Tagata ua Maliliu

Ina ia taunuu le faamoemoe o Sio e ao ona toe faatūina o ia mai le oti. O le mea moni, na faamāfanafanaina o ia e ala i le folafolaga a Iesu, o le a toe tutū mai i “latou uma ua i tuugamau,” po o i latou ua feoti o loo manatua pea e le Atua. (Ioane 5:28, 29) Po o e faanoanoa ona ua iai se isi o lou aiga, po o sau uō, ua maliu? Afai o lenā le tulaga, o le a faafiafiaina oe e ala i le faamoemoe o le toe tū. E moni, e lē avea le iloaina o lea faamoemoe ma mea o le a lē lagonaina ai le loto momomo, pe a maliu sē e pele iā i tatou. E oo foʻi iā Iesu, na “tagi” o ia ina ua maliu lana uō o Lasalo. Ae o le faamoemoe o le toe tū ua avea ma mea e māmā ai le tigā.—Ioane 11:14, 34, 35; 1 Tesalonia 4:13.

 Ua faapea mai Kirsten: “Ina ua maliu Sio ona o le kanesa, na ou faapea, ailoga a ou toe lagona le fiafia moni. E ui o lea ua mavae ni nai tausaga, ae ua ou iloa, i lenei faiga o mea, e lē toe tutusa loʻu olaga. Ua gaogao se vaega o loʻu olaga talu ona maliu Sio. Peitaʻi ane, o lea ua ou toe maua le filemu o le mafaufau faapea ma le loto malie.”

Ua faamanatu mai e upu a Kirsten e faapea, i lenei faiga o mea, e lē faapea o le a tatou fiafia i taimi uma. E fesuisuiaʻi le olaga, ma e iai foʻi taimi e faanoanoa ai, ma e lē talafeagai ona faaali ai le fiafia. (Failauga 3:1, 4; 7:2-4) E lē gata i lea, o nisi o i tatou, o loo tauivi ma le gasegase o le loto mafatia, lea e tele mea e māfua ai. Ae ui i lea, ua avea le Tusi Paia ma faamāfanafanaga tele, ma o le poto e lē mafaatusalia o loo iai, e aogā ina ia tatou ʻalofia ai le tele o mailei e māfua ai le lē fiafia. Ua fetalai mai le Atua: “A o lē faalogo mai iā te aʻu, e nofo o ia ma le fifilemu; e filemu o ia, e lē fefe i se mea leaga.”—Faataoto 1:33.

Ioe, o loo matuā naunau mai lava Ieova mo lo tatou lelei. E finagalo o ia ia tatou fiafia, e lē na o na foliga fiafia, a ia lagona le fiafia moni, ma e lē mo na o ni nai tausaga, ae faavavau! O le mea lea, ua fetalai mai lona Alo i upu nei e aogā i so o se taimi: “E fiafia i latou e manatu mamafa i o latou manaʻoga faaleagaga.” (Mataio 5:3, NW) Tatou te faaalia le atamai pe a faatatauina ia upu.

[Pusa/Ata i le itulau 9]

O Mea e Iva e Maua ai le Fiafia

1. Ia iai se vaaiga faaleagaga e tusa o le olaga.—Mataio 5:3.

2. Ia lotomalie ma ʻalofia le “manaʻo i le fia mauʻoa.”—1 Timoteo 6:6-10.

3. Aua le soona faatāuaina mea faafiafia.—2 Timoteo 3:1, 4.

4. Ia agaalofa ma galue mo le lelei o isi.—Galuega 20:35.

5. Ia lotofaafetai e tusa o mea lelei ua e maua.—Kolose 3:15.

6. Ia e loto faamagalo.—Mataio 6:14.

7. Ia filifili lelei au aumea.—Faataoto 13:20.

8. Vaai lelei lou soifua mālōlōina ma ʻalofia masaniga leaga.—2 Korinito 7:1.

9. “Olioli i le faamoemoe” ua e maua mai le Tusi Paia.—Roma 12:12.

[Ata i le itulau 8, 9]

O le faamoemoe mai le Tusi Paia o le ola i le lalolagi fou, o se puna e matuā faamāfanafanaina ai